منتديات أنا شيعـي العالمية - وطن وبتربتك شايل جمال الكون بقلمي

وطن وبتربتك شايل جمال الكون
الشمس لو غربت تلاعب جرف شطك
ياحــــرز الاخـــوه ولمة الاحبـــاب
ويا طعم التمر من ينبت بأرضك
يالوحه بريئــه وبيد طفــل زغيــر
رسم ورده جميله تقصد برسمك
يلكاعـك تظــل مفتوحه للطيبيــن
ويلطيبين عامر عالي ظل قصرك
عراق وحاير انه شلون اوصفك زين
أخاف حروف شعري تعجز توصفك
وأخاف القلم يعجز يحصر التاريــخ
وتاريخك بحر ويهد سفن خصمــك
ومن جاني الوحي وكتله القصيده عراق
وكف يمي الوحي وحتار شيوصفك
ومن هذا اليحاول يدفنـك يعـــراق
ميعرفـك ترى وما محتمي بظهرك
والله لو يعرفـك ما يظل يحجي عليك
ولا سب العطاء الفاض من نهــرك
تفيض انته على الجيران خيـــرات
وأطفالك تظل بس ترضع بصبرك
هذا انته وابد ما كدروا يغيروك
شيغيرون منك طيبتك اصلــك
خسر كلمن يحاول يهدمك يعراق
ندفن جوه التراب الحاول يدفنك

بقلم علي العبودي الناصري