قصيدة كعديه في ذكرى شهادة الزهراء (ع)

[قاسم حتروش]

الجار عالــدار وتعـــدّه **** لا شرف لا غيره عنده
وصل يــم بابـه ودفعها *** وكسر من أمي ضلعها
الجار عالــــدار وتعدّه
*********
من بعد ما رحل جدّي وغاب عن هاذي دنيته
تعنّت ليم داره زمــــره تريد تنهي كـل عترته
اقتحمت الــــدار وتعدّت وروّعت للزهره بنته
اعرفها قط مـا آمنت ** لبليس وجنوده ركعت
وبدين جدّي تسترت ** وتدّعي جانت صحبته
زمره لا دين وديانه ** غدرت وخانت الأمانه
قاد زنديــق الجمعها ** وكسر من أمي ضلعها
الجار عالــــدار وتعدّه
*********
القادهم ما بي طهاره مـــن أساسه ومن نطفته
بالرذيله أنعــرف شخصه وباع للشيطان ذمته
فاسق وحاقــــــــد منافق وبالسقيفة خط فكرته
بلايه أصل وبــــلا نسب ** بيده من أجه شايل حطب
ومن وصل للدار وكرب **حاطـها هــــوّ وزمــــرته
جمهـــــر الناس عله بابه ** ونكــــــر للهــادي وكتابه
بفكرته الربعـــــه خدعها ** وكسر من أمي ضلعها
الجار عالــــدار وتعدّه
*********
يعلم شما كال جــــــــــدّي وسمــــع جلماته ونداها
كــــــــال بنتي بضعه مني وعالملأ هــــذه رواها
ويغضب الباري لغضبها ويرضه بارينه لرضاها
لكن اللي جــــاها وحضر ** ما امـــن بسيد البشر
وعنده وصف عنّه هجر ** وهـــوّ سن لكل اذاها
بكل كـــلام النبي يعــلم ** لكـــن أتعـــدّه وتهجّم
ويله مـــن غيّر وضعها ** وكسر مــن أمي ضلعها
الجار عالدار وتعدّه
*********
كصدت الباب الــــدار أمـــــــــي وأني أتبعها بأثرها
ومن علم خلف الباب صارت دفعها للباب وعصرها
انكسر ضلع أمـــــــي الحنينة ونبت بسمار بصدرها
دم أمي عالغبره جره ** ومحسن وكع فوك الثرى
كل هـــذا أنـي أنظره ** ويسعـر بــروحي جمرها
نــــادت الفضة تعالي ** سندينـي وشــــوفي حالي
بعيني شفته اللي صفعها ** وكسر من أمي ضلعها
الجار عالــــدار وتعدّه
*********
بحمائل سيف أبويه جتّف أيـــده وكلبي مدمي
وطلعت أمي رغـــم اذاها تنادي خلّو ابن عمي
والله اكشف راسي ودعي وأشكي للرحمن همّي
تعلمون أنــــي فاطمة ** ومن أندبه الرب السمه
ما تبقه ديـــره سالمه ** وبجهنّـم سَكَـنْ خصمي
أرسل إلها الوالي جلمه ** انتي للأكــوان رحمه
سكنت وهدأت روعها ** وكسر من أمي ضلعها
الجار عالــــدار وتعدّه
*********
ضلّت أمي مـــــن دفعته تعاني من كثرت المها
ورد عليها يريد ترضه نفسه ذاك اللي هضمها
وجـــاب ويـــــاه الأوّل لشـــرّع وسـن الظلمها
رفضت وفدهم من وصل ** أوَّسْطَوْ علي خير العمل
دخلولها وخـــاب الأمل ** زمــــرة الباعــت ذممها
ذكرتهم كــــول أبوها ** شكال بالبضعه وسبوها
وخالِفَوْ سُنْتَه وشرعها ** وكسر من أمي ضلعها
الجار عالــــدار وتعدّه
*********
توَسْدَت امي فــراش أجلها ودمعي عالخد يتجاره
ومن بعد مـــــــــــا ودعتنه وصِّته الحمّاي جاره
وسلمت لله أمـــــــــــــرها ورحلت ليمه وجواره
ما طاب بسمار الصدر ** ولا شفه ضلع لمنكسر
وأحمر الخــد المنسطر ** والكلب ما طفت ناره
ضلّــــت بهم وأذيّـــــه ** لحـــــد موافتها المنيه
وما سكن ونها ودمعها ** وكسر من أمي ضلعها
الجار عالــــدار وتعدّه
**********
وين غايبنه أنشــده شعجب مـــــــــا ينهي غيابه
يكوم يطلب ثـــــــــــار أمي والكبر يكشف ترابه
يعلي صرحه ويبني كبته ومن ذهب لوضع بابه
ومن يوصل لطف كربله ** يعـــدل الكفــه المايله
والجور عــــرشه يزلزله ** والظلم تنتهـي أسبابه
بكل مسه أنـــي أنـدعيله ** تنتهي الغيبــه الطويله
ويصلب الطفّــه شمعها ** وكسر من أمي ضلعها
الجار عالــــدار وتعدّه



الزهره ضمتها الصدرها ***** وهدأت من روع زينب
وكـالــتــلـها هـــذا هــيّـن ***** ويـــوم ليمر بيج أصعب
وحيــــــده تبقين وغريبه ***** وحالتج يـا زينب أعجب
تشوفين أخوتــــج عالثره ***** مـتـسـلــبـه ومـــتـــوذره
ونــــــــار الخيم متوجره ***** بنفس نــار الجاني تلهب




الشاعر
خادم الحسين (ع)
قاسم حتروش البلداوي

[بضعة المختار قدوتي]

السلام على سيدتي ومولاتي فاطمة الزهراء
احسنتم
بارك الله بيكم

[جعفر المندلاوي]

عاشت الايادي ..
بوركتم ..
مع الود