مهرجان الشعر الشعبي

[أبن المرجعية]

السلاام عليكم

اللهم صل على محمد وال محمد


بعض من الاشعار مهرجان الشعر الشعبي






الشاعر عدنان هاشم الكعبي

المصالحة




حط ايدك بايدي وكول ياالله
وعوف الصار كله ونبدي من هسة
نبدي من العراق وللعراق وبس
ونزف الوطن ونشارك بعرسة
مثل زفة عمام وكلنه نفرح بيه
واساس التفرقة نمحيه من رسة
لان هذا العراق وهذا هو البيت
واصل الغيرة كلها انزرعت بنصة
**************
احنا الغيرة عدنا واحنا اهل الطك
الحك الوادم اتعرفة واندور فوك من الحك
ايدي بايدي كلنا وخلي نخيط الشك
وعد عينة يال بينة يتنخة
**************
مو اسلام احنا واحنا فد قرآن
ومو تدري بنبينه شراد وشوصه
مراد نتكاتل ليش هذا الصار
يخي اقرا الحديث وافتهم نصة
سم الطائفية ولا تشربة ارجوك
واعرف زين منه بالعسل دسة
دمك هو دمي اشلون ترضى يسيل
واسمك هو اسمي وداعتك نفسة
**************
اسم واحد اسمنا وكلكم اتعرفوا
ويضل دمنا يتحرك وين متصيرون
اسلاح احنا البديكم وانتم الترمون
ورادوا تفرقة البيناتنا يزرعون
لاكن لا وحقك ابد ما يكدرون
ليش اتغيرون الدم نفس الدم
**************
راجع نفسك وانعل الشيطان
تره الشيطان هو الزارع الغرسة
نتصافح تعال او لا تضل زعلان
فرصة او لا تضيع خايب الفرصة
خلينا انتكاتف ايد تشبك ايد
او نعل البيت عالي او ندفن النصة
**************
العراق ايريد واحد يجمع الخوان
ويعامل بغيرة او هذا اهم عنوان
وخادم للشعب مايفرق أي انسان
**************
العراق ايريد غيرة واحد بيه الكفاية
اذا وكتك تردة يصير تجايه
ايوحد بالصفوف وما يخلف رايه
**************
العراق ايريد واحد ينكطع بيه فاي
سد مدرع الشعبه من ايفيض الماي
يظل تاريخة ثابت عل جرى وعل جاي

تاريخه معروف او ثابت

___________________

الشاعر علي الفريداوي

وطن واحد


وطن واحد اجروحه واحنه مختلفين
وخلص شريان دمه وانذبح كله
اليهينه احنه ابعضنه بينه ما بين
وانخبطن علينه العنب والسله
واحد بالعرض واحد يجر بلطول
والثاني انسحب والثالث اتخله
ولا جنه ابوطن نشرب بنفس الماي
ونفس اجروحنه والخلل والخله
لحد ما طفح بينه الكيل والميزان
وانهد من علينه البيت والكله
والشتموا بينه الجانوا يجدون
والخادم كبل بجروحنه اتسله
الف لا ياشعب مو انت هيج اتصير
بل لا ياهلي يامعدن الدله
نهجر جارنه ومن يمنة حامي الجار
وبسابع جار ربك صوت نزله
نزل دبج علينه ونستحي انحاجيك
وبطبل لو دبج نستحي انكله
هسه انشيل اهلنه اشلون هاي اتصير
باجر لو محمد سأل شنكله
هلي مدو أيدكم ليش مختلفين
لان بس الصلح يرهم دوه العله
الصلح شيمة اهلنه واحنه اهل الطيب
واحنه اهل المحنة وطيبة الدهله
كبر بينه الجرح والحال غير الحال
جرح غير الصلح من يكدر ايشله
انتفاهم بينه وطيح ضيج وهاي
وإذا بيناتنه ياهل وطن سهله
المايرضا يصعد حته يرضه اوياي
يدلل عليه ورايح انزله
خلي بكلوبنه ايصير الصلح موجود
حته الطاح امس ها اليوم يتعله
وطن محتل يصير الخلل بالتاريخ
بس اكلوبنه ميصير محتله
احو ياهلي يا البيكم اتنخيت
ها يلسيفكم بلموزمه اتسله
مو بيناتنه كون العدونه انصير
شدة انشد عليه وكونه انسله
مو من بابه تدخل لون غرنه اعليه
اذا نتحد من اعيونه اندخلة




________________________


الشاعر محمود الغريب

آني عراقي


واضح في كل الاشياء

وطيب حتى الاستغفال

بكلبي يمين بكلبي يسار بكلبي جنوب بكلبي شمال

في اقصى جنوبيتي عراقي

وفي لكنة كرديتي عراقي

بدوي عراقي .. بغدادي بلف جراويتي

بعكالي ابشتي بجفيتي

بس تنخاني امشمر حاظر تلكاني

تامر عيني وتامر اغاتي

يتوضحلك اني عراقي

اني عراقي .. اول من علمت الناس اتخط الكلمة

واول من غازلت النجمة

واول من رطبت النسمة

واول دمعة واول بسمة

ولكل ظلمة ان اول شمعة وشمس انطلقت من بيتي

بابل انه .. سومر انه .. من اور انه .. الوركاء انه ولكش وكيش

ومختومة بكلهن جنسيتي

انه عراقي اول من خط الاديان

املك جامع للقران واملك اديرة ورهبان

وكنائس عندي وصلبان اني عراقي ..

لتعربني وتستغربني هذا يماني وهذا حجازي

وهذا الكردي وهذا العربي وهذا المسلم هذا المسيحي

وهذا السني وهذا الشيعي

ما اسمحلك ان تنسبني غير الاصل الشعب الراقي انه عراقي

انه عراقي .. الله كلم موسى بارضي

وارسى سفينة نوح بارضي

ادم صلى لربة بارضي

هود بارضي وشيت بارضي

واكرمني بستة معصومين ..

ومن دم حيدر ثورية ارضي وجف

عباس ودم حسين

اني عراقي

النعمان اتربه بارضي والكيلاني من اربات ارضي

واوراق العالم ما تكفي

وما تستوعب ارثي الباقي

ويكفيني افخر

امام كل السنة عراقي

ومرجع كل الشيعة عراقي

وبابا الفاتيكان عراقي

مو حقي افخر انه اصل الانسان الراقي

اني عراقي ..




مع التحيات ..