|
«•! 00 [ خـــوف مـن الحـب ] 00 !•»
مرت ايام العزا الثلاثه .. الكل حضر الا شخص واحد .. عايشه بعالم ثاني .. ولاهي داريه بالي حولها .. تصارع بعالمها ..تحاول تطلع منه وترجع للواقع .. بالاول صارعت الموت .. والحين تصارع هالعالم المجهول .. العالم الاسود المؤلم ... وبكل قوتها الباقيه عندها .. بس مافي فايده .. لازال السواد مخيم عليها .. مع انها احيانا تحس باحد حولها .. تسمع اصواتهم وكلامهم .. وتحاول .. وتحاول تتكلم معهم .. او تتحرك .. تعلمهم انها حاسه فيهم ... تحاول تركز تسمع ايش يقولون ... بعدين ترجع تغرق من جديد بالظلام .... وترجع مره ثانيه... هالمره ميزت صوت سارا .. وهي تكلم احد ... الي رد عليها .. حاولت تحرك ايدها باقصى قوتها .. فجاه سكت الصوت الي يرد على سارا شهد: سارا شوفي؟؟ اصبعها تحرك تو نوره طالعه من عندهم وبقت شهد وسارا .. ما كانوا يتروكون منيره الي كانت بغيبوبه من طلعت من العمليه من اسبوع .. فما كانوا يتركونها لحظه على امل انها تقوم .. ما يبونها تفتح عيونها ولا تشوف احد .. كانوا يتنابون عليها .. الا فوزيه طبعا الي كانت بحداد وما يصير تجي .. زارتها مرتين بس.. يوم تجلس معها رهف ومره سارا ومره نوره ... واحيانا عمر وعبدالعزيز .. الكل كان ملتف حولها ... سارا: انتى متاكده شهد: ايه والله شفتها .. ها شوفى ومعها حق .. شافت سارا ايد منيره ترتعش بعدين رجعت سكنت .. خلاص رجعت مره ثانيه للسواد والظلام المؤلم سارا: بروح انادي الممرضه .. انتى انتبهي عليها يمكن تقوم وقامت سارا بسرعه ونادت الممرضه الي جاو واخذوا منيره لغرفه الكشف .. عشان يكشفون عليها من اول وجديد.... دقت سارا على عبدالعزيز وقالت له .. وقا لها انه الحين جاي... شهد: اوكي سارا انا رايحه الحين سارا: خلك معي ؟؟ شهد: لا الحين زوجك بيجي ...الا تعالى متى بتجين للجامعه سارا: اتوقع هذا الاسبوع بجي شهد: ومنيره سارا: مادري والله .. عبدالعزيز وقف قيدها هذا الفصل.. وان شاءالله اذا تحسنت راح ترجع تداوم .. شهد: ان شاءالله .. يالله حبيبتى مع السلامه سارا: مع السلامه بعد فتره قليله من خروج شهد جا عبدالعزيز ... وجلس مع سارا ينتظرون منيره .. رجعوا منيره للغرفه .. وراح عبدالعزيز للطبيب ... عبدالعزيز: السلام عليكم دكتور الدكتور: وعلكيم السلام .. اهلا عبدالعزيز شخبارك عبدالعزيز: الحمد لله .. بشر دكتور الدكتور: والله مادري ايش اقول لك عبدالعزيز: ايش؟ الدكتور: عندي لك خبرين .. واحد منهم زين والثاني لا عبدالعزيز: قول لا تخوفنى الدكتور: اختك خلاص اجتازه مره الخطر .. وانشالله االيوم بتقوم من الغيبوبه .. كل الدلائل تدل انها خلاص بترجع لكم عبدالعزيز: الحمد لله .. انبسط كثير من هالخبر.. معنى كذا انها خلاص بترجع معهم للبيت .. وراح تستقر امورهم ويطمئن قلب امهم.. تذكر عبدالعزيز الخبر الثاني عبدالعزيز: والثاني ؟؟؟ الدكتور بارتباك: مو متاكدين الى الحين عبدالعزيز: ايش دكتور طمنى؟؟ الدكتور: واضح انها كانت مصابه بعامودها الفقري... وهالشي ما انتبهنا له اول ما جاتنا .. حطينا كل طاقتنا للنزيف .. وبعده الغيبوبه .. عبدالعزيز: والمعنى؟؟ الدكتور: العمود الفقرى مع كثره التنقل .. ولانه مصاب تضرر... راح تقوم اختك من الغيبوبه .. بس على كرسى عبدالعزيز: شلوووووووون .. الدكتور: قلت لك مو متاكدين بنسوي لها فحوصات اكثر .. عشان نتطمن عبدالعزيزصرخ : تو الناس تسوون هالفحوصات ... اليوم ابي انقل اختى من المستشفى الدكتور: مو زين تنقلها الحين عبدالعزيز بعصبيه: مالك دخل فاهم .. لو لا اهمالكم ما صار هالشي.. لا وتقول ببساطه الحين راح نجري لها باقي الفحوصات .. بعد ايش ..هاه عبدالعزيز ما اكان بوعيه .. منقهر من قلب فمو مثمن الكلام الي جالس يقوله .. شلون مستحيل .. اخته منيره ما تمشي ... وعشان ايش اهمال طبي .. لا ما يصير كل هذا يصير معها ... توها صغيره .. ووراها مستقبل .. حرام من جد حرام طلع من مكتب الطبيب وهو معصب على الاخر .. دخل وشاف اخته لازالت غارقه بعالمها ... وسارا جالسه جنبها وحاطه ايدها على جبهتها وتقرى قران .. اول ما حست سارا بدخول عبدالعزيز انهت الايه الي تقولها وراحت له ... سارا: هاه عبدالعزيز بشر عبدالعزيز كان مهموم للاخر : بتقوم .. بتقوم ان شاءالله .. يالله سارا خل نرجع البيت واضح انك تعبانه من الصبح وانتى هنا سارا: لا خلنى معها شوي ...يمكن تقوم عبدالعزيز: ماراح تقوم الحين .. يالله تعالى .. الحين ادق على عمر يجي لها .. سارا: طيب نجلس هنا لين يجي عمر ... عبدالعزيز تنهد وجلس بعد ما دق على عمر .. جا لهم بعد نص ساعه .. وجلس مع اخته ..اخذ عبدالعزيز حرمته ورجعوا للبيت ... |
«•! 00 [ خـــوف مـن الحـب ] 00 !•»
(الأخـــــــــــــيــر) (2) الفصل الحادي عشر الجزء الثاني طول الطريق وعبدالعزيز ساكت بالسياره .. صمته كان غريب.. اصابعه تلعب على الدراكسون(السّكان) سارا كانت تراقبه وهي مو عارفه ايش فيه .. وهو يسوق لف واحد قدامه .. شوي ويصدم فيه .. عصب عبدالعزيز وقام يسب ويلعن بصوت عالى ... من جد ناس ما عندهم سالفه ولا يحترمون الغير .. سارا تشوف رده فعله .. هذا ايش فيه متوتر .. المفروض يكون مبسوط لان منور تحسنت شوي .. فجاه جنب عبدالعزيز ووقف السياره بقوه .. الاشاره صارت حمرا وعبدالعزيز كان يسرع.. لو ما وقف كان صدم بالسياره الي قدامه .. وقوف عبدالعزيز المفاجئ خلا سارا تتقدم وترجع لمكانها بقوه .. عبدالعزيز : ولا كلمه لو سمحتى حست سارا انه مو طبيعي ... ولا حبت تضايقه .. امتثلت لامره ولا تكلمت ...واخيرا وصلوا للبيت بسلامه .. البيت كان هادى .. ومظلم في نفس الوقت .. مع ان الوقت مو متاخر كثير.. توها ما بعد تجي 8 .. دخلت سارا وعبدالعزيز وراحوا لغرفتهم .. وبطريقهم ما مروا باحد .. انسدحت سارا على السرير بتعب .. طول هالفتره الاخيره ما ارتاحت ابد .. كل يوم بالمستشفى عند منيره .. واذا رجعت البيت تجلس مع ام عمر ورهف .. غمضت عيونها وهي تسمع عبدالعزيز يدخل للحمام .. بعد فتره سمعت صوت الماي .. واضح انه ياخذ دش...ايش فيه عبدالعزيز .. يالله ايش قد احس انى تعبانه من كل شي.. مشتاقه لك يا منيره كثير .. من جد فقدتك هالفتره .. متى بتقومين لنا بالسلامه .. وترجعين للبيت وترجعين له البسمه الي غابت منه اول ما راح عمي سالم ... اااه عمي سالم .. الله يرحمك يالغالي .. مكانك كبير بيننا .. والفراغ الي خلفته مستحيل احد يسده .. انقطع صوت الماي ... وانفتح الباب .. فتحت سارا عين وحده وراقبت عبدالعزيز .. كان لاف المنشفه على خصره .. وشعره لازال مبلل.. والمنشفه الصغيره محطوطه على كتفه وقاعد يمسح وجهه فيها .. واضح انه توه بعد حالق .. راح لعند التسريحه وقرب وجهه .. وهو يتامل خده الي كان منجرح من موس الحلاقه .. صوره سارا منعكسه بالمرايا قباله وهي جالسه على السرير .. طاحت عينها بعينه .. سارا: عبدالعزيز ماقلت لى ايش قال لك الدكتور لاحظ تغير ملامحه الى ما استمر الا ثانيتين .. اعتدل بوقفته وهو يمسح على الجرح بخده .. عبدالعزيز: قلت لك .. وراح لعند الدولاب عشان يبدل .. سارا: قلت انها بتقوم ... بس انت طولت عنده عبدالعزيز يغير الموضوع: وينهي امي ورهف سارا: مادري ما شفتهم عبدالعزيز: روحي شوفيهم .. فهمت سار ا انه ما يبي يتكلم عن الموضوع واحترمت رايهه .. طلعت من الغرفه .. تبي تعرف وين اهل البيت .. دخلت غرفه رهف ما شافتها .. نزلت تحت ونادت الخدامه سالتها قالت لها ان ام عمر بغرفتها ترتاح اما رهف فهي بالحديقه ... راحت سارا للحديقه برى البيت.. طلعت من الباب الزجاج من غير ما تحس فيها رهف .. شافتها جالسه على كرسي وعيونه متعلقه بحركه الماي الخفيفه بالبركه .. لاحظت عليها اثار دموع .. وشافتها ماسكه شي بايدها بقوه .. حست ان رهف ما تبي احد يشوفها الحين وهي بهذا الوضع .. فرجعت لوين ماكانت ... ودخلت للبيت .. حبت تمر تشوف ام عمر.. كانت غرفتها مظلمه .. اكيد نايمه او شي .. صعدت فوق لغرفتها ... كان عبدالعزيز جالس على الكنب الي بالغرفه .. لاحظت سارا سرحانه الي خلاه ما يلاحظ دخولها.. الصوت الي صدر من الباب وهي تسكره صحى عزيز من سرحانه .. طرف بعيونه وسالها عبدالعزيز: وينهم؟؟ راحت سارا لعند النافذه ووقفت تشوف المنظر الي تطل عليه .. تشوف رهف الي لازالت جالسه بمكانها .. كان ظهرها لعبدالعزيز .. خلقها ضايق.. والكابه مخيمه عليها وعلى البيت كله ... سارا: بالبيت .. رهف بالحديقه وامك بغرفتها.. مارد عليها عبدالعزيز .. سارا ما كانت تنتظر رد .. كان شاغلها موضوع واحد .. منيره .. هي متاكده ان صديقتها فيها شي.. بس عبدالعزيز مو راضى يقول .. ليه ياربي ليه ما يبي يقول لى ايش فيها منيره .. كان ودها تساله .. بس خافت يغير الموضوع مثل اول مره .. سارا: عبدالعزيز عبدالعزيز: نعم... سارا لازال ظهرها له وتشوف رهف : ممكن اعرف ايش قال لك الطبيب؟؟؟؟؟؟؟ بعد فتره صمت طويله: قلت لك مافي شي التفت سارا له وقالت بكل حزم: الا في شي... قلبي يقول لى انه فيه وانت مخبي علي قام عبدالعزيز يشوفها وهو مقطب حواجبه .. سارا: شفت .. واضح ان فيه شي.. ليه ما تقولى؟؟ عبدالعزيز بضيق: وليه تضيقين صدرك انتى بعد اكثر من كذا؟ ارتسم الخوف على ملامح سارا .. يعنى ظنى صحيح فيه شي صاير وعبدالعزيز مو راضي يقوله .. سارا : لا تخوفنى عزيز..ايش صاير .. عيونه بعيونها .. وبكل هدوء قال: احتمال كبير منيره ما تمشيي.. بحركه غير اراديه امتدت ايد سارا لعند فمها تمنع شهقه كانت على وشك الخروج .. عيونها امتلأت دموع سارا بصوت يتاتا: ايش تقووول؟؟ يوم شاف عبدالعزيز تقلب وجهه سارا حاول يهديها شوي عبدالعزيز: مو اكيد .. نزلت الدموع من عيون سارا وبصوت كله صياح: ياربي .. ايش هذا الي يصير لنا.. ليه منيره بالذات .. لييه ..عبداالعزيز.. ايش بتسوي؟؟ عبدالعزيز: ايش اسوي .. مافي يدي شي.. والله مادري .. مادري ايش اقول لها .. مادري ايش بيكون فعلها اذا افاقت .. اعلمها عن ابوي والا عن تشوهها وشللها .. والا خطيبها النذل.. سارا: طلال عبدالعزيز بانفعال: ايه طلال النذل الخسيس.. ما شفنا وجهه الا بيوم العزا ولا سال عن منيره ولا شي .. ماكانها المفروض الحين تكون زوجته .. سارا: يمكن خاف يسال عبدالعزيز بسخريه: سارا تتطنزين والا ايش .. سارا: يووه .. حرام منور.. والله ما تستاهلين .. عبدالعزيز: خلاص سارا لا تصحين .. مو ناقصك انتى بعد.. سارا بصياح: شلون ما تبينى اصيح بعد الي سمعته .. هذي منور .. مو بس صديقتى..انت تعرف شلون يعنى تتشوهه .. منيره فنانه مرهفه احاسيسها .. تعشق الجمال .. شلون تنحرم منه .. لا مو بس جمالها .. حتى المشي ما تمشي .. عبدالعزيز بتعب: طيب سارا خلاص لا تعذبينى اكثر من كذا.. انا تعبت .. وادري بحالة منيره .. اشوف اختى يضيع مستقبلها قدامي ولا اعرف ايش اسوي .. ورهف مثل الشمعه الي انطفت من بعد الي صار .. وعمر جاطل الشركه ولا يداوم .. كل شي طايح فوق راسي.. حاله منيره اعرفها اول باول .. سرت اكره اشوف وجهه الدكتور .. كل خبر يقوله مثل طعنه السكين .. وامي من جهه .. امي الي تحطمت .. الحزن في وجهها .. احاول امسحه مو قادر .. عمر ترك كل شي فوق راسي والتفت على نفسه .. ابوي راح .. ابوي راح وتركنى .. ترك المسؤوليه علينا .. راح وحنا لازلنا محتاجين له .. مابعد نشبع منه .. ما زلنا نحتاجه .. بس هو خلاص راح ..راااااح.. جمدت سارا بمكانها في لحظه انفجار عبدالعزيز .. هو الوحيد الي كان متماسك بينهم طول الايام الماضيه .. الوحيد الي ما فاضت منه دمعه .. ولا رمش له جفن .. هو القوى بينهم .. الجبل الشامخ في وسطهم .. ينهار فجاه .. عيونه كانت تلمع .. وايده ترجف.. شفته ترتعش وهو يتكلم .. ما قدرت سارا تظل بمكانها .. وهو بنص كلامه اسرعت له .. ضمته لصدرها .. ولانه جالس وهي واقفه .. اخذت راسه وحطته بصدرها .. وبعكس ما كانت تتوقع .. ماجمد او بعدها .. بالعكس.. التفت اذرعه على خصر سارا وقربها منه .. وقام يصيح .. طلع كل الي كان بقلبه ومخبيه طول الوقت .. الكل كان يظن ان عبدالعزيز اقل واحد متاثر .. وانه مستحيل يضعف ... او يطلع ضعفه لاحد .. بس خلاص هالشي انتهى .. عبدالعزيز وهو يشد سارا له وبصوت غريب يقطع القلب: محتاج له سارا.. ومشتاق له اكثر .. انا تعبان.. هلكان تعب .. اخذت سارا تمرر ايدها على شعر عبدالعزيز .. والدموع تنزل على خدودها .. الله يا عبدالعزيز ليه ما عبرت عن نفسك اول .. الصياح ماهو عيب ولا ضعف .. بالعكس هو راحه يحتاجها اقوى الناس ... سارا: انا جنبك .. وبظل جنبك على طول حبيبي... |
«•! 00 [ خـــوف مـن الحـب ] 00 !•»
تو الدموع بتجف على خدها الا ترجع تتبلل مره ثانيه بدمعه .. ازداد تحرك اغصان الاشجار الي تحيطها .. وبهبت هوى قويه طاحت ورقه ..طارت بالجو .. وحطت اخيرا على سطح الماي.. قامت تتراقص مع الامواج الصغيره .. الهوا زاد .. وزاد معه تحرك شعرها .. خصله كبيره طاحت على وجهها.. وتبللت من دموعه ... عيونها انتقلت من الورقه الي بالبركه للبرواز بايدها السليمه ... ظلت تتامل وجهه السمح .. وتذكر احلى اللحظات معه ..مررت اصبح مرتجف على زجاج الفريم .. كان بارد مرره .. امتص بروده الجو الي زادت مع زياده الهوى .. هالشي ماكان مضايق رهف .. اهم شي عندها انها تجلس هنا وتذكره .. تذكر كل لحظه معه .. وصلت افكارها لاخر مره شافته .. ضغطت على البرواز بقوه لدرجه شوي وينكسر بايدها .. اخر مشهد قام يتكرر ..اخر كلمات .. سمعت صوت وراها .. التفت شافت ماريا واقفه ... رهف بصوت متغير: نعم ماريا: انا في سوي مكرونه انته في حوبي ... رهف: مابي ..مو جايعه ماريا وهي تقرب: ما يصير كدا.. انته مافي اكل .. رهف: قلت لك مابي ماريا: ليه بعدين في صير تعبان .. كله في بيت مافي اكل .. مدام فوزيه ما تبين .. وانته ماتبين .. وكله رهف انتبهت .. امي .. الا وينها الحين .. ابوي وصانى عليها باخر شي قاله .. اخر كلمه نطقها امك .. وانا جالسه هنا وغرقانه بحزنى وناسيتها ... قامت من الكرسي رهف: وين امي؟؟؟ ماريا: في غرفه .. مافي اطلع اليوم دخلت رهف من غير ما تنتظر الخدامه .. وهي تشد الصوره لصدرها وتضمها .. راحت لعند غرفة امها .. شافت النور مطفى .. طقت الباب بشويش... سمعت صوت امها واطي .. ومع انها مافهمت ايش قالت فتحت الباب .. شافت امها جالسه على السرير وفاتحه نور الابجوره الي على الطاوله بجنبها .. وبايدها مصحف .. وجهها شاحب .. وكانها اكبر من عمرها بعشر السنين .. لافه شيله على راسها .. ولابسه جلابيه مو باين منها الا القسم العلوي.. والباقي مخبى تحت البطانيه مع رجولها .. انهت الايه الي كانت تقراها ورفعت عيونها .. شافت رهف واقفه عند الباب بتردد ... ابتسمت فوزيه.. واشرت لها تجي جنبها .. وكان رهف ما صدقت تلاقي دعوه من امها .. ركضت لعند السرير وانسدحت بجنب امها .. دفنت راسها بحضنها ... وايد فوزيه تربت على ظهر رهف .. ورجعت تكمل قراه قران بصوت عالى ... وعلى نبره صوتها نامت بنتها .... |
«•! 00 [ خـــوف مـن الحـب ] 00 !•»
ماسك الجوال يشوف الصور الي حافظهم .. يحاول يقتل الوقت .. توه مسكر من عند نوره بعد ما تطمن على بنته .. من اول ما توفى ابوه ومي في بيت نوره .. ما حبوا يخلونها تعيش الاجواء الي كانت سايده في البيت .. ولان اهل امها الله يرحمها بعاد وغير ان مي مو متعوده عليهم اخذتها نوره لعندها ... طمنته نوره عليها .. بس قالت له ان مي خلاص مو قادره تصبر وتبي ترجع البيت .. قال لها عمر راح ياخذها من المدرسه ويمر عليهم ياخذ ملابسها ويرجعها للبيت ... وهذا له ساعات من جلس بجنب منيره ..ينتظر اقل اشاره منها .. كل الي صدر .. حركه طفيفه بايدها .. بعد مرور نص ساعه سمع صوت منها .. التفت عليها شاف عيونها تتحرك .. وجهها كان لازال ملفوف بسبب الجروح الي فيه .. انفتحت العيون ببطئ .. اول ما شافها عمر .. قام وقرب منها .. عمر : منيره.. وبكل صعوبه انتقلت النظرات له .. شافت اخوها يشوفها بقلق وعيونه مليانه فرح بنفس الوقت .. حاولت تتكلم واتقول شي.. بس حلقها جاف وتحس بحرقان فيه .. فكتفت بالابتسامه عشان تطمن اخوها ... وكانت الابتسامه مجهود كبيره .. كلفها كل طاقتها .. وخلاها تسكر عيونها مره ثانيه بتعب .. بعد ما ريحت اخوها شوي ... ما ماامدى عمر يفرح فيها الا رجعت لحالها .. خاف عمر .. وطلع نادى الممرضه يسالها .. جات الممرضه وطمنته وقالت له ان الطبيب المناوب الليله راح يمر ...فرجع عمر لمكانه ... بعد شوي دخل الطبيب الي كان مصري .. الطبيب : سلام عليكم قام عمر ورد السلام ... شرح له عمر كيف قامت ورجعت مره ثانيه فقدت الوعي.. الطبيب: لا ماتخفش.. انت ألأن كده ليه .. دي هيه نايمه مش في غيبوبه عمر: بس دكتور شلون تنام بعد ما كانت طول هالاسبوع فاقده الوعي.. الطبيب: انت ناسي انها عيانه .. دي تعبانه ومحتاقه للراحه ... وراح يفحص عليها .. الطبيب: لا دي عال العال .. بكره الصبح حتكون مفتحه زي الفل عمر: يعنى ماراح تقوم الليله الطبيب: ماظنش... ماتعبش حالك وتبات هنا.... روح لبيتك وريح .. مراتك مش حتطير .. عمر: اختى .. مو زوجتى وهو يشوف عمر كيف متلعوز وواضح انه تعبان الطبيب: انته روح ماتشيلش هم.. عمر: اكيد دكتور مو قايمه.. الطبيب: حتى لو بتؤوم بترقع بسورعه تنام .. انت روح بس.. صدأنى عمر: اوكي دكتور مشكور... راح الدكتور بعد ما تطمن عمر .. قرب عمر من عند منيره .. وشافها غرقانه بنومها مثل الملاك .. باسها على جبهتها وعدل البطانيه حولها .. ورجع لبيته يرتاح ... .............................. ....... من اول ما بدى اليوم الثاني ما داومت سارا ورهف .. راحوا لمنيره بالمستشفى.. وبعد فتره من وصولهم افاقت منيره .. كانت تعبانه و بعيونها الف سؤال ..كلموها .. حاولوا يريحونها .. منيره بصوت هامس بالموت ينسمع: ايش صاير؟؟ رهف جالسه على الكرسي البعيد .. ولاهي قادره تحط عينها بعين اختها عشان ما تعرف شي.. اما سارا ما قدرت تجلس فواقفه فوق راس منيره ... سارا: ارتاحي انتى ولا تتكلمين .. مررت منيره لسانها على شفتها ترطبهم .. هالحركه كلفتها .. حاسه بالم في خدها وجبهتها .. وراسها شوي ينفجر .. منيره بتعب: راسي يعورنى سارا: قلت لك ارتاحي لا تتكلمين ... هزت راسها بصمت ورجعت سكرت عيونها بتعب ..التفتت سارا لرهف .. سارا تهمس: ايش نقول لها.. اكتفت رهف بدمعه رد على سارا .. دخلت الممرضه تسال عن منيره وتبلغهم انهم راح ياخذوها بعد شوي عشان يكملون فحوصات ... سحبوا سرير منيره ومعه قلب سارا .. الي كانت عارفه كل شي.. وتنتظر نتيجه الفحص عشان يتطمن قلبها .. عبدالعزيز اول ما وصلها المستشفى قال لها اول ما تقوم منيره وياخذونها للفحص تدق عليه عشان يجي .. فهذا الي صار .. طلعت منيره من جهه وسارا دقت على عبدالعزيز من جهه ثانيه ... ........................ عمر اخذ بنته من عند اخته .. طول الطريق للمدرسه كانت صامته ومو متكلمه .. وهالشي غريب عنها هالايام .. خصوصا انها الفتره الاخيره صارت متفتحه ومشرقه اكثر .. بعد ما نزلها للمدرسه راح للشركه الي كان منقطع عنها ...اول ما دخل لمكتبه .. وقف سكرتيره على وحياهه... علي: االسلام عليكم استاذ عمر ... عمر: وعليكم السلام ورحمة الله وبركاته.. وتوه داخل لمكتبه .. وقفه على علي: استاذ.. التفت عليه عمر: نعم علي: عمي صالح طالب منى اول ما تجي للمكتب تروح له .. عمر وهو عاقد حواجبه: ليه؟؟ على:مادري والله .. بس هو مره محرصنى.. عمر: غريبه.. اوكي علي انا رايح له .. مشكور اخوي علي: ماسوينا الا الواجب... مادخل عمر مكتبه وراح توجهه للقسم الرئيسي بالشركه .. غريبه ايش يبي منى العم صالح.. لو يبي منى شي ليه ما دق علي.. ليه انتظر اجي للشركه.. انشالله ما يكون شي كبير .. الله يستر بس.. قبل لا يوصل مكتب صالح من من عند مكتب ابوه .. حس بغصه بحلقه .. كان الباب مسكر والنور مو مفتوح .. تنهد وكمل طريقه .. قال للسكرتير حق صالح انه بيدخل .. السكرتير: اصلا هو قايل اول ما تجي تدخل على طول رفع عمر حاجبه باستغراب ودق باب المكتب .. سمع صوت صالح صالح: تفضل.. فتح الباب بترقب وشاف عمه جالس ورى المكتب وهو لابس نظاره القراءه ومستمر في تفحص شي بايده بكل تركيز.. صالح: ارسل محمد الحسابات الي طلبتها .. عمر: السلام عليكم عمي رفع صالح راسه وابتسم لعمر صالح: اعذرنى يالغالي على بالي انك جمال سكرتيري..تفضل اجلس عمر وهو يجلس على الكنب الي قبال المكتب: قالوا لى انك طالبنى صالح: ايه... عمر: خير عمي .. صاير بالشركه شي صالح بعتب: بالاول ابي اعرف ليه ما داومت هالفتره الاخيره نزل عمر راسه : انت ادرى بالحال صالح: ولو مو عذر .. بس انا هالمره مسامحك وبمشى الموضوع .. اخوك عبدالعزيز ما قصر قام بشغله وبشغلك .. عمر: السموحه صالح: حصل خير.. انا مقدر الظروف.. مو انت بس الي مالك خلق للشغل .. هالمكان من غير المرحوم ما يسوى شي.. بس مهما كان المفروض ما نضعف .. عمر: ادري .. بس ماكان هالشي بايدي .. ما اتخيل ادخل هنا ولا اشوف الوالد.. صالح: الله يرحمه ... عمر: امين.. بعد لحظه صمت الكل سرح بافكاره بنفس الشخص.. عمر: الا ايش بغيت منى ؟؟ صالح: ما بي منك الا انك تمسك مكان ابوك بالشركه عمر: شلون .. محمد احق منى بهالمكان صالح: لا هذا حلالكم مو حلال محمد .. عمر: بس خبرة محمد اكثر منى صالح: ماعليك من محمد .. انا ابيك انت الى تشيل مكان ابوك .. عمر: ومكانى مين فيه؟ صالح: سلمان على وجهه تخرج .. وانشالله بيشتغل هنا .. ومع الوقت بيمسك مكانك عمر: والله مادري ايش اقول ياعم صالح: قول تم وريح قلبي .. عمر: انشالله ... |
بعد ما جا عبدالعزيز للمستشفى ورجعوا منيره للغرفه .. راح للطبيب وتاكد من الخبر .. تلقت منيره ضربه قويه على عامودها الفقري .. ادري الى كسر فيه .. وبسبب حالتها ووضعها بالسياره وصعوبه خروجها .. ماراعى المسعفين ظهرها .. غير تركيز المستشفى على حاله النزيف الداخلى براسها ومحاولة اسعافها .. كل هالامور خلتهم ما ينتبهون لظهرها ولعاموها .. ولا يراعونها في التنقل والشيل .. وهالشي ادى الى انقطاع الحبل الشوكي .. وبالتالى عدم قدرتها على المشى .. واحتمال رجوعها مستحيل .. حتى لو ارسلت لاحسن المستشفيات بالعالم ولالمانيا وغيرها.. ماراح ينفع .. انتشر الخبر هذا بالبيت .. وعرفه الكل الا صاحبه الشان .. الى كانت تفيق بين فتره وفتره .. بس ماكانت تجمع وتعرف ايش يصير بالضبط حولها .. بكت فوزيه الحاله الى وصلت لها بنتها .. واصرت تروح للمستشفى وتجلس جنبها ... وطول هالوقت ماعرفت منيره عن وفاة ابوها ... على صوت الشيخ سعد الغامدي من المسجل الموجود بالغرفه بمستشفى المانع العام بعد نقل منيره له ... كانت جالسه فوزيه .. انتبهت منيره وقامت .. اول ما التفت وشافت امها ابتسمت .. كانت المره الاولى الي تشوفها من بعد الحادث .. جالسه على الكرسى وهي مغمضه عيونها وراسها نازل على صدرها .. واضح عليها الارهاق .. منيره بصوت واطي: يمه سمعت فوزيه بنتها وانتبهت من نومها .. عدلت نفسها وقامت فوزيه: هلا بعيونى .. شخبارك الحين منيره: احسن .. من متى وانتى هنا فوزيه: من فتره .. تبين شي .. تبين ماي .. منيره بتعب : لا.. كم الساعه؟؟ فوزيه: توها عشر الصبح .. امس كل اخوانك كانوا هنا .. بس الحين الكل بدوامه وشغله بلعت منيره ريقها بصعوبه منيره: كم لى وانا بالمستشفى؟ فوزيه: اسبوعين حبيبتى.. منيره: وابوي ورهف .. صار فيهم شي .. فوزيه وهي تحاول تتمالك نفسها: كلهم مرتاحين .. المهم انتى الحين منيره بابتسامه باهته: انا زينه .. بس هاللفاف بوجهي مزعجنى..وراسي شوي يالمنى فوزيه: بيخف مع الوقت .. انتى لا تحاتين وارتاحي الحين .. منيره: طيب بس اذا جا ابوي والا اخوانى او سارا قومينى ..ز فوزيه بحزن: ان شاء الله .......................... توه طالع من البيت .. مر من عند الصاله الا سمع احد يناديه ام خالد: طلال دخل لعند امه شافها جالسه... طلال وهو واقف عند الباب: هلا يمه بغيتي شي ام خالد: وين رايح طلال: عندي مشوار ام خالد وهي تبتسم وتربت على المكان بجنبها: تعال يا ولدي عندي لك بشاره طلال : خير قولى ام خالد: بالاول تعال اجلس راح طلا ل لعند امه وجلس جنبها: ها يمه .. بشرينى ام خالد وهي تبتسم: افاقت خطيبتك ... مبروك يا ولدي طلال: الله يبارك فيك ام خالد: يووه ايش فيك تقولها من غير نفس ...انت كنت تدري قبل؟؟ طلال: ايه يمه.. قال لى احمد ولد عمي ام خالد: وليه مو فرحان .. طلال: ليه انتى ما تدرين ؟؟ ام خالد وهي معقده حواجبها: مادري بايش؟؟ طلال: انها مابتمشي ام خالد: واذا.. طلال وهو يقوم: ايش يمه واذا .. ليكون على بالكم انى بتزوج وحده معاقه ام خالد: انت ايش تقول .. تبي تهد البنت الحين طلال: يمه ما صار بيننا شي ولا حتى كتب كتاب .. ايه بفصخ الخطوبه ام خالد: طلالوووه .. حرام عليك البنت مالها احد انت ايش تقول طلال: بذمتك يمه من جدك تتكلمين تبينى اربط نفسي مع انسانه معاقه .. ليه ناقص انا شقى عشان ادوره لنفسي ام خالد: بس هذي منيره .. واذا مشلوله .. طلال: انا مو مصدق الي تقولينه يمه ... على بالي انك انتى الي بتطلبين منى اهد كل شي ام خالد: ياولدي الشلل مو عيب طلال: الا عيب .. انا ما اتمنى لها الشر.. بالعكس الله يشافيها ويوفقها بحياتها بس مع شخص غيري ام خالد: وين الي كنت ميت عليها ومختارها بنفسك طلال: وانا ايش درانى انها بتصير كذا .. لا وبعد يقولون وجهها مجروح يعنى مو كافي انها مشلوله مشوهه بعد ام خالد بعصبيه: طلااااااال طلال: ما اتشمت يمه .. بس هذي الحقيقه ام خالد: انت مافي قلبك رحمه .. تراهى ضعيفه وتو ميت ابوها والمصايب ايش كثرها فوق راسها وراس اهلها .. وين اودي وجهي منهم واقول لهم ولدي عاف بنتكم طلال: يمه حرام عليك تبينى اشقى نفسي واسجنها مع بنتهم ام خالد: لو وحده من خواتك ايش بيكون تصرفك مع خطيبها اذا هدها طلال: لا تفاولين عليهم يمه ام خالد: طيب ما تفكر فيها .. والا على بالك بنات الناس لعبه.. طلال: وانا الحين لعبت فيها.. من حقي انى ارفضها مثل ماهو من حقها انها ترفضنى ام خالد : لا تسوي فيها كذا طلال.. فوزيه ما تستاهل الي جاها .. يالله ابيك تاخذنى بالمستشفى نزورهم وتطمن عليهم .. طلال: يييمه ام خالد: مصمه ووجع .. فصخ خطوبه مافي ... والبنت بتتزوجها يعنى بتتزوجها طلال: السالفه عناد ام خالد: مو عناد .. بس قسم بالله يا طلال لو تركت البنت بهالحاله لا انا امك ولا اعرفك طلال: حرام عليك يمه والله حرام.. انتى الحين مثل القاضي الي يحكم علي بالسجن ام خالد: أي قاضي واي خرابيط .. شوف انا ما اقول اربط نفسك معها ... كل الي سوه اشفق عليها .. لا تتركها بهالحال ومافي احد يمكن يقبل فيها .. انت تزوجها واذا ما ارتحت معها او شي.. تزوج فوقها لو تطق الثلاث ما يهم .. المهم انك ما تتركها طلال: يعنى عادي لو تزوجت عليها ام خالد: المهم ما تتركها .. والله ما يستاهلون ومو ناقصينك انت بعد طلال: يصير خير يمه يصير خير ما قدروا يتهربون من اسئله منيره عن ابوها اكثر من كذا ... فاضطروا يبلغونها مع انهم حاولوا ينقلون لها الخبر بابسط واسهل طريقه ممكنه....... تقبلت الخبر بشجاعه غير متوقعه .. بسبب ايمانها القوي بالله تغلبت على الي هي فيه .. بكت ابوها .. وحزنت لفراقه .... اما شللها كان عندها امل كبير انها لو راحت للرياض راح تقدر تمشى من جديد .. ارسلوا اوراق منيره لمستشفى التخصصي بالرياض وبعد اسبوع نقلوها له .. راح معها عبدالعزيز .. عمر كان ناوي يروح معها .. بس من اول ما اخذ مي من بيت نوره وشاف حال بنته كيف .. ماقدر يتركها ... مي ما قدرت تتقبل موت جدها بسهوله .. غير فقد عمتها الي ما شافتها من يوم الحادث.. ما اخذوا مي للمستشفى تزور منيره عشان سوء حالة منيره ... رجعت مي لقوقعتها بعد ما طلعت منها الفتره الاخير .. فما قدر عمر يروح و يترك مي .. ولا يقدر ياخذها وهي لازالت تروح للمدرسه غير شغل الشركه الي فوق راسه واخذه لمكان ابوه ..... اما رهف كان ودها تروح مع اختها للرياض .. بس اخوها ما رضى لها واجبرها تكمل دوام بالجامعه .. ونفس الشي مع سارا.. فوزيه الي ما تقدر تطلع من البيت ولا تروح او تجي الا بعد اربع شهور ومرور العده ... ............... |
لا تكملين ما نريد نعرف النهاية
خخخخخخخخخخخخخخخخخخخخخخخخخخخ |
يووووووووو
كمليييييييييييييي |
«•! 00 [ خـــوف مـن الحـب ] 00 !•»
لان الوقت مبكر وتوها الساعه 6 الصبح ما كان احد بالبيت قايم ..دخل له و قام يصرخ وينادي اهله ... قامت لطيفه وصالح بفزع .. موقف موت سالم تكرر لهم .. الله يستر من اخبار الساعه 6 الفجر ... نزل صالح من الدرج وهو اقرب للجري من المشي .. وقابله وجهه ولده عبدالله البشوش... صالح: خير ايش صاير .. عبدالله: استوعب انه خرع وخوف اهله : لا ابد لا تخافون .. وهو يشوف امه خايفه من الي بتسمعه عبدالله: بس حبيت ابشركم .. مها ولدت الليوم جلس صالح على الدرج يريح .. كان مرره خايف .. وما حس انه قادر يوقف لطيفه: الحمد لله على السلامه .. ليه ما دقيت .. خوفتنى عبدالله: ما كان قصدي .. انا جاي اخذ اشياء لمها ما امداها تاخذها .. وقلت ابشركم... اسف يبه مو ناوي اخوفك صالح: حصل خير .. حصل خير ... الف مبروك ولدي عبدالله بفرح: الله يبارك فيك يبه صالح: طالبك عبدالله ولا تردنى .. ابيك تسميه سالم عبدالله: صدقنى يبه من غير ما تقول .. بس مها جابت بنت مو ولد .. صالح: الحمد لله على كل حال .. والف مبروك عبدالله وهو مو مصدق نفسه خوفه هالمره على مها اكثر من المره الاولى .. بسبب صعوبه هالحمل .. فما صدق اول ما قال له الدكتور ان الولاده صارت بصوره سهله ماكانوا يتوقعونها .. الحمد لله يارب على النعمه ... .......................... |
«•! 00 [ خـــوف مـن الحـب ] 00 !•»
كل التقارير ونتايج الفحوصات اطفات بقايا الامل في رجوع منيره للمشى .. ووجودها بالمستشفى ماله داعي .. الا بسبب جروح وجهها الي يبي لها عدة عمليات عشان ترجع مثل اول .. كان في خدها الايمن شق كبير يمتد من طرف فمها الى اذنها .. غير شقوق صغيره في جبهتها ..كانوا بارزين ولونهم احمر ... بس الدكتور طمن عبدالعزيز وقال له انه بعد عمليات التجميل بتختفى تقريبا ...رجعت منيره للخبر بعد ما حددوا موعد عمليتها بعد اسبوع ... البيت كانوا مجهزينه لاستقبالها .. بعد ما حطوا كل التسهيلات الي تناسب وضعها الجديد .. ولان بيتهم كبير .. فما يضره ان يكون فيه مصعد .. وعشان يحسسون منيره انها لها صله بالطابق الفوقي.. ولا يحرمونها من غرفتها .. قام الشغل على اساس يحطون مصعد .. وبهالوقت الحالى لين ما يخلص المصعد (اسنسير) فضوا لها غرفه تحت .. وخلوها غرفتها مؤقت الكل كان في استقبال منيره وعبدالعزيز بعد غياب اسبوعين ونص ...طول ذيك الفتره راحت سارا لهم في كل ويك اند ... رهف كانت ناويه تروح معها ويوم عرفت ان سلمان هو الي بياخذ سارا هونت .. وفضلت تجلس مع امها .. بعد ما جهزوا البيت لمنور كان هذي اول مره تدخله .. بس مو على رجولها ... وقفت السياره قدام الباب .. ونزل عبدالعزيز كان مسويها مفاجاه ولا قال لاهله عن وصولهم .. طلب من السواق يجي للمطار ويستقبلهم .. السواق فتح شنطه السياره وطلع الكرسي المتحرك .. اخذه منه عبدالعزيز وحطه عند باب منور .. وفتح لها الباب .. ساعدها انها تجلس عليه .. ابتسمت له منور بشكر .. وتو عبدالعزيز بيدفع الكرسي منيره: لا عزيز انا الي بحركه؟؟ وشافته بنظره توسل.. عبدالعزيز: اذا هالشي يريحك.. هزت منيره راسها وحطت ايدها المرتجفه على العجلات وحركتهم .. وعبدالعزيز يمشي جنبها ومستعد باي لحظه يساعدها .. قل اللفاف على وجهه منور الا قطعه بيضه على خدها اليمين و3 قطع صغيره على جبهتها .. يخفون الجروح الي لازالت معلمه وبارزه بشكل بشع ...فتح عبدالعزيز لاخته الباب ودخلوا للبيت .. ومنيره تدفع كرسيها ... كانت فوزيه جالسه بغرفتها.. الوقت توه العصر والي في البيت ياخذون قيلوله يريحون فيها ... دخلت منيره للصاله منيره وهي ترفع راسها تشوف اخوها: وينهم؟؟؟ عبدالعزيز: مادري خل اشوفهم لك .. راح عند الدرج .. ونادى الخدامه يسالها .. اذا كانت امه نايمه او لا عشان ما يزعجها .. وهو يكلم ماريا كانت سارا بالطابق الفوقى بتروح لغرفه رهف عشان تخليها تروح معها لبيت خالة سارا يزورونهم... سمعت صوت عبدالعزيز .. فما صدقت بالبدايه .. هو قايل لها انهم ماراح يجون الا الاسبوع الجاي.. واليوم الاثنين .. معقوله يكون موجود .. نزلت من الدرج بسرعه .. شافت ظهر عبدالعزيز لها وهو يكلم الخدامه الي هزت راسها وراحت .. وتو عبدالعزيز بيروح .. سارا: عزيييييييز.. التفت لها عبدالعزيز وابتسم .. سارا كملت نزول والبسمه شاقه حلقها .. حاسه بنفسها تطير .. صايره تشتاق لعبدالعزيز كثير .. اول ما لامست رجلها الطابق التحتى ووصلت لعبدالعزيز ارتمت بحضنه .. سارا : انت جيييت عبدالعزيز: ههههههه.. ايه جيت .. شوي شوي علي بتطيحينى .. خفت عنه سارا وهي لازالت تبتسم ... وبعتب سارا: ليه ما قلت ليه .. عشان استقبلك.. وبعدت عنه .. عبدالعزيز وهو يضحك: كل هالالوان على وجهك والكشخه لمين اجل ؟؟ سارا: حرام عليك هذا مكياج .. وثاني شي.. الحمد لله لحقت عليك كنت ناويه اروح لمها بيت خالتى.. عبدالعزيز: لو انى ما شفتك كان ذبحتك سارا: هههههههههههههه منيره: سارا؟؟ التفت سارا لمنيره .. واقفه عند الباب قصدي جالسه وتشوف سارا ... يالله ايش قد اشتقت لك يا منور ... من جد لك وحشه .. سارا بفرح: وانتى بعد .. وراحت لصديقه عمرها ورفيقه دربها .. صديقه الطفوله وكاتمه اسرارها .. الانسانه الوحيده القريبه منها .. والي تكون بالنسبه لها مثل الاخت والصديقه وكل شي...مدت منيره ايدها وتلقفتها سارا .. ما قدرت تكتفى بهالشي .. فانزلت وضمت منيره .... الي شدت عليها من جهه ... سارا وصوتها مو قادره تتمالكه من الصياح: مره ثانيه بروح معكم .. اشتقت لك منور .. اشتقت لك كثير منيره: وانا اكثر ... عبدالعزيز: خلاص سارا ومنيره لا تسوون لنا مشهد درامي ... وينهم اهلى سارا.. قامت سارا وهي تمسح دمعتها ومنيره نفس الشي .. سارا: امك تريح بعد الغدا ونفس الشي رهف .. اما عمر اخذ بنته للحكير اظن او توي تاون والله مادري وين بالضبط منيره: بروح عند امي مشتاقه لها كثير .. سارا: وانا بنادي رهف .. اكيد بتطير من الوناسه اذا عرفت انكم هنا .. ........................ |
«•! 00 [ خـــوف مـن الحـب ] 00 !•»
عمر واقف يتامل بنته وهي تلعب بسفينه الالعاب... صح انها كانت تبتسم .. بس ابدا مو عاجبته .. حزنها اكبر من عمرها ... والهموم الي شايلتها ما تناسبها .. حاول باقصى جهده انه يساعدها .. بس هي خلاص احكمت اغلاق القوقعه الي هي داخلها .. وما تسمح لاحد يقرب منها ... وفي نفس الوقت ازداد تعلقها بابوها .. ما تبيه يغيب عنها لحظه وحده .. تذكر موقف صار له قبل يومين .. ربعه اصروا عليه انه يسهر معهم ويوسع صدره .. وهو ابدا ما كان له خلق.. بس انحرج منهم ووافق .. طلب من رهف انها تهتم في عشى مي وتنومها .. وبعد حول ساعه دقت عليه رهف تقول ان مي مو راضيه تنام وتصيح تبيه .. راح للبيت عشانها اول ما شافته ظلت متعلقه فيه .. لين نامت بحضنه .. هالشي غريب على بنت بعمر مي .. خلاص هي بتدخل السبع .. ولازم تقل من هذا التعلق.. عدم وجود ابوه و منيره بالبيت خلاها تخاف من فقد اعز الناس لها الي هو ابوها ... غير انشغال امه واخته وحتى مرت اخوه .. كل هذا خلاها مع ابوها بس.. وفي نفس الوقت ازداد تعلقها بمعلمتها .. اللحظات الوحيده الي يشوفها فرحانه هو ذهابها للمدرسه .. كل هالامور خلواالفكره تبدت تتبلور براسه .. هذي بنتى .. وانا لازم اامن لها حياه طبيعيه .. مثل غيرها من الاطفال .. امي كبيره وماهي فاضيه لها .. ورهف مصيرها الزواج .. ومنيره انشالله .. مين بيبقى لها .. انا .. واذا صار لى شي.. مو بس كذا .. هي تحتاج لعنصر الامومه بحياتها .. وهالشي ماراح تلاقيه عند عماتها .. انا ايش قاعد افكر .. صرخ قلبه .. انا ايش قاعد افكر معقوله افكر بالزواج بعد فاطمه .. اكيد بعقلي شي.. رد العقل.. لا تكون انانى .. قبل لا تفكر بنفسك فكر ببنتك .. انت شوف كيف هي الحين ... مي: بابا بابا.. اافاق من افكاره على مي وهي تسحب ثوبه عشان تلفت انتباهه..نزل راسه لها وهو لازال معقد حواجبه نتيجه لافكاره عمر: نعم حبيبتى مي: خل نلعب هذي؟؟ واشرت على اخطابوط في نهايه اذرعه مراكب تدور .. عمر: لا يابابا هذي خطره مي: الا ابي اركبها .. عمر: لا تصيحين بنصها وتقولين نوقفها مي بعزم: انا ما اصيح وهذا الي ذابحنى فيك .. ابيك تصيحين وتعبرين عن الي داخلك .. مو من هالعمر تتعلمين الكبت ...دق جواله شاف عبدالعزيز داق عليه ... عمر: السلام عليكم .. هلا بو سعود عبدالعزيز: وعليكم السلام .. اهلين عمر كيفك عمر: تماام بخير انت شخبارك وشخبار منيره عبدالعزيز: توك تسال يا اخوي ايش فيك ما تدق ولا شي .. عمر: ههههه والله كل يوم ادق على منيره ايش لي فيك انت عبدالعزيز: هين تشوف .. المهم وينك فيه الحين؟؟ عمر: رايح مشوار عبدالعزيز: مشوار والا قاعد تلعب عمر: هههههههههه.. ومادام تدري ليه تسال عبدالعزيز: هذا جزاي مشتاق لك وابيك تجي للبيت واشوفك عمر: انت هنا ؟؟؟؟؟؟؟؟ عبدالعزيز: ايه بالبيت .. متى بتخلص وتجي عمر بلهفه: معك منيره عبدلعززيز: ايه عمر: الحين جاي عبداللعزيز: افا يعنى لو منور مو معي ما جيت عمر: ههههههههه روح بس.. يالله مسافه الطريق وانا عندكم عبدالعزيز: ههههههه سكر من اخوه والتفت لمي عمر: ميونا حبيبتى خلاص بنروح للبيت الحين عمو عبدالعزيز وعمه منيره جاو مي بهدوء: طيب لييييه مي .. معقوله مو مشتاقه لعمتك .. ليه ما تعبرين عن شعورك لييييييييه ... ............................. بعد اسبوع من وصول منيره للبيت .. جات ام خالد تزورها وتطمن عليها .. الخدامه جات لمنيره لغرفتها وقالت لها ان امها تبيها تجي عشان تسلم على ام خالد.. منيره: ام خالد هنا؟؟؟؟ ماريا: ايوه .. مدام في قول تعالى سورعه منيره بتفكير: طيب طيب روحي انتى الحين.. وسكري الباب.. بعد ما طلعت الخدامه من الغرفه .. ظلت منيره مكانها تفكر .. ام خالد .. ايش جابها هنا .. ليكون يبون يتكلمون عن الزواج .. خلاص كل شي انتهي.. ليه تجي .. والا تبي تشوفنى اذا الى الحين اصلح لولدها او لا .. طاحت عينها على المرايا الي قدامها .. وقامت تشوف وجهها .. قربت منها .. وارفعت اللفاف الي على خدها .. بدت تطلع لها الخطوط المتعرجه .. لونها احمر مايل للبنفسجي .. وهي بارزه وشكلها مرره بشع .. ما قدرت تتحمل المنظر ورجعت الشاش مكانه ...لا خلاص مستحيل اروح .. مستحيل اقابلها بهالشكل .. دق على الباب منيره: ميين؟؟ رهف: انا رهف .. عادي ادخل منيره : تفضلي دخلت رهف.. رهف: يووه منور ما لبستى .. امي تقول تعالى بسرعه منيره: مابي اروح .. رهف وهي معقده حواجبها: ليه طيب منيره: رهف من جدك تبينى اقابلها بهالشكل رهف: وايش فيها .. منيره: لالا قلت مابي يعنى مابي ... رهف: منور .. والله عيب منيره بدت تفقد اعصابها: لا عيب ولا شي.. وممكن لو سمحتى تتركينى لوحدى رهف وهي تحاول تقرب منها: منور منيره: ما تسمعين .. ما تفهمين .. برا .. اطلعى برا رهف: اسفه منور مو قصدي شي لا تعصبين على منيره ما تبي تضعف قدام رهف .. هي حاسه بنار تشب داخلها .. ما تبي تبين لهم انها انضرت منيره: طيب ابي اجلس بروحي ... يوم لاحظت ان رهف لازالت واقف مكانها منيره: لو سمحتى .. طلعت رهف من غرفه اختها وهي مكسوره الخاطر .. اما منيره اول ما طلعت رهف حطت ايدها على وجهها وقامت تصيح ... لين تبلل اللفاف الي عليه .. .................. بعد ما طلعت ام خالد راحت فوزيه لغرفه بنتها .. احرجتها منيره كثير .. الحين المره جايه تتطمن عليها وهي مو راضيه تقابلها .. مسكينه ام خالد طول فتره غياب منيره تدق دايما تسال عنها ... وماكان هذا جزاها .. منيره مو صغيره والمفروض تقدر ... دقت فوزيه الباب ومن غير ما تنتظر الرد دخلت ... بوجهها الشاحب الخالى من اقل زينه ممكنه .. والحجاب على راسها .. وبجلابيتها ... منيره كانت جالسه على كرسيها طول اليوم مو راضيه تطلع .. جالسه على الكرسي وهي تقرا مجله فوصل ...سمعت الصوت ور فعت راسها شافت امها تقرب منها وتجلس على السرير قبالها ... فوزيه: تعبانه انتى.. منيره: لا يمه مافينى شي فوزيه:طيب ليه ما جيتى تسلمين على ام خالد منيره: يمه ماكان لى خلق ... فوزيه: مو عيب عليك المره جايه لحد بيتك عشانك وانتى مو راضيه تطلعين لها منيره: مو عن شي يمه .. بس ماقدر .. ماقدر اقابل احد وقامت شفتها التحتيه تهتز فوزيه شافتها بشفقه بس قالت لها بكل صراحه: ليه .. لانك ما تمشين؟؟ منيره وهي ترفع لامها عيون تلمع تجمعت فيها الدموع: ليه حنا نوقف على المشي بس ... فوزيه: ان شاءالله بعد العمليه بيرجع كل شي تمام .. منيره بصوت مرتجف: ان شاء الله .. بعد صمت ... فوزيه: تعرفين ليه ام خالد جايه ؟؟ منيره: ايه .. تشوفنى فوزيه: طبعا .. بس بعد كانت تبي تكلمنا عن ولدها .. منيره: طلال فوزيه وهي تبتسم: ايه طلال ... يوم لاحظت ان منيره ما ردت عليها .. فوزيه: ما تبين تعرفين ايش قالت عنه منيره: ادري ما يحتاج تقولين .. الحمد لله جات منهم مو منى فوزيه باستغراب: ايش الي جا منيره: فسخ الخطوبه فوزيه: أي فسخ الله يهديك منور ... ام خالد تقول ان الولد شاريك ولازال متمسك فيك وان شاء الله بعد ما تنتهي عملياتك وتهدى الظروف وانا اطلع من حداد ابوك نرتب امورك معه.. منيره: يمه انتى ايش قاعده تقولين .. بذمتك تبينى اتزوج بهالحاله .. فوزيه: بتتشافين منيره: بس مستحيل امشي .. وحتى لو تشافيت شلون اتزوج وابوي توه مات فوزيه بحزن: الله يرحمه منيره: امين.. يمه تكفين انا مابي اتزوج .. وخصوصا طلال .. لو سمحتى لا تجبرينى على شي ما ابيه.. فوزيه: وليه طيب .. وليه خصوصا طلال منيره: طلال شافنى قبل لا اتشوهه فوزيه باندافاع: ما تشوهتى .. هي بقايا اثار وبتروح بعد العمليات منيره: حتى لو حرفتى كلمه تشويه وخليتيه بقايا اثار ... بظل فيه علامه ووجهي مستحيل يرجع مثل اول .. فوزيه: الجمال جمال الروح منيره: ما يهمنى جمال الروح .. يمه انا الحين انسانه ناقصه .. لا امشى وزياده مشوهه فوزيه: منور لا تقولين هالكلام وتقطعين قلب امك منيره: هذي الحقيقه .. لازم نتقبلها حتى لو كانت مؤلمه .. وانا مؤمنه بقضاء الله وقدره .. فوزيه اندهشت من حكمة بنتها: ونعم بالله... لاحظت على بنتها اثار التعب .. منيره بسرعه تتعب .. فوزيه وهي تقوم : اتركك الحين ترتاحين ... ابتسمت منيره لامها: مشكوره يمه .. فوزيه : يالله قومي ريحي على السرير ومددي نفسك .. وراحت لها ساعدتها تحطها على السرير ... الى الحين ما بعد تتعود منيره وتقدر تعتمد على نفسها في التنقل من السرير للكرسي والعكس ... |
| الشبكة: أحد مواقع المجموعة الشيعية للإعلام الساعة الآن: 05:04 AM. بحسب توقيت النجف الأشرف |
Powered by vBulletin 3.8.14 by DRC © 2000 - 2024