عليله وهذا حالي .. أحمد هادي الشمري

[احمد هادي الشمري]

عليله وهذا حالي .. عگب اهلي شبقالي
اموت ابكل مسيه .. توالي الروح بيه
چا وين الغوالي
....
مشو عني وكثر وني اون ليلي ونهاري
متت عدله وانه طفله ودار الوحشه داري
شكثر صوتي دعه لموتي عسه يطفيلي ناري
اليوصّفني يشبّهني ورده بالصحاري
عگب اهلي النشامه .. ليلي شلون انامه
النجم صافن عليه
....
عذاباتي ومعاناتي امن الدنيه نصيبي
النفس يصعد المرض يشتد ومسافر طبيبي
البعد طوّل صبر ما ظل والظل بس نحيبي
بألم گلبي صحت ربي رجعلي حبيبي
عليك ابنار گلبي .. ابويه ايرد يربي
دعاء الفاطميه
....
بدمع جاري لصحن داري اجي وكل خطوه لچمه
اظل بالحر انه اتنطر الريح ايهب واكلمه
امانه اسمع لمن تطلع اخذ من ريتي نسمه
توديهه وتخليهه بانفاس ابو اليمه
وانقله سلامي .. وگله الجفن دامي
عليك امه الزچيه
....
على خدي وعلى چبدي كل چف وشبقاله
واذا خفّگ جنح اشهگ گلت ودوا رساله
الضعن غرّب وأنه اتگلب وعَلَي شحّ بسؤاله
اشب وطفه ورماد اصفه الغريب شلون حاله
لا طارش اجاني .. وعنهم خبّراني
صحت يهل الحميه
....
شكبر كسره العله الذكره يعيش ويا حسرته
غفت روحه عله جروحه وتوسّد دمعته
حلم عيني يمشيني ولن والدي شفته
كثر ونّه وشمر ثنّه وگام ايحز رگبته
لحظه وشال راسه .. وانگطعت انفاسه
اگعدت واصفگ بديه
....
عگب اهلي بعد شلّي ابهالدنيا وحياتي
وحگ جدي صفه لحدي اول امنياتي
اهنا گعدوا الما ردوا هنا چانن خواتي
واسم الله اعله عبد الله اليتغطّه بعباتي
عله امي الروح ونهه .. مشتاگه الحظنهه
وينچ يالمنيه
...
احمد هادي الشمري