منتديات أنا شيعـي العالمية - وبيوم أربعينه!! الشاعر حسين الساعدي

وبيوم اربعينه!

وبيوم اَربعينه--اجينه اليوم اجينه
مشي ونلطم على الراس
نكول اشعجب عباس!
غفه وعاف ابو اسكينه
وبيوم اَربعينه
-----

شينسينه يحسين--مصابك صَدع الكَون
اجينه ودمعة العين--ما ضلت بالعيون
درَجع طفك الحين--حتى اتشاهد اشلون
ابصولة جعفريه
نبيد اجيوش اميه
بسم حيدر ولينه

وبيوم اربعينه--اجينه اليوم اجينه

-----

فاضت كَربله احساس-بالدم والأراده
دم نزفتها هالناس--تتمنى الشهاده
تكَله انهض يعباس- تعال اخذ القياده
نعيد الطف عليهم
نضَيك الوسعه بيهم
وتطفه الحِركَه بينه

وبيوم اربعينه--اجينه اليوم اجينه

-----

اجينه انصيح عباس--كوم ارفع الرايه
الك ثار اويه الارجاس-دسويها دمايه
خل انرد على الناس--كل نور الولايه
كل ارواحنهَ اسيوف
نصير الزندك اجفوف
يبو الغيره انتخينه

وبيوم اربعينه--اجينه اليوم اجينه

-----

اجينه انكَله لبيك--يحسين الكرامه
كلنه انقاتل اوياك-- يانور الامامه
على كل رجس عاداك-نسويها قيامه
يفدونك ملايين
سالم تبقى يحسين
دَرَجع الطف علينه

وبيوم اربعينه--اجينه اليوم اجينه

----
مشينه ابحضرت الموت-لجل ثارات الحسين
رسمنه ابدربه تابوت- -جِمَع كل الموالين
الزينب نهتف ابصوت--كَفي دمعة العين
يخسه الكال أسيره
مشه اوياج ابو الغيره
يردج للمدينه

وبيوم اربعينه--اجينه اليوم اجينه
مشي ونلطم على الراس
نكول اشعجب عباس
غفه وعاف ابو اسكينه
وبيوم اربعينه

حسين الساعدي