لا تمد للنذل جف اتصافحه

[عباس طريم]

لا تمد للنذل جف اتصافحه]ا]

شعر عباس طريم
___________

لا تمد للنذل جف اتصافحه

ذيب يغدر والغدر اطباعه

يرجع ايطحنك مثل طحن الرحه

وانت بيده اتضوي كالولاعه

صير مثل الطير حطلك اجنحه

واشرد ابعيد ,ابارض مناعه

ما يحب بالناس بس اليمدحه

وروحه للشر والاذى نزاعه

لان طيب , كاعك ابمي سابحه

ولان تافه , بور صارت كاعه

كلي جندوب انت تبقه اتسامحه

وهو شايل للحروب اشراعه

من كثر لجماته كلبك ما صحه

ولا تذكرت الجرالك ساعه

اجوي كلبك ,لوم بيه وصارحه

وكله لا يلتفت للي باعه

ذيب جاهز في مخالب جارحه

والوجوه املونه ولماعه

ابد ما ينطي اذن للينصحه

وللي يلعب بيه , يبدي الطاعه

لو حلف بالله واقسم بالضحى

ذيب يبقه وما يغير اطباعه

لا تصدكه ايسوي كل شي الصالحه

ايكول ,وايغير اليكوله ابساعه

شوفه مابي كل دلائل مفرحه

والفرح كل الفرح بوداعه

يعتذر كل يوم وايكول انمحه

الماضي .. ويقدم العذر بانواعه

ويرجع ايدك انذل من البارحه

بالغدر والشر , طويل باعه

هواي شفنه اوجوه بالشر فالحه

اوجوه صفره املونه وخداعه

يجذب اللي ايكول يتغير جحه

اتزيد دكاته وايزيد ابداعه

يا ما كتلك يغدر ولتمالحه

وترجع اتخلي الملح شماعه

راعي صاحب طيب تكسب صالحه

والنذل ما يوم كتلك راعه

وكتلك امن العقل ومن المصلحه

اترد عليه بالمثل صاع ابصاعه

بيدك اتشيل الامان وتمنحه

والوفه والحب تقدم انواعه

وهو يحفرلك كبرصبح وضحه

والشريته من التقارب, باعه

وين افكارك يخايب سارحه

شمال دربك تاه عن اشراعه

حط اصبعك وسط عينه وصارحه

وبالمضن والهسه دكهن .. داعه

ومن يريد اخر جنص ,لتصالحه

نذل , لتظنه يغير اطباعه

وادعي ربك بالصلاة ايسامحه

ولو ايخابر كسر السماعه

شعر
عباس طريم

[المتجرد الأول]

لان طيب , كاعك ابمي سابحه

ولان تافه , بور صارت كاعه
دعني أول من يشم عبير الأبداع وينتشي بها

[ابوتكتم الخير]

كل عام وأنتم تحت ظل ولاية علي
عباس طريم
آخيتك في الله صاحبتك في الله
تحت ولاية أمير المؤمنين
ودي