يامحمـــــــــــــــد ناصبيّــــــــــــــــــــــــه

[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

يامحمـــــــــــــــــد ناصبيّـــــــــــــــــه
ــــــــــــــــــــــــــــــــــــــــــــــــــ ـــــــــــــــــــــــــــــ
مارعونه يامحمّد ناصبيّــــــــه === من بعد عينك يبو الزهره الزچيه
والسمه هلّــــتْ دمع == يانبي
من كسر ذاكَ الضلع == يانبي
من بعد عينك يبو الزهره الزچيه
ــــــــــــــــــــــــــــــــــــــــــــــــــ ــــ
علي إبلوعه إو ألم مهموم == ينــــــادي المصطفه نكروني يامختار
ما عدهم أبد إنصاف == ظلموني إو نسوا بيعتهم الأشرار
ولدارك لفوا أقزام == شعلوها إبحقدهم يانبي للنار
طُفح بيهم حقد مضموم == بقيــــــت آني يطه صابر إو محتار
رِجْعَت الأيّام ظلمه إو جاهليّه === وإبجهلهم جونه أرباب الرديّه
والعدل ما ينسمـــــع == يانبي
من كسر ذاكَ الضلع == يانبي
من بعد عينك يبو الزهره الزچيه
ـــــــــــ
يِوُن سيفي يريد الثار == منهـــــم ما حمل هذا الحقد مولاي
يعرفون الوحي بالدار == إلَـــــــه آثار لازالت تداوي الداي
يعرفون الوديعه إهناه == والحسنيين وي زينب ضُوه عيناي
لكن مارعوها الگـوم == دفعوا باب فاطم والمصيبه هاي
دفعة الباب الحوت عُطر الهدايه === للمآســــي والظلم رسمت بدايه
والرسالـــه تنفجـــع == يانبي
من كسر ذاك الضلع == يانبي
من بعد عينك يبو الزهره الزچيه
ــــــــــ
حسرات إو ألم بحشـاي == وشـــــــوف الزهره يامختار مهمومه
ضلع كسروه واويــلاه == بگه يشكي الألم من ساعته إو يومه
صدر عصروه صاح الآه == ياربــــــّاه شوف الزهـــــــــــره مظلومه
مسمار الصدر أجراه == دم الطاهـــره إو ظل بالنزف دومه
عتبة الباب الشكت جور الأعادي === شافت المُحسن وگع يمها يهادي
وإستمر هذا الوضع == يانبي
من كسر ذاكَ الضلع == يانبي
من بعد عينك يبو الزهره الزچيه
ـــــــ
بعد هاذي المُصايب صار == گلبـــــي إبنـــــار عالزهره يهاديهــــــا
أشوفن زهرتك بَحْزان == وأسمع كُل وكت نوح إو بواچيها
وشوفن بالستر دمعات == زينــــــب ياحبيبي الحرّه تجريهــــا
وشوف المُجتبى وإحسين == ينظـــــرون الزچيه والجـــــــره إعليها
بالدمع نادوني يبويه الوديعه === ما نظنها إتعيش من بعد الفجيعه
ما نظن يضوي الشمع == يانبي
من كسر ذاك الضلـــع == يانبي
من بعد عينك يبو الزهره الزچيه
ـــــــ
أفجع يوم يـــوم إوداع == نور أم الحسن من غاب عنّه إو راح
ضجّت بالسمه الأمــلاك == تنـــــوح إو كُل فلك لابس سواد إوشاح
نزل جبريل نادى إبصوت == إرفـــــــع ياعلـــــي الحسنيين عنها إو ناح
فجعوا ياعلي الأكوان == إولادك يبـــــو الأيتام نادى إو صاح
واني ياطه نهر تجري دموعي === من مشت عنّي طُفت كلها شموعي
نار من روحي تشع == يانبي
من كسر ذاك الضلع == يانبي
من بعد عينك يبو الزهره الزچيه
ـــــــــــــــــــــــــــــ
على إتراب الوديعه إبشوگ == أخذنــــــي النوم لحظات إو شفتها إتگول
يحيدر روح شوف الصار == علــى بنتي أظن بيها الرزايا إتطول
رِجَعْت الدار بالآهـــات == شفت زينب تصلّي والفكر مشغول
يزينب صبري لاتبچيــن == تجي الأيام والأحزان تغدي إتصول
وإنتِ يازينب تصيرين الكفيله === من بعد عين الفدائي ياعقيله
صوت بالحق يرتفع == يانبي
من كسر ذاك الضلع == يانبي
من بعد عينك يبو الزهره الزچيه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
مع تحيات شاعر اهل البيت / جابر النجفي
إسمعوا طور القصيده على هذا الرابط
http://www.wlidk.net/dldxjg88040.mp3.htm