مو وحدك انتة [الأرشيف] - منتديات أنا شيعـي العالمية

الامير 2009

13-02-2009, 03:42 AM

مو وحدك انتة
انت الشعب كلة بشيعتة و سنتة
منهو الكالك ناسيك؟ هم ينسى الكمر وكتة؟
بس عشككـ عشكـ مفضوح و عشكـ الناس كلها مساتر و سكتة
صرت انت سبت و بركبة يهودي
هم شايف يهودي يجوز من سبتة؟

انت الفارس اليسبكـ هبوب الريح و ما ظن خيل سابكتة
و انت اليرهم ترابك كحل للعين و دوة للما شفت علتة
و من طينك نحني جفوف المعرسين و كل اصبع فرح من طيبتك طكتة
و انت الريحة ترابك ترد الروح .. هيل و زعفران و عنبر بشمتة
و مثل تراب كاعك ما لكينا تراب ... يرهم للصلاة من طينتة تربتة

انت ينام بيك المرتضى الكرار ... ابو الحسنين التلوذ الناس كلها بشارتة و بختة
و انت ينام بيك بكربلاء حسين .. الما بايع الطاغي و دنكـ ركبتة
و انت البيك ظلت شارة العباس ... لمن طاح دنكلة الفرات و باسة من شفتة

صح هسة اصبحت من وطن نيذر لاند ... هولندي الهوية و شعري جللتة
و صح تأقلمت وية الغرب فد نوب ... و صرت ماصخ مثلهم و الملح عفتة
و صح صرت ارطن رطنهم لمن يرطنون ... و لسان العرب بالاعجمي كسرتة
لكن مدري شنهي يصير بي لمن يمر طاريك ... احسنك دفو تموز وسط شتا
اثاريني مثل طبع النخل لو طال ... يرجع للاصول و تنحني شعفتة

العالم نسى يوم هدعش من ايلول ... صارت بيك سالفتة
ناس تكول لازم نحتويه و نشفط البترول ... و نعوض الراح و نسركـ بركتة
و ناس تكول لازم ها الحصار يدوم ... و ناس تكول لازم ننزع اسلحتة
و ناس تكول خطية اطفالة ماتو من الجوع ... و ناس تكول حيل ويا ، ما حمد ربة و شاكر نعمتة
و انت بين هذا و ذاك صاير شبج لليرمون ... و ياهو الكام ضدك سدد تفكَتة

جي انك حلو و الدول منة تغار ... ما عدهم العندك من مجد نلتة
انت اول وطن آدم وضع جدمة عليه و كال يا الله ... لنك وصلة من جنتة
و انت اول وطن حبّة النبي ابراهيم ... و دعا ربة يصونة برحمتة و عزتة
و انت اول وطن مرسى لسفينة نوح ... و النبي ايوب ناخت بيك راحلتة
و انت اول وطن علم العالم ابجدية و يكتب التاريخ و انت اول وطن قانون سننتة
و انت اول وطن كالتلة الشمس يمة صباح الخير ... و لو رادت تمسي تمسي يكم كَبتة
و انت اول وطن ما يشبه الاوطان ... مدري شلون خالقك ربك ، سبحان ربي شلون صورتة
صورتة العراق و بس علينة يلوكـ ... و احنة نلوكلة لمن يحل وكتة

مع تحياتي للجميع
الامير 2009

zaineb

13-02-2009, 05:34 AM

بسم الله الرحمان الرحيم
اللهم صلي على محمد وأل محمد
واللعنة على أول ظالم لهم وأخر ظالم لهم

أحسست أنه شعر راقي بكلماته دو اللهجة العراقية

برغم أني أستسمحكم أني ما إستطعت قراءته بالشكل الدي إستغرق منك الوقت في صياغة رونق كلماته
لأن ببساطة اللهجة العراقية لا تتقن معرفتي أدبياتها فإعدريني
أختي الفاظلة
لكن المهم أني إستمتعت وأنا أسرح بنظري حول الكلمات

التي صاغت روعة الوحدة الدي ينشدها كل حر أبي ;يرفض الطائفية في مجتمع أعلن للقاصي والداني أنه شعب ما يهزه تفجير ولا إرهاب

والتلاحم هو الغاية التي ينشدها الشعب العراقي بين كل شرائح مجتمعه وبكل طوائفه المتعددة كتعدد قوس قزح.
فتحياتي القلبية وكل إحترامي لكم و لأهل العراق الأباة
متمنيتا لكم المزيد من الإستمرارية موصول بالتوفيق
في مواضيع قادمة إن شا ء الله