يزينب ياغريبه
 

يزينب ياغريبه
ــــــــــــــــــــــــــــــــــ
يزينـــب ياغريبــه === مُصيبه إبسد مُصيبه
عليهم لاتعتبيـــن === إخوﺗﭻ هم بعيدين
مُصيبه إبسد مُصيبه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــ
يزينب لاتعتبين العتـــــــب راح == يِهَيج إجروح بالزهره الزﭼيّه
يزينب كُل موالي الحاﻟﺗﭻ ناح == غريبـــــــه إبدار غُربه يانقيّه
ضرﻳﺣﭻ عالبُعد تهواه الأرواح == تريـــد إتشوف أنوارﭺ زهيّه
إذا يوصل إﻟﭻ ﮔﻟب المُحب صاح == إﺟﻳﺗــــــــﭻ ما أخاف الناصبيّه
إﻟﭻ أحمل حنينــــي === أظل عمري إو سنيني
يزينب لاتنوحيــــن === إخوﺗﭻ هم بعيديــــــن
مُصيبه إبسد مُصيبه
ـــــــ
يزينب ياعقيلـــة حيـــــدره اليـــــوم == غريبه إو هل صُفيتي إبديرة أغراب
مثل أﻣﭻ صُبرتي إو شلتي إلهموم == وحيده إبلا أهل ما عندﭺ أحباب
أخوﭺ إبكربله العباس موسوم == تنادينـــه ﻛﻔﻳﻟﭻ كوكب إنصاب
وأخوﭺ إحسين نوره الصار معلوم == يشـــــــع إبكربله زاهي ولا غاب
يبت سيد البريّـــــه === لفت ﻟﻳﭻ المنيّـــه
لا عباس لا إحسين === إخوﺗﭻ هم بعيدين
مُصيبه إبسد مُصيبه
ـــــــــــ
يزينـــــب ياعَلَــــم ثــوره إو تخلّد == لسان الحق فُضح أفعال الأشرار
يزينب يانبــــع يجري المُحمـّد == كلام المُرتضه الفيّاض أنهار
يزينب باب إنتِ إو دوم مَنْسَـــد == للخير إنفتح من حامي الجار
يزينب ياصبُر فاق الصبُر صد == شماتــة كُل أميّه والعدو حار
شموخ العز صُفيتي === جبل عالي ﺑﮔيتـي
عزيزه دمعة العيــن === إخوﺗﭻ هم بعيدين
مُصيبه إبسد مُصيبه
ـــــــ
يزينب حسرتي إبروحي تشب نار == من أذكــــر مُصـــاب الغاضريّـــه
أﮔولن بس جسد زينب مشه إو سار == روح الطيبــــه ظلــــــــّت رميّــــه
تدور إبكربله ما بين الأبرار == تشم إحسيــن والساﮔي أخيّه
تعانق روح أبو السجّاد تحتـــــــار == تشوف إعلى الجسد ظِل الزﭼيّه
تِفَيّيلــــه الشفيعـــه === تناديها إبفجيعـــه
يزينب رحتي لاوين === إخوﺗﭻ هم بعيدين
مُصيبه إبسد مُصيبه
ـــــــ
يزينب واجب إعلينه نناديــــه == يحسين العقيله اليوم بالشام
أبو اليمّه إبدمع جاري نعزّيــــــــه == على إمصاﺑﭻ يزينب نلطم الهام
وابو الحسنيين واجبنه نواسيه == مآتـــم نُنصب إبحسرات وآلام
وأبو الغيره الشهم عباس نِتْنيــــــه == يشاركنه المُصاب إبشوﮒ وأحلام
يشاركني إبعزائــــي === إلَه حُبّي إو ولائي
يزينب واجهي البين === إخوﺗﭻ هم بعيدين
مُصيبه إبسد مُصيبه
ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dld1n714568.mp3.html

شكرا اخي جابر على ماطرحت
اجرك الله واثابك خير الثواب

ــــــــــــــــــــــــــــــــــــــــــــــ

ــــــــــــــــــــــــــــــــــــــــــــــــــ ــــــــــــــ

شكرا لك ولطرحك الرائع