منتديات أنا شيعـي العالمية - أربعين إمن الليالي ـ موشح

بسم الله الرحمن الرحيم
اللهم صل على محمد وآل محمد وعجل فرجهم

أربعين إمن الليالي ـ موشح
ــــــــــــــــــــــــــــــــــــــــــــــــــ ــــــــــــ
جينه من درب الرزايا والأمَرْ == أربعين إمن الليالي إبلا قمر
ــــــــــــــــــــــــــــــــــــــــــــــــــ
أربعين إمن الليالي بالمسير == بالضعن يحدي الشمر ذاك الحقير
فوق أقتاب الجمال إو بالهجير == تمشي العيله الكريمه بالخطر
ـــــــــــــــــــــ
تمشي العيله إو ترافقها الرؤوس == يحدي بيها الصار من دين المجوس
عاف دينه من مشه إعلى الحق يدوس == والعليل أعلن حقيقة هالظفر
ـــــــــــــــــ
والعليل أعلن حقيقة هالضعن == قال أولاد الرسول المؤتمن
إحنه صابتنه المصايب والمحن == من أميه الخالفت سيد البشر
ــــــــــــــــــ
من أميه الخالفت طه الرسول == ما رعت إولاد هاديها إشتكول
لو سألها المصطفى يوم المثول == ليش دم إحسين يجري إمن النحر
ـــــــــــــــــــ
ليش دم إحسين يجري إبكربله == ليش من بعده سبوها العايله
ليش راس إحسين رمح الشايله == راس مقطوع إو يرتّل للسُوَر
ــــــــــــــــــ
راس مقطوع إو تشوفه ام الحزن == تنظر الراس إو قلبها يِمْتِحِن
تندب المختار ياجَدّي إو تِحِن == راح محبوبك يَجَدْ عنّي إو هجر
ــــــــــــــــ
راح محبوبك يَجَدْ عنّي إو إجيت == أرد ازوره من بعد درب المشيت
يم أبو اليمه أظل أتْني يريت == بلكي أسمع صوته وإيحن القدر
ـــــــــــــــــ
بلكي أسمع صوته من تحت التراب == وأشرح الصاب الحرم بعد الغياب
وأشرح الذَوّب كبدتي والعذاب == وأشرح الشر الذي إعلينه إنتشر
ــــــــــــــــــــ
وأشرح الشر الذي إعلينه جره == يم أبو فاضل أخوي إو أنْطُرَه
يرفع الجود إو علمنه يُنْشُرَه == للوطن ياخذنه أبو الغيره الأغر
ــــــــــــــــــــــــــــــــــــــــــــــــــ ــــــــــــــــــــــــــــــــــــ
مع تحيات شاعر اهل البيت / جابر النجفي
يمكنكم سماع القصيده بصوت خادم اهل البيت عليهم السلام
جابر النجفي على الرابط التالي
http://www.wlidk.net/dld2Gc02834.doc.html