عبد الله يالمذبوح

[مرتضى شكر]

بسم الله الرحمن الرحيم
في رثاء الطفل الرضيع(ع) الشاعر: مرتضى شكر
در صدري وين ألكاك - عبد الله يالمذبوح
يصعب عليه إجفاك - عبد الله يالمذبوح
يوليدي ترضع - لحضن أمك إرجع
در صدري وين ألكاك - عبد الله يالمذبوح
--------------------
أنه أمك وأرد أدورك وين أشوفنك
يالمامر خيالي أبتعد عنك
يالماحل فطامك وين أريدنك
بأرض المعركه إبياصوب أدورنك
صوت الكلب ينخاك - عبد الله يالمذبوح
رد ليه أترجاك - عبد الله يالمذبوح
كلبي تصدع - لحضن أمك إرجع
در صدري وين ألكاك - عبد الله يالمذبوح
----------------------
خذاك إحسين مني أوكصد للرماي
ولا ردلي خبر منك يبعد إجلاي
أظل برجاك ترجع لوأكطع أرجاي
ماظني النهر يبخل عليك إبماي
أولا كطره تطفي إظماك - عبد الله يالمذبوح
ثدي النبل غذاك - عبد الله يالمذبوح
ماظني تكطع - لحضن أمك إرجع
در صدري وين ألكاك - عبد الله يالمذبوح
-----------------------
شطت لأرض المعاره إبثورة أحزاني
بلجي ألكاك حي تنتظر تلكاني
ياشهكة إنفاسي أولهجة إلساني
يعبد الله العزيز لمرضعك تاني
أعثر إبهم فركاك - عبد الله يالمذبوح
وين القدر وداك - عبد الله يالمذبوح
وإعيوني تدمع - لحضن أمك إرجع
در صدري وين ألكاك - عبد الله يالمذبوح
----------------------
شده فكري جفاك إكصدت أدورك وين
يبني إبحضن الأكبر تحضه بيك العين
لوغافي يعبد الله إعله صدر إحسين
لومن ثدي النبله إرضعت در البين
هذا الوداع إوياك - عبد الله يالمذبوح
خليني أروح إفداك - عبد الله يالمذبوح
من جرحك إفزع - لحضن أمك إرجع
در صدري وين ألكاك - عبد الله يالمذبوح
-----------------------
من مهدك مشيت لحد نزيف الموت
طير التضحيه إبدم كربله منحوت
دون إحسين بعيون المنيه إتفوت
ياأخر فدائي كربلائي الصوت
نبل القدر ناغاك - عبد الله يالمذبوح
ماأكدر إبلياك - عبد الله يالمذبوح
كلبي تكطع - لحضن أمك إرجع
در صدري وين ألكاك - عبد الله يالمذبوح
----------------------
نبلة حرمله ماعدها كل وجدان
لعد نحرك لفت وإموجده العنوان
ماأدري بجت دم لو نزيفك جان
لوطفت ضماها إبمنحر القرآن
كلب أمك إتمناك - عبد الله يالمذبوح
لاتبتعد ناداك - عبد الله يالمذبوح
بيك إيتضرع - لحضن أمك إرجع
در صدري وين ألكاك - عبد الله يالمذبوح
---------------------------
لعد حضن أمك يعبد الله الولد
ترد لو خطفتك ساحات الشدد
يالولد يبني إنسلب حتى المهد
ويه عمرك والدهر عاباها
------------------
إيطلبك إبيادين كلي حرمله
يعبد الله أوجسمك الغض رمله
نحرك الدامي إبحزن أتأمله
والمدامع دم غدت مجراها
---------------
يالولد يبني يسلوان الكلب
غبت عن إعيوني يالغالي غصب
مانسيتك لحظه وإعيوني تصب
صورتك بنواضري ألكاها
-------------------
يبني مشاني الزمان إمحيره
لديرة الشامت يزيد إميسره
على إمتون أمك السوط إيكسره
الشمر حاديها عكب ولياها
------------------
جرح بأرض الكوفه وإبديرة الشام
إعلينه صدت شامته إعيون اللئام
عكب ذاك العز تولتنه الأيام
يبني ماجنه حراير طه
------------------------
تمـــــــــــــــــــــــــــــــــــــــــــــــت

[ابوتكتم الخير]

مرتضى شكر
لك كل الشكرقصيدة بحق الرضيع
جعلها ألله شمعة تنيرلك الدرب إلى الجنة
ودي ودعائي
تلميذكم
ابوتكتم الخير

[مرتضى شكر]

لقد أخجلني إطراءك ياعزيزي أبو تكتم
وفقنا الله وإياكم لخدمة أل البيت (ع)
خدمة بشرطها وشروطها
مرتضى شكر
النجف الأشرف

[قاسم حتروش]

اللهم صلي على محمد وأل محمد
شاعرنه المبدع مرتضى شكر
كلماتك ذات معنى ومضيئة
جعلها الله في ميزان حسناتك
تقبل مروري

[رياض الرسل]

السلام عليكم

مرتضى شكر
شاعرنا الغالي


دمت للجميع
والله يتقبل من منك هذه القصيده
والله لايحرمنا منك ابد
دمت بكل خير وبركه يارب



رياض الرسل

[استبرق الجنه]

الف شكر




بحق الرضيع ادعولي بالذرية الصالحة اني مظلومة

[الشاعر حسن خليفه]

قصيده روعه بروعه كاتبها

عاشت الانامل التي خطت

والقريحه التي ابدعت

كلنا شوق بنتظار القادم من ابداعك

لاتحرمنا من هذا الابداع

تقبل مروري بحروفك الانيقه

تحياتي

[مرتضى شكر]

تنحني بين يدي مديحكم كلماتي
فأنتم نبض القوافي التي تزيين قصائدي
وشكررررررررررررررررررا
أخوكم وخادمكم
مرتضى شكر
النجف الأشرف