فارس السفارة

[جعفر المندلاوي]

فارس السفارة
=========
بقلمي جعفر ملا عبد المندلاوي
طور بحراني على وزن{ يابن أمي عالتربان عفتك رميه}

سلّ سيفه بالميدان غيره وحميه
مسلم سـفير الحسين والهاشمية

**1**
عالم وثيق وبطل ، التقوى شعاره
نال الشرف والمجد وعهد السفارة
فارس شجاع وشهم وحصل بشاره
وظل بكرامة يصــول عالجاهــلـية
**2**
من ظَهْر هاشم طلع بالكوفة صنديد
كل غايته يرد الظلم والشرع ما يبيد
أعلنها ثوره بمفرده وعنها فلا يحيد
ما داهن اهــل الشرك روحـه ابيــّه
**3**
مسـلم شجاع وأبي من حيدره عـزمـه
وحده طلــع للحــرب والكثرة ما تهمه
كل همه يحمي الشرع رخصله كل دمه
مـن خذلـته الكوفـان ذيــج المســـية
**4**
مثل الصگر ظل يحوم زلزل الميدان
نادى يا اهل الغدر والمكر والخذلان
دين الهدى مذهبي مابايع الطغيان
وامامي يــبقه عليّ وابــن الزچية


**5**
ضرغام مغضــب نزل ارعــب كتائبها
فرّق جمـوع الكفر شــــــتت ركائبها
بالغربة عاش بمحن كثرت نوائبها
وعيـنه على ابن النبي ظلـت ربّيه

**6**
هيبه ووقار وشرف ضحه لجل دينه
من بيت طـوعه طـلع بتاره بيمينه
ذكَرَتَه بعمه عليّ وحروبه وسنينه
مســــلم فخـــر والنعــم للطــالـبـيـه
**7**
ايمانه درعه وهجم والكوفة زلزلها
وتصيح طوعه بعزم يمسلم انت الها
بالحومة حار العدو الفرسان جندلها
وما رضـخ مســلم أبد رغـم الأذيـه
**8**
شافوا عزيمة حيدره وحمزة وجرأته
فوگ الجروح من العطش ذابت چبدته
بحفرة غـدر يتأسر وصـــارت وگـعته
مگيد يروح بسـلسـله دمـومه جريه
**9**
مسـلم أسـير ويدخـل بقصـر الامارة
ما ضعف لحظة ولا بان منه انكساره
توجه بصوب الحسـين وأدى الزيارة
أســتودعك يا سيـدي هــاي المنـية
**10**
ينذبح مسـلم ضـامي وينال الشـهادة
بنصرة حسين السبط وبيت السيادة
والجثة سحلوها بحقد اهل الجِحادة
ومن غدر هاي الشرذمه جثته رمية

[وهج الإيمان]

السلام على السفير المنحور شكر الله لكم ماجدتم به من هذه الأبيات الولائيه بحق السفير المظلوم جعلها الله في موازين حسناتكم

[جعفر المندلاوي]

ممتن جدا للحضور العابق ؛ وهج الايمان
ربي يزيد ايمانك واجرك في شهر الحزن ..
مودتي واحترامي