[بنت الهدى/النجف]

شكرا لك اخي على هذه الحكاية ومعروف عن شاعرنا الكرخي رحمه الله انه كان شاعرا ساخرا ناقدا ينقد بشعره الكثير من المواقف السياسية في ذلك الزمان ومثال على ذلك انه مثلا انتقد البرلمان الحاكم انذاك بشعر ساخر لاذع بقصيدة مشهورة معروفة بأسم ((قيّم الركاع)) اليكم نصها وكأنها واقع حال برلماننا اليوم ، تمعنوا بكلماتها :

قيّم الرگاع من هاي اللحه
اتشوفه هيبه وعنده لحيه امسرّحه
يشتم بلا خجل وبلا مستحه
من ايحس المقعد اشويه اندحچ
قيم الرگاع من ديرة عفچ


برلمان اهل المحابس والمدس
عگب ماچانوا يدورون الفلس
هسه هم يرتشي وهم يختلس
ولو نقص من راتبه سنت انعقچ
قيم الرگاع من ديرة عفچ


اتشوف واحدهم امعمّم بالوقار
وبالاصل تاريخه أسود كله عار
ابضرف ثلث اسنين مليونير صار
ايريد عالوادم ايعبّرله چلچ
قيم الرگاع من ديرة عفچ


گمت ما اعرف حماها امن الرجل
ياهو التكضه اهو ايمثل العدل
وگمنه نستورد الشلغم والفجل
لان كلها ضلت اتدور ودچ
قيم الرگاع من ديرة عفچ


والله ضيعنه الصدگ من الچذب
اتشوفه هيبه وحچيه المصفط عذب
ياخذك وايردك ابشرق وغرب
وبسچاچينه يدچك حيل دچ
قيم الرگاع من ديرة عفچ


حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه ابحسچ
قيم الرگاع من ديرة عفچ


گمت ما اميز الذيب امن الحمل
إمنين ما التفت گلبي يشتعل
آنه ما شايف شعب يتبع خبل
شاب راسي وتيهت كل السچچ
قيم الرگاع من ديرة عفچ


يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ؟
قيم الرگاع من ديرة عفچ


لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه اندرچ
قيم الرگاع من ديرة عفچ

******************
رحم الله جدكم ياأخـــــــــــانا عبود مزهر الكرخي وانتم ان شاء الله ممن يستنير بهديه في مجال الكتابة والشعر الرصين.
تقبلوا مـــروري.