سيد الروح.. احمد هادي الشمري

[احمد هادي الشمري]

**سيد الروح**
بعدهه وداعتك تاكل بالضلوع
ينارك ما طفت كل جمعة تزداد.
تستفحل وتوصل عيني وأبچيك
ومرات وي دمعي يوگع أرماد.
ولو حته الدمع ما يرضه وياي
يبقه.. وجفني صاح بدمع يلصاد.
وجهك .. أوگف وتانيني لتروح
شسوي بعيني إذا يوسفنه ماعاد.
يا غيمة الجمعة .. التمطر الخير
بس سجيل چانت على الجلاد.
من دفتر الحوزة ابيوم شطبوك
ظل دفترهه خالي بطرگ الجلاد.
بالبراني لو مر .. يا صدر چان
عاف الجنه ذيچ وما رجع .. عاد.
وچا فرعون قط ما نادى هامان
ابابك يا صــدر يبلغ اشما راد.
نتمناك حاضر يمنه وأتشوف
شگد جروحنه الما ترضه بضماد.
ولا مر الفرح بجفاك عالروح
ولا فرحهه واحد .. چنهه بغداد.
على خشبة عمرنه الهزل فنان
يمثل أيامنه وبس الحزن جاد.
يلگالو عميل المنك وبيك
أهو المثلك يصح لوحته موساد.
أنه أعرفهه النوايا والكواليس
ولا موساد بس الصدگ مو ساد.
أسمك صار منبـــر للدعايات
وأسمك فاد ذاك الكلشي ما فاد.
وصوتك صار باب لجلب الأصوات
وجرحك صار ثار لبعض الأوغاد.
ظل مفتوح جرحك يكبر شما
كبر تاريخ طفه وماكو شداد.
يا فلته زمانك يحصل منين
مثلك، تكفه ماكو بكل الأنداد.
جمعتك ساعه من معركة الطفوف
وخطبتك صوله هزت عصبة زياد.
وحوزتك بضعه من مدرسة الاسلام
الوضع لبنتهه والد باب المراد.
ورصاصه الصوبتك من نسل سيف
أبن هند وسميه .. وبئس الأحفاد.
أنه محتاجلك يا سيد الروح
أشد امن الهوه والماي والزاد.
محتاج الصفائك .. للحچي الحار
للفتوى الصريحه .. لمخرج الضاد.
للمرجع الينزل لأبعـــد الناس
أنه ما ريد ذاك الهوه ما راد.
يصبحلي أبو .. أيحس بالمعاناة
يربيني .. ينمّي ابروحي العناد.
أنه بگـد ما شفت منك كرامات
أشك بالتقوى تأخذ منك مراد.
الجرحي عتاب يكسر خاطر الموت
وي الموت .. وعتاب الجرح حاد.
ما فكر ابحال ايتامه لــو راح؟
وزمنهم ظالم وموش ابن الأجواد.
وما يدري صدرنه الروح للروح
وباگ أرواحنه وما باگ الأجساد.
گالوا حرگه أمصاب وتبردون
وبقه بس الرماد ونحرگ الــ غاااااد.
مطلوبين .. والهم يطلب الثار
وأحنه ابلايه حيـل وهوه صياد.
يالتارس سمعنه ابشحة الصوت
ويالمخلي الأصنام اتصير عباد.
شلنه امحبتك حكمـه وبطولات
ما شلناهه جلمه أتبث الأحقاد
ولاشلناهه صوره وبذرة أحقاد.
احمد هادي الشمري