قصيدة(غريبه وطاح حملي وضاعت احلامي)

[عبدالله خلف العتابي]

غريبه وطاح حملي وضاعت احلامي
اظل للموت اصيحن حركوا اخيامي
____________________
نيران ما انساها
للموت ما انساها
____________________
نار بكل كتر واهل الخيم صرعى
يروحي شلون واهل الغدر منجمعه
همي الزاد اريد الكافلي فزعه
تره ايتامك يخويه اليوم كدامي
____________________
تراني من الزغر ياناس محرومه
ادوّر الفرح شو ضاعت انجومه
امس ضلع الزجيه اليوم مهضومه
ناحت يالبدر هاليوم ايتامي
____________________
غداً ويه الضعينه الخاطر ايريدك
حلم والحلم ياهالكلب شيفيدك
جنت اغفه وانامن ياكمر بيدك
الدرب باجر صعب وتضيع احلامي
____________________
يروحي شلون واهل الغدر هالدارت
عله ايتاماي نار الخيم هالصارت
دمعي السال روحي الكافلي سارت
الحمل باجر كلف وتزيد الامي
____________________
يخويه شلون باجر من ينادوني
يتامه حسين وادري يعمن اعيوني
همي الزاد خويه وضاعت اظنوني
هاي اني يخويه الطاحت اخيامي
____________________
اني اختك يعباس انكسر ظهري
عكب عينك انه اللي حايره ابدهري
سهم عينك يبدري ضيّعه العمري
هاي اني يخويه الضاعت ايامي
__________
بقلم الشاعر
عبدالله العتابي