مولود// سفينة الحسين

[خالد محمد مهدي]

(( سفينة الحسين ))
********
سفينه بسم حسين // وربّانهه الجفّين
هنياله الصعد بيهه
مرسه الجنَّه تاليهه
سفينه بسم حسين
************
هنياله الموالــــــــي بدمعت عيونه
وكل دمعه بأجرهه ذخر مضمونه
كل خادم وزاير // لامايظل حاير // يلكاهه لبشاير
يمشي درب النور // يحس الكَلب مسرور
العتره من يواليهه
مرسه الجنَّه تاليهه
سفينه بسم حسين
************
يامحله الصعاب بحب ابو اليمّه
محبتــه ثـوره بينه أتجدد الهمَّه
ابوابه ماتنسد // وجفوفه ماتنرد // والكَاصده يسعد
هيهاته صرخت ثار // نور بدرب لحرار
رايــــة حق نعلّيهه
مرسه الجنَّه تاليهه
سفينه بسم حسين
************
ندري الزاره أجـــره أبـــد ماينعد
وعطاءه بلايه مَن من الله ماينحد
كرسي أله أمحضَّر// بالجنَّه والكوثر// وبكيفه يتخيَّر
والنور فوك النور // ويصاحبه السرور
وللزهــره يواسيهه
مرسه الجنَّه تاليهه
سفينه بسم حسين
************
يشوف أعماله كلهه حاضره كَباله
تخدمـــه الحـور والولـدان هنيالــه
وشما ثكَل همَّه // أم الحسن يمَّه // وتبشرَّه برحمه
بحسابه وبدوره // ذنوبه مغفوره
شيعتهه تلم بيهه
مرسه الجنَّه تاليهه
سفينه بسم حسين
************
يعبره للسراط ألأحد من السيف
وأهل الجنَّه تتباشر بهذا الضيف
صك عنده من حيدر // أمانه للمحشر // ويتسهّل المعبر
وبسجل محبوبه // الاسماء مكتوبه
زوّاره وأمانيهه
مرسه الجنَّه تاليهه
سفينه بسم حسين
************