الى سفير الحسين "ع" .. احمد هادي الشمري

[احمد هادي الشمري]

بدمعٍ مريرْ ... وقلبٍ كسيرْ
تنوحُ السماءْ ... بفقدِ السفيرْ

بدمع جاري وگـلب متكسّر بهمه
وثغر مثل الغريب أمتيّه الچلمه
أصد وأنظر سفير العتره والرحمه
وگـع من القصر وأتخضّب بدمه
السماء تبچي وتهل نجمه بأثر نجمه
وبالدخان ﻻذت خايفه النسمه
وصوتُ الجروحْ .. دِماءً ينوح.. علا بالبكاء
ـــــــــــــ

تحزّم بالسفارة .. وطوّح ابمهره
الحسين اختاره الهه والحسين أدره
سوّه العباس يا فارس وصل قدره
اعيون حسين هُمّه اليمنه واليسره
بگـلب واحد مشوا .. والروح منشطره
واحد للسفاره .. وثاني للحره
لهم عبرتانْ .. بثِقلِ الزمانْ .. بصدرِ الوفاءْ
ـــــــــــــ

شباب وبيه تجلّت صورة القائد
وعلامات الحكيم الزاهد العابد
گـمر ضد الظلام وزمرته ايجاهد
واعيون الخسوف الساعته اتراصد
نزل بديار ابن عروة وبده يشاهد
الكُـل لحسين كتبوا أقدم .. انعاهد
تقولُ الرِجالْ .. حسينٌ تعالْ .. تجلَّى النداءْ
ـــــــــــــ

كتب لحسين أقدم يا أبو الكلفه
خلفك كل رجال الكوفه مصطفّه
لچن ما بين يوم وليله يا وسفه
أمن أشباه الزلم ما واحد الوفّه
غريب وبالأزقة الوحده يتخفّه
وﻻ يندل طريقه وواحد يضيفه
وعَبرَ الرِياحْ .. يبُثُّ النِياحْ .. لسِبطِ الإباء
ـــــــــــــ

وگـف يم الغريبه وما خفه أسراره
وناداهه الضمه بگـلبي دوت ناره
بالماي اعتنتله وبقت محتاره
اباب الدار واگـف شافت إصراره
سألته عن أهله وكومه ودياره
گـاللهه أنه ابن الما ترك جاره
انا ابنُ عقيلْ .. وما لِي سبيلْ .. بأرضِ الجفاءْ
ـــــــــــــ

لطمت على الراس وبقت منذهله
صاحت يا هله والمدمع اتهله
لچن ( الحضرمي ) حقده فلا مثله
لبن زياد راح وبشره وگـله
اريد الجائزة والضايع اندله
وعمر الشرف باعه بلحظه للذله
وجاءتْ حشودْ .. لقتلِ الصمودْ .. وحانَ اللقاءْ
ـــــــــــــ
أحمد هادي الشمري
بغداد
07714233666