لطميه مكتوبه الى سيدي و مولاي الامام الكاظم عليه السلام
ثوابها الى قرائها الكرام و الى اموات شيعة امير المؤمنين المنسيين
نسأل العــــالم اجينـه ابهـلمسيه
وين ابن جعفر زعيم الرافضيه؟
اْبسجن هارون الرشيد .. اْمــكبَّـل ابكَيــدِ الحديد
وين ابن جعفر زعيم الرافضيه؟
يمن تنوي .. تـِـجَـمِّـل صورة الظالم
هارون الحِـبَس بسجـــونهِ الكاظِـم
لا تنسه .. ترهْ الله ابكل فعل عـالم
من تمـــدح مُنافق ما تضـــل سالـم
بالحشر وياه بارينه يحشرك .. و بجهنم ويه هارونك يشمرك
ثق عذاب الله شديد .. اْمــكبَّـل ابكَيــدِ الحديد
وين ابن جعفر زعيم الرافضيه؟
بالمنطـق .. مشاهد واضحه وأفكــار
نحسبهه ابـدرايه و مايضل محتار
مسافة خيط ما بين الفخر و العار
و انتَ اختـار لو دين الله لو دينار
واضحه ابخطِ الرساليه المعالم .. و الفتن تلمع لمِـع ويه الدراهم
و الذهب ساعي البريد .. اْمــكبَّـل ابكَيــدِ الحديد
وين ابن جعفر زعيم الرافضيه؟
هارون السِجـَن راعي الفخر موسه
خالي امن الرشد و الغيــره قاموسه
ركع للــــدنيه مو للــــــباري ناموسه
ضن من جهله يشري الجنه بفلوسه
عاين ابعين البصر للكاظميه .. حالاً تشوف الفوارق بالقضيه
منهو بيهم يا رشيد ؟ ... اْمــكبَّـل ابكَيــدِ الحديد
وين ابن جعفر زعيم الرافضيه؟
شرف دنيانه واضح والقلم يكتب
و التاريخ يمـــدح مره مره يسب
و التحريف حاول للوضج يجـلب
و اوصاف الفخر لهل الظلم ينسب
وَصِفــّو هارون بوصاف الرشاده .. مثل ما صدام ضمنوله الشهاده
لجن ما رادو بعيد ... اْمــكبَّـل ابكَيــدِ الحديد
وين ابن جعفر زعيم الرافضيه؟
عدالة ربنه اكبر من ظــُـــلمْ سَجّـان
حاشه ايضيع عد بارينه حق انسان
اخذ من هلمجالـــس بيـّـنه و برهان
منو الباقي خلـوده بدورة الازمان؟
بالف ليله وليله بس ذكر النجاسه ... و احنه كاظمنه الخِلــَــد ويه القداسه
علزمن يبقه جديد ... اْمــكبَّـل ابكَيــدِ الحديد
وين ابن جعفر زعيم الرافضيه؟
آهِ إمنِ الجسر و الذكرى تشجيني
وحمـــاميل اربعه صورتهم بعيني
احس صوت المنادي جن يناديني
و تابوت الإمــام و كَيــــده يــاذيني
جني واكَـف من اجه الجسر الرصافه ... نعش مولاي الكظه ابسَّم الخلافه
صاحب المجد التليد ... اْمــكبَّـل ابكَيــدِ الحديد
وين ابن جعفر زعيم الرافضيه؟