لاتقبل الذله

[مرتضى شكر]

يامسهل ياالله
قصيدة في حق الحر الرياحي(رض) شعر:مرتضى شكر
ثور إبعزم غيرتك - لاتقبل الذله
بالدم شريت الوطن - يشهد عليك الزمن
لاتقبل الذله
--------------------------
إتآمرت كلها عليك أوجردت خنجرحقدها
الواعدت وياك توكف إنكلبت أونكثت وعدها
لبست إثياب السقيفه مثل أمس باعت عهدها
إبسوك المصالح عافتك - الجانت إبسدك جافتك
إبلدغ العكارب وافتك - دافت الموت إبشهدها
إبشهد اللفظ غرتك - ذاك الأمل وله
خانت أوياك العهد - إشتترجه منها بعد
لاتقبل الذله
------------------------- 1
ثوربركان أبوجهها أبهالوضع لاتظل قانع
سيف حق إنته إبيمينك دينك أوفتوى المراجع
باعتك هاي أشر بيعه اللعنه عالشاري والبايع
باعتك وسفه إبلا ثمن - كوم التحزب والفتن
رادت يعث بيك الزمن - عن مصيرك كوم دافع
فجر حمم ثورتك - وإتوكل إعله الله
جف العقيده إبألف - سوح الوغى تعترف
لاتقبل الذله
----------------------- 2
أمس ماصار إلك عبره وإشكثرغالي سكوتك
إتراب من صار أوكسجينك أولاسمع ينتخي لصوتك
إسنين عمرك يتموها أوحاربوك إبقرص قوتك
كل فعل أبشع من فعل - رادو شموخك ينخذل
ماتو أوظل إسمك عدل - شاخص إعله إتراب موتك
إبعين المجد صورتك - للتضحيه قبله
سيفك إلسان الصبر - إبكل موقف أوكل عصر
لاتقبل الذله
---------------------------3
يله مرعد ثوب صبرك وإعتلي إمتون الشهاده
الواجب إيناديك شمر ساعد إصرار أو إراده
مالوت عزمك مقابر لاذبح وإسيوف إباده
مارادو إيظلك أثر - التأريخ بيك إيمرخبر
إبعزمك تحديت الخطر - إلسانك إبيحسين ناده
إبمحراب دم فكرتك - شفنه المجد صله
من تضحيات الأمس - خطيت أروع درس
لاتقبل الذله
--------------------------4
إمن الوطن كل شبر يعرف بيك إنته اللي حييته
كل ثمرللوادم أصبح زاد يشهد لك رويته
من نزف شريان نحرك بعت عمرك وإشتريته
كل شتل طك وإينع ثمر - سنبل إبألواحه أوكبر
من مر عليه دمك نهر - إسندته بأيمانك حميته
إينع ثمر ديرتك - سنبل وفه أوعله
برعم وريد الفده - فكرة نصر رائده
لاتقبل الذله
--------------------------5
إشلون ترضه تحط إيدك بيد من تعرف وضعهم
سوط الأستعمار لمهم لأجل منفعته جمعهم
إعله الوطن يبجون حسره بل تماسيح إبدمعهم
صارت مصالحهم طلب - مارادو إسعاد الشعب
رد حقك إردود إنسلب - سلبوك إبجف طمعهم
لاترحم الغدرتك - سيف العدل سله
إستوفي دم منحرك - طيبتك لتعثرك
لاتقبل الذله
-----------------------6
يله خل يرتفع صوتك رايه بجفوف التصدي
لاللأستعمار راي إعليك يفرض بيك يحدي
خل زمام الأمر بيدك جرد إسيوف التحدي
لاتسد حلكك مثل أمس - من الدهر إخذ الدرس
سم ناب عدوانك يدس - أوجفها للهاويه إيودي
إللي آمن إبنصرتك - عن نصرك إتخله
ذاك العليك إنحسب - ضدك يصير إشعجب
لاتقبل الذله
------------------------7
هاي مثل الأمس كتبت ياإحسين إقدم رسايل
إلنصرك إحنه إسيوف وثبه إبصوبك إنجاهد الباطل
من وصل ليها شفتها كلها لن ضده تقاتل
وإنظر الحر أوموقفه - راد الخلود إيلفلفه
باع الظلم للحك وفه - لن حضه إبأرفع منازل
منزل خلد جبرتك - يحله الخلد لأهله
كص الحقد يمنته - إتبع الحر خطوته
لاتقبل الذله
----------------------8
الوكفت أويه إحسين وين أوشوف ذيج الضده وكفت
كعبه للزوار صارت أوذيج بأسفل درك صفت
الفرق شاسع بين هاي البالعهد لحسين وفت
خلدت بأرض وادي المجد
للحق مشاعل تتقد
أويه الباري جان إلها عقد
ربحت الباعت الدنيه أوشرت بالدم أخرتها
-------------------------9
الخميس 2/محرم الحرام/1432هـ المصادف 9/12/2010م
النجــــــــــــــــــــــــف الأشـــــــــــــــــــــــــــرف

[والي مطر]

الروعة والاناقة تكون حيث تكون انت سيدي الكريم مرتضى شكر فدمتم بود وسلام ودعائي بالحفظ ...مودتي

[الروح]

عاشَ حُرّاً واستشهداً حُراً ويحشرُ حراً
مع سيد الأحرار..؛
الأديب مرتضى شكر..
مرحباً يَ ضيا بحرفك المتنور..؛
وبوركت أياديك الطاهرة..
لك وآبلُ امتناني وتحيتي
وخالص الودّ

[ابو ظاهر البركي !]

ماشاء الله اخي الجليل مرتضى شكر
ابداع في ابداع
سلام الله على الحر الرياحي

وفقكم الله سيدي الفاضل


اخوكم
ابو ظاهر البركي

[ثورة الحسين]

عاشت الايادي على هذه القصيده الرائعه

واهدي اليك هذا الدارمي بقلمي

( تدري الكلب يحسين بفراكك انصاب
انعاب وبعد ميفيد وديته للكصاب )

اخوك الصغير
عبدالله الشاعر

[مرتضى شكر]

الحبيب الغالي والي مطر
إن لأطلالتكم نجوى
وعزمنا من بركات دعاءكم
الأخت الروح
جزاك الله ثواب كل حرف تلطفت به علينا
الأنتظار
أبوظاهرالبركي
إن لجميل ثناءك رونقه
فشكرا لأطلالتكم الكريمة
الأخ عبد الله
شكرا لمروركم الكريم
(إنصاب الدليل أوذاب بالطف يمظلوم
كلمايمر بي يوم يتهامل إدموم)
مرتضى شكر
النجف الأشرف