قصيدة / عباس يا بو الحميه

[الشاعر سعيد الفتلاوي]

قصيدة / عباس يا بو الحميه
......................................
......................................

عباس يا عباس يا بو الحميه
تتباهه بيك الناس يا بن الرضيه

...................

خويه وْ يبو النوماس خويه الكفلني
وينك يا بعد الروح شوف شْهضمني
جارت علينه اعداي فگدك كتلني
بْديوانه هالطاغوت جار وْ ظلمني
صحت آنه يا عباس خيتك يِسبني

بيت الظلم والجور واهل الرديه

...................

وحدي وْ غريبه شْلون حُرمه وْ وحيده
دار الاهل يا ناس صارت بعيده
ثاري الگمر لو غاب روحي تريده
عالمشرعه من طاح گطعو وريده
واعْله الرمح شالوه راس العقيده

حسره وْ هضيمه نشوف هاي المنيه

...................

نازل علينه الضيم حامي خدرنه
وينه اليحامي الدار شايل علمنه
ظلمه الليالي وْ سود بعدك گمرنه
لا والله ما يلتام باگي جرحنه
صاب العشيره اصواب گصّر عمرنه

بعده العمر ما دام من هالبليه

...................

ام البنين تْصيح لجْلك نويته
ومن الصغر باريت شبلي وْهديته
لابن العزيزه حسين روحي فديته
ابني وثلث اخوان فدوه الهَوِيته
كل وكتي چان وْ ياه عمري گظيته

عگبك هجرت النوم يبن الزچيه

...................

طاح العزيز وْ صاح خيتي وْ حِمِلها
نيته يجيب الماي لخته وْ اهلها
صابه العدو بيمناه ايده وْهملها
بعد اليمين يْسار زنده الحِمَلها
راية ابو الاحرار خالد بطلها

هالرايه بالعباس تعله وْابيه

...................

زينب تراها تْنوح تبچي عليهم
ومن الالم وْالضيم تندب لابيهم
تناجي لبو الكلفات مفتخره بيهم
نادت لابيها تْريد يحضر يجيهم
چنها بمنادي بصوت يعلم وليهم

بمصابچ بعاشور من ال اميه

...................

الزهره الحزينه شْلون تنظر وِلِدها
بالغاضريه سْباع حملو عهدها
حكم القدر مكتوب ياهواليصدها
حرب الحقد عالآل باقي امدها
والمهدي للثارات لابد يردها

ويطفي نارالسوء نار الاذيه

.......................................
.......................................

خادم اهل البيت ع
الشاعر الحسيني
سعيد الفتلاوي الطويرجاوي