قصيدة (زادت ياعلي الونّه **** ومحّد يكطع الظنّه)

[عبدالله خلف العتابي]

محّد يكطع الظنّه)

(تجليبه)
((مفاعيلن مفاعيلن مفاعيلن))
ــــــــــــــــــــــــــــــــ
زادت ياعلي الونّه **** ومحّد يكطع الظنّه

ردّت ياعلي الردّه **** احضر حاضر الشدّه
--------------------
يا سيف الرسول وقائد الاحرار

يا درع الرسول وهازم الكفّار

نيران الكلب تمطر حزن واكدار

ما نحمل حزن من زمرة الاشرار

اشلون الفارك الكبّه **** يغمض ياعلي كلبه

طالت ياعلي المدّة **** احضر حاضر الشدّه
--------------------
يبو حسين الغريب الينشده صعبه

بعد ماظن يهل دمعة فرح كلبه

الك شيعه تون من شدّة الغربه

وغيرك ياعلي محّد عرف دربه

ماتنوصف غربتها **** ونرفع الك دمعتها

ابصوت الحزن والشدّه **** احضر حاضر الشدّه
--------------------
يامن يعتنيك الكثرت اذنوبه

تمسحها ويرد الجنّه مكتوبه

الك شيعه تهل ابدمعه مخضوبه

يا حيدر ذنب ماعدها مغصوبه

ماتنوصف دمعتها **** ونرفع الك دعوتها

اريدك سيفك اتجرده **** احضر حاضر الشدّه
--------------------
صبرنا ومن شربنا من الصبر كاسه

مانجزع لون طاح الجسم راسه

ولا من حبّك البالكلب نبراسه

ياروض اليبيع ابلا ثمن ياسه

كربنا انريدك اتفرجه **** ابحبّك ياعلي ننجه

وغيرك ياعلي شعده **** احضر حاضر الشدّه
-------------------
من حكه اليودّك يكسر اغلاله

من ضيم الطغاة ادموعه همّاله

يالبابك ملاذ الفرج لعياله

من غيرك الى من نعرض الحاله

بابك يا علي انعرفه **** يمّه توكع الكلفه

العايل ياعلي ردّه **** احضر حاضر الشدّه
ـــــــــــــــــــــــــــــــــ
بقلمي خادم اهل البيت (ع)
عبدالله خلف العتابي