في رثاء أم البنين(ع)

[مرتضى شكر]

يامسهل ياالله
في رثاء أم البنين(ع) --------- الشاعر: مرتضى شكر
ماأندب بنيني --- عليك إيظل ونيني
أصيحن من جمر حزني --- آه يحسين آه يبني
عليك إيظل ونيني
---------------
أنه أم البنين الأربعه ربيت
أنه البالسهر ياما عمر كضيت
أنطر شتل صبري إيطك ثمر تانيت
لحسين أربع إبدور إتحرس خليت
دون الحك ندائي --- كل منهم فدائي
يرد جزء الوفه عني -- آه يحسين آه يبني
عليك إيظل ونيني
------------------------
آنه الماسكن لحظه أوبطل وني
أنه المانشف دمعي الحزن فني
سليت آنه المصايب شوف أثر حزني
بمصاب الحسين الدهر دولبني
فصلت المصايب --- ثوب إمن النوايب
ماعاف الدمع جفني -- آه يحسين آه يبني
عليك إيظل ونيني
--------------------
آنه الفجرت من الوفه شلال
وافيت الزجيه إبحركة الدلال
واسيت إببنيني أودمع عيني السال
وأبأربع إصدور إيدوسها الخيال
واسيت الزجيه --- بجروح المنيه
ظهري إمن الألم محني -- آه يحسين آه يبني
عليك إيظل ونيني
-------------------
لعد ثوب الحزن ماقررت أنزع
وحك ظلع أمك الزهره أوفلا أهجع
عليك أبجي إبدمه لو وشل المدمع
ياجرح العقيده الأبلج الأروع
ياعطر الكرامه --- شريان الأمامه
ماظني تفاركني -- آه يحسين آه يبني
عليك إيظل ونيني
--------------------
هد حيلي إبصرخته يهل يثرب وين
عن الغاضريه إبصوته ناعي البين
عفت إعله الثره مهشوم صدر إحسين
وأنصار أو أخوته بالدمه إمغسلين
إبوجدي من كصدته --- على أحسيني نشدته
إنذبح عطشان جاوبني -- آه يحسين آه يبني
عليك إيظل ونيني
---------------------
من كال إلها بشر أومدمعه مسفوح
بأرض الغاضريه إحسين ظل مطروح
أوعلي الأكبر أوجاسم والطفل مذبوح
وإجفوف الكمر فوك الشريعه إتلوح
للكاصد مناير --- إجفوف الوفي الثاير
صرح للتضحيه تبني -- آه يحسين آه يبني
عليك إيظل ونيني
-------------------
النجـــــــــــــــــــــــــف الأشـــــــــــــــــــــــرف

[بهاء آل طعمه]

الأديبُ الحاذقُ المُتمكــّــنُ مرتــــــــــــــضى شكر


أجدتَ واجملتَ وأبدعت فياطابت هذه الروح الولائية الأبية لجميلِ ماخطت وسطرتْ منْ حروفٍ نورانية ذهبية ...... كلمات دخلت في الصميم وهزّت كيان العاشقين فلم تهدأ لهم مشاعرهم الولائية لهكذا أبياتٍ منْ نور ............ جزيت ألف خير وسرور ....,

وعلـّك قبلتَ تواضع مروري سيدي الأجل ..,

أخوكَ الأقل .......... بهاء آل طعمه .............. كربلاءُ الحُسين .ع.

[رياض الرسل]

السلام عليكم

مرتضى شكر

موفق على هذه الكلمات الرائعه
دمت بكل خير وبركه
حبيبنا الغالي

رياض الرسل

[مرتضى شكر]

الأخ بهاء لقد عطرتمونا بمروركم الكريم بارك الله فيكم

ياأخ رياض شكرا لأطلالتكم المتألقه وبارك الله فيكم
مرتضى شكر
النجف الأشرف

[المتقي]

بارك الله بك اخي

وجزاك الله خيرا