الى حيدر من العراق ومرتضى العاملي

[البدري14]

اللهم صل على محمد وآل محمد
الموضوع ليس خاص ومن لديه حب المشاركه مرحب به لكن
انا مشكلتي انني اجتنب كتابة القريض لانه بحاجه وزن وقافيه
واعراب واموركثيره اتجنب بعضها واجهل البعض الاخر وبما
انني قد وجدت باصدقائي الاعزاء حيدر من العراق ومرتضى العاملي
المقدرة على ذلك احببت ان اشكي كلا منهما للاخر لاثير بينهم نوع
من المساجله الشعريه وكتبت هذه الابيات وبالطبع لا تخفى عليهم
فهم يملكون من الفراسه ما يكفي
------
التعليل
-----
فرق شفت بقوافيكم وقافي
الابوذيه سكن يمي وغافي
مدلل وبدلع يمشي وغافي
على ذراعي ويمشط الزلف بيه
----
وطبعا هذا يسمى المدور
------
رايي بالعاملي
------
نجم فصحى ويشيب الراس منه
القوافي جن زرعها نبت منه
انا ما اريد شحذه وعلي منه
اكتب مهنتي ولا يمن عليه
------
شكوى لحيدر وما لاقيت من العاملي
-----
سكبت اعبار البعيني وشلها
تعرفه العذب احوالي وشلها
شما ادفع جرف صادف وشلها
ابن الجبل اذاني اذيه
------
وهذه شكوى لمرتضى من حيدر
-----
اشكي لمرتضى حيدر وصبره
يصبرني على غلبي وصبره
جرعت الشري من حجيه وصبره
ساكت ما فزع للساع ليه
------
كتبت الموضوع متقصد بوقت متأخر من الليل
حتى اذا تصير عركه اكون استغرقت بالنوم
طابت اوقاتكم مع فارق التوقيت

تقبلوا وافر الدعاء
وترى هذه مبارة وديه لا تقولون الحجي
يسوي فتنه

[حيدرالناصري12]

والله أبوتركي أنت طلعت موشويه(( خطر ))؟؟؟؟؟
حبيبي البدري أنت أستاذي وأنا تلميذك الصغير
ومرتضى العاملي أستاذي وأنا تلميذه الصغير
وأنا أتعلم منكم صدقني
ولك فائق أحترامي وتقديري
خادمك
حيدر

[البدري14]

اللهم صل على محمد وآل محمد
الغالي ابو كرار
----
سن سيفك علي وازعل ورد لي
حاول تكتب بجهدك ورد لي
اذا شوك الدرب شفته ورد لي
احبكم والدرس الكم واليه
----
حاول مو صعب
----

[حيدرالناصري12]

حبيبي البدري
سبق وأن أبلغتك أني لاأميل الى الأبوذية ماأعرف من زمان
أما أنت فأستاذ بألابوذية
تقبل مروري
حيدر

[وجدي الجاف]

السلام عليكم .......
اعتذر على التطفل وأترخص من اخواني واساتذتي الشعراء فأقول لأخي البدري :-
البدري بالشعــــر شامخ - وعالي
ومن شعره العَطر عقلي - وعالي
يظل هالمرتفـــع صوتي - وعالي
أظل خادم إله صبح ومسية

مع خالص الاعتذار ......

[البدري14]

اللهم صل على محمد وآل محمد
عزيزي وحبيبي ابو كرار
يقول المثل ما على الخير شروط لكن تقدر ترد
بيت شعر بيت دارمي بيت منقول وانا مصر على
ان بيت السبع لايخلوا من العظام وما اقبل
اعتذار نريد نحرك وشوف طلع واحد ادري راح
يعجزني وتابعنا
-----

تقبل تحيات اخوك

[البدري14]

اللهم صل على محمد وآل محمد
حبيبي واستاذي
وجدي الجاف
-----
شرفني مرورك وحسن اخلاقك وطرقك الباب
للدخول معنا اعلم اخي نحن لا نهدف ان يثبت
احدنا انه اقدر من الاخر ولكن نهدف الى اثرا هذا
المنتدى المبارك بالتنويع وخدمة الرواد لنرضي
اغلب الاذواق لان رضى الناس غاية لا تدرك تكون
الابيات محصوره بين الديني والوجداني واتمنى ان
نوفق لوضع بصمه لنا
ولا بأس من الا بيات التى بها متنفس للطرافه
واول الطريق يبدا بخطوة
موفق
-----
هلا بالجاف واصله من ربيعه
ومره يبيع واشري ومره ابيعه
وانزله بفيضة مورده من ربيعه
الغرض نخدم العترة الفاطمية
----
وهذا بيت ابوذيه يراد له جواب
-----
ابد مو سهله وهانت على الله
لاكن لا يظن احـد علي الله
شنهي السهله وصعبه على الله
وبينه يا نديمي ذيج هيه
------

وانا بالانتظار
وادعي الكم

[مرتضى العاملي]

عشرتك روحي صــــدك .. ماتملها ........
( لاتملها)
وكلبي ايام سعــــدك .. ماتملها ..........
( لم يصل اليها)
اريد انصب لروحــــي .. ماتملها ..........
( مأتم لها)
واشوفك هم تجي وتبجي عليه ؟

اخي البدري لن تستطيع ان توقع بننا لانه اسمه واسمي واحد وحبه وحبي واحد وطريقي وطريقة واحد وانت البدر الذي اجمعنا نوره



أشتبي منا تسايلنه شكلنه
ورد جوري أبوسط جنة شكلنه
لوّن واحد عله حالك شكلنه
عصرنه الزلف وأعطيناه ميه

****
تحيااتي وتقدير ي لقلمك المبدع
انا احب البوذية العراقيه واحفظ الكثير منها ولم اكتبها

تحيااتي

[حيدرالناصري12]

أول شيء أقدم شكري وتقديري الى أخي العزيز مرتضى العاملي
على مشاعره النبيلة الولائية الحسينية أدامه الله

أما البدري المشاكس فأقول لك
أذا آنه أشتغل بالحديد وبالحام من الصبح لليل أشلون راح أجمع أفكاري وأردلك بس مع هذا كله ماراح أسكت عنك

فأليك هذا البيت الأن كتيته وأنا جالس على الجهاز

مــاعـاجـز لــون أكتـب وأردلك
ردت بس أجمع أوراقي وردلك
أنــه آلبالروح شـاتــلك وردلك
أبوتركي يضل غالي عليه

خادمكم
حيدر

[البدري14]

اللهم صل على محمد وآل محمد
حيدر
من هذا البيت تعرف شكثر احبك
-----
ابوس ايدك التهديلي وردها
وادري بظلما واتدلي وردها
وحق من آيته رجعت وردها
احبك لو تقطع سيوف بيه
----
تقبل وافر الدعاء
من قلب محب

[البدري14]

اللهم صل على محمد وآل محمد
مرتضى العاملي
الله لا يفرق بينكم وانتم بالنسبه الي مثل العينين
وحبي الكم يدفعني للتواصل معكم
وانته قلت بيت اشتبي منا
هذا هو الحل
---
سمر لو بيض يعجبني شكل جن
تزهن ما تقللي شكل جن
لون واحد على حالي شكل جن
طريح بشوقجن واصواب بيه
---
صدق مهما حاولتوا ما راح اترككم بحالكم
لو تقولون ابوذيه لو اتعلموني على
كتاباتكم واسرارها
انتوا طايحين على كنز اسرار المفردات يا اخي
علموني !!!

[حيدرالناصري12]

حبيبي أبو تركي
أشكرك على مشاعرك الصادق لاحرمنا الله منك

لديه أستفسار
ليكون واضع كتاب أبو أمعيشي أو تنقل منه أنريد من تأليفك ها

أخوك
حيدر

[الروح]

سلمت هذهِ الأقلام التي تشرقُ
بنسائم دجلة الندية,,
التي تهبُ من كلماتكم المكتظة,,
بروعة الأبوذية العراقي,,
تتبدد في حضوركم
الكلمات الملبدة بالحزن,,
ويُطِلُ الفرح من عينين وااااااسعتين,,
أساتذتنا ألأفاضل
الـــ بدري
حيدر
الـــ عاملي
سلمكم الله
اعذروا تواجدي بين فيضكم,,
أحببتُ ان اقول,,
كونوا بخير
لنكن

[البدري14]

اللهم صل على محمد وآل محمد
اختنا الفاضله
الشيرازيه
اسعدنا مرورك وانتي تدرين احنا العراقيين
لوسمعنا الهلهوله انبدع
وهذا شعور طيب من مواليه واخت عزيزه
دمتي محروسه بعين الزهراء

[البدري14]

اللهم صل على محمد وآل محمد
حيدر الغالي
اولا انا كتبت قبل فتره بيت ابوذيه اني ما اكتب
نقل عن احد واذا نقلت لا يمكن الا اكتب اسم
صاحب المنقول او من التراث
ثانيا - المكتوب يبين من عنوانه
ثالثا - انا لا املك من الكتب الادبيه الا كتاب للشعر
القريض بعنوان - اروع ما قيل في محمد صلوات الله
عليه وآل بيته
جمع محسن عقيل طبعة المحجة البيضاء
وابو معيشي اعرفه شاعر ابو اذيه من سوق الشيوخ
ولا احفظ له الابيت واحد بخصوص البطاقة التموينة
وهو يقول
ذيب الوكت يا صاحب غطانه
طحنا ابحر وابموجه غطانه
بعنا بغبة الجله غطانه
على جيس الطحين ونقص ميه
واذا اله ديوان مطبوع تسوي فضل اتدوره وترسله الي
والنسوان اليابن ابو معيشي يابن البدري وغيره اهواي
احسن من البدري
لا تفكر انا بهذا الحجي زعلان بس كاعد لوحدي واريد
ادوخ راسك وما صار سؤال قلته وابتليت الله يعينك
على هالصاحب اللغوة

[حيدرالناصري12]

الشكر الجزيل والثناء الذي لاينقطع الى// الأخت الشيرازية حفظكِ الرحمن
مشاركه جميلة اختي ونتشرف بحضوركِ المتميز
أسألكِ الدعاء...

[نور المستوحشين]

البدري ..حيدر ..العاملي

الثلاثي المبدع

كم يثلج صدري تواجدكم وابداعكم هذا فمنذ فترة لم نجد الحياة كما هي الآن لقسم الشعر

فمن هنا أشد على ايديكم واطالبكم بالمزيد

تحياااتي نور...

[حيدرالناصري12]

أختي الفاضلة/ نور

أذ كان كما تقولين أن وجودنا ساهم بشيء من الحياة في هذا القسم
فهذا يزيدنا شرفا سيدتي وفخرا وعزا أذ نكون خدام عترة المصطفى(ص) وخدام لكم أنتم الاعضاء في هذا المنتدى
نشكر لكِ أختي مرورك المميز
تقبلي تحياتي
حيدر

[حيدرالناصري12]

حبيبي البدري العزيز// أنت تاج على راسي وأتشرف أن أحمل هكذا تيجان



أما من ناحية النقل من أبو أمعيشي فذلك للملاطفه وأنا أعلم علم اليقين أن أبياتك من خيالك الشعري المتميز


ملاحظة/ هل تعرف أن أبو معيشي رجل ((أمي)) وهو فنان بالابوذية



نفسك عالوفه أمتازت وطيبه


وأنته الـدوه الجرحي وطيبه


وحق أحمد رسول الله وطيبه


أبذكركم كل صباح أوكل مسيه



خادمك المطيع


حيدر

[البدري14]

اللهم صل على محمد وآل محمد
استاذتي نور المستوحشين
نسأل الله القبول منا ومنكم فما قيمة جهدنا امام عطاء
اهل البيت الذين بذلوا مهجهم للدين ليوصلوا لنا ما نحن
به من نعم العبادة لله على سنة ابيهم المصطفى صلى الله
عليه وآله وسلم تسليما كثيرا
احسنت موفقه

[البدري14]

حبيبي البدري العزيز// أنت تاج على راسي وأتشرف أن أحمل هكذا تيجان




أما من ناحية النقل من أبو أمعيشي فذلك للملاطفه وأنا أعلم علم اليقين أن أبياتك من خيالك الشعري المتميز


ملاحظة/ هل تعرف أن أبو معيشي رجل ((أمي)) وهو فنان بالابوذية



نفسك عالوفه أمتازت وطيبه


وأنته الـدوه الجرحي وطيبه


وحق أحمد رسول الله وطيبه


أبذكركم كل صباح أوكل مسيه



خادمك المطيع



حيدر

اللهم صل على محمد وآل محمد
حيدر
----
وحق حسين وابن امه وجده
هزلكم ما امل منه وجده
سامح صاحبك ارشده وجده
احبك وانصدم من تشك بيه

اخوك ابو تركي