قصيدة الشاعر ناظم الحاش

[صادق العارضي]

دوس اعله الورد....
كام الورد ينداس ...
بس عطر الورد ماتكدر اتدوسه
يصح واحد ...
جريمه اعله الوجه ينباس
اواحد بالرجل ..يستاهل اتبوسه
يالعندك شمس ..
لازم يجيلك ليل ..
ويجبرك غصب تحتاج فانوسه
لتأمن زمان ..
العلم الطاووس..
يتبختر..اوهلس ريش طاووسه
ياتابوت ميت ...
ما تشيله جفوف ..
حتى نكول مات .وشالته فلوسه
فك سجن البلابل ...
يازمان الخوف ...
ليش ابلاذنب ..عالصوت محبوسه
لا تعبد صنم ...
وتشوف بيه فرعون..
واتلم الحيايه ..وتنتظر موسى
او لتخدر الورد..
من شتلة الكمون...
والشتلة الخبيثه..بصفها مغروسه
اولتلوم النهر ...
لوم اليناوش ماي ...
من تعطش كباله...وماترس طوسه
ليصيبك عجب ...
يالعصبر منفوس..
الموته ابهل الزمن.. عالموت منفوسه
بالك لا تشم ..
ريحه ورد مشموم ..
وجلدك لا تلبسه ..هدوم ملبوسه
ولتكلي العمر ...
يستاهل احنه نعيش..
والواكف يلوج..الطاح بضروسه
موت بيا زمن ..
مو مشكله منتموت..
بس اترك اثر ..وافعال ملموسه
دك عمره...
المسيح ابخشبه الكتال
حتى الناس ..تسمع صوت ناقوسه
نام ابلا خبز ..
خليك ميت جوع...
ما فرغت بطن...والعين متروسه

للشاعر المبدع ناظم الحاشي

[ابوتكتم الخير]

السلام عليكم الشاعر صادق العارضي
إختيار يدل على ذوق وإحساس بالكلمات والمعنى
وللحاشي له التحية والسلام

[صادق العارضي]

اللهم صل على محمد وال محمد
شكرا من الاعماق اخي العزيز
ابوتكتم على مرورك الجميل