الحديقه البيك جنه وتبقى نبراس (نص للعراق)

[*أحمد الكعبي*]

(عاش العراق فالتسقط الطائفيه)

***

ألي بگاعك ورد ماأريده ينجاس
الحديقه البيك جنه وتبقى نبراس
وطن وصيتك وعينك عليهه
أليه أربعطش معصوم بيهه ,,

أريد أجمع مذاهب وأريد أنصب مواكب
أحب تتوحد أصفوف الشعارات
أشجنينه أمن المصايب الگلب بهمومه ذايب
خل نشتل ورد ونشيِل عبوات ,
أحب لَمّت الشَمل بين المذاهب
ورده أنشيل ظد كلمن يحارب
الحديقه البيك جنه وتبقى نبراس

يلوموني اليلومون على عناد اليكرهون
نعم للگال لا للطائفيات
نصّوت عالورد كون نرَشحه أويه اليرشحون
ويِفُوز الورد بالأنتخابات ,
ماأريد أزدحام أعله الكراسي
أريدن بس ورد بچفوف ناسي
الحديقه البيك جنه وتبقى نبراس

عليّ فنهم يگدرون خذت من عابس أفنون
من أحسين متعلم المواهب
أحب الوطن بجنون العواذل خل يسمعون
السني أوياي من أنصب مَواكب ,
شدة ورد من أرمي أعله حده
لأن الورده تعبير الموده
الحديقه البيك جنه وتبقى نبراس

أگوم وألبس أحرام إذا فد يوم ينظام
قديس العراق البيه أمامي
ندبته وشد الأحزام علي الكرار من گام
لگه العباس وأگف يم خيامي ,
طَفَه الجمره كلهه أبفيض زنده
وراح أعله الشهيد أيحطله ورده
الحديقه البيك جنه وتبقى نبراس


وطن وصيتك وعينك عليهه
أليه أربعطش معصوم بيهه

أحمد الكعبي.

[منذر الساعدي]

يلوموني اليلومون على عناد اليكرهون
نعم للگال لا للطائفيات
نصّوت عالورد كون نرَشحه أويه اليرشحون
ويِفُوز الورد بالأنتخابات ,
ماأريد أزدحام أعله الكراسي
أريدن بس ورد بچفوف ناسي
الحديقه البيك جنه وتبقى نبراس

احسنت يا رائع عاشت الايادي

[ابو ياسر الكعبي]

أبو الحسن الكعبي
رائع ولا أروع

[*أحمد الكعبي*]

تحيتي وأحترامي لمرورك من هنا أخ منذر

[*أحمد الكعبي*]

أبو ياسر الكعبي مرورك من هنا كان أروع أيها الأديب تحيتي لكَ

[عدنان منعم]

ابداع وموفق كلام جميل جدا ويدخل للقلب