بسم الله الرحمن الرحيم
اللهم صل على محمد وآل محمد وعجل فرجهم

أم البنيـــــــــــــــــن إبحيــــــــــــــــره
ــــــــــــــــــــــــــــــــــــــــــــــــــ ـــــــــــــــــــــــــــــــــــ

أم البنيـــــن إبحيـــــــره === تبچــي إو نظرها إتديره
رادتْ تجيهــا إبهليـــوم === يحسين وإتزيل إهموم
تبچــي إو نظرها إتديره
ـــــــ
تحضر تريدك بالدَفَِن == يحسيـــــــن أم العبّاس
طول العمر ظلّتْ تِحِن == ولشوفتك تحني الراس
تتركها أبداً ما تِظِن == بيها تعزّيك النــــاس
تلگاها بالحسره إو توِن == مهضومه منها الأنفاس
يحسين شوف إشبيها === هذا البُعد ماذيهـــــــــا
ظلّت وحيده إبآلام === طـول الليالي مَتْنام
تبچــي إو نظرها إتديره
ــــــ
يحسين دمعات الأمل == چانـــت تصبها أنهار
رادتْ يبن خير العمل == توفـــــي وليها الكرار
عباس من عدها نهل == طيـــــب الوفه والأيثار
وإبكربله الموقف كمل == ضحّــوا ولدها الأحرار
هذا الأمل وإتحقّــق === صاروا ولدها البيرق
نالتْ مجدها إبأيمـــان === وإنفتْ گلبھـــا الولهان
تبچــي إو نظرها إتديره
ـــــ
يحسين رادتْ شوفتك == سالـــم ترد يامظلوم
صوت النعي بيها فِتَك == ذوّب گلبهـــــــا المحروم
واليوم تبچي إو رادتـك == تدفن جسدها الموسوم
تضوي گبرها إبطلعتك == يحسيـــن نورك معلوم
نورك يشع تضويها === أم البنين البيهـــــــــا
حسرات تملي الأكوان === يوم الجفاها الشجعان
تبچــي إو نظرها إتديره
ـــــ
يحسين ذابت مهجتي == لأم البنيـــــــن الأبطال
رايد تجيني إبوحشتي == يوم الأشوف الأهوال
تشفع إلي كُل غايتي == ماريد جاه إو أي مال
تجري إو أداري دمعتي == مـن أذكر أم الأشبال
من أذكر المهضومــه === روحي تظل مهمومه
باب الحوايج للناس === موصوفـه أم العباس
تبچــي إو نظرها إتديره
ــــــ
يحسين باب الطاهــــره == باب الوسيع إو مفتوح
ظلّتْ ليالي ساهــــــره == تُنطر رجوعك بالنوح
تالي رحتْ عنها إو سره == دمّــــــك غديت المذبوح
أم الوفه منها جـــــــره == نهر الدموع المجروح
بأرض البقيع الغرقد === حيـــل الوفيّه يِنْهَد
نصبتْ عزاها الينعاد === رسمــت قبور الأولاد
تبچــي إو نظرها إتديره
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dld3dh13497.mp3.html