قصيدة (( كَوم يحسين تلكَـّه العايلة )) من قلم الشاعر ايار الحلفي
 

كَــوم يـحسيـــن تلكَـّه العــايله .......... كَـــوم يـحسيـــن تلكَـّه العـــايله

زيــنب اليوم اجت مـــن اليسر
والكَلب من الهضم يسعر جمر
رادت بشـــوكَ تشوفـك يا بدر
وصّت الحــادي يمــر ابكربله

وكَفت اعله اكَبوركم وكفة حزن
والكَلب يحسيـــن حل بيه الوهن
تكَول خويه شلون أرجع للوطن
خل يكَوم ابن الأمير ارد اسئله

اليـوم أطفال ونـسـه جولك ظيوف
اجروحهم يحسين صارن بالالوف
خلـّي عينك حزن هالموقف تشوف
اليـــوم زيـــنـــب بالهموم امحمّله

هالإجاك الحرم مــن بــعــد الجفه
وبــيــه زيـنـب بــالحــرم متلـّكلفه
بـــيـــدك اليــــوم دمــعــهـم نشّفه
مـــا أظــن الظيـــف مـــا تستقبله

اليـــوم الاطــفــال إجــت يــمّك تلوع
ومثل ما يجري النهر تجري الدموع
شوف ضربات السياط اعله الضلوع
ونــظــر الآثـــار ذيـــــج الـسـلـسـله

سـكـنــه نــادت ويـن كبرك يالولي
بويـــه كلبـــي اعليك بــالهم ممتلي
اتلكَـّه بنتك كَـــوم يــــا ضنوة علي
آنــــه سكنــــه اوتـدري بيّه امدللـّه

زيـــن الــعبــــاد إجــــاك ابمحنته
ويصدع اكبـر جبـل ظيم امصيبته
راد شـــوفك ونـتــه رايــد شوفته
كَوم شــــد حيلـه يـبـن خير المله