[زكي الياسري]

شكراً ايها الاسدي على هذا الانتقاء .. ذوقكم رفيع

القصيدة للشاعر الشاب
المبدع السيد اسماعيل زوين الحسيني
وهذه النسخة الكاملة



صوره وللعراق اتعلكت بالدار
خريطه امن الذهب بالماس محفوره
بس متحركت وكعن غراض البيت
اثاري البيت كله امتجه عصوره

بدروس الوطن حاجَجَـني مره أستاذ
وكلي اكتب عراق وهاك طبشوره
اكتبت اسم الوطن جن لوحه للتاريخ
أعد هذا الاسم صاحت الصبوره

بس شفت المُعلم غالط التصحيح
شفت عالعين لوحظ ثاري مأشوره
كتله ادري السبب والعله يا أستاذ
بخط اسم العراق أمثال مشهوره
ارد اكتب عَراق بفتحه فوك العين
وعيب اكتب عِـراق بعين مكسوره

حديقه اسم العراق بكل حروف البيه
وكل نقطه عله قافه اتصير نافوره
ارد اكتب وطن فوق المسله اهناك
وكلكامش يجيه وتنحيني اعصوره
سور الصين صح اعجاب بالتاريخ
واهرام بمصر للأن مأثوره
ميساون حرف من بابل وأشور
من يشبه عراقي بسومره وأوره ؟

عجايب بالدهر لناس معروفات
وحده الوحده بالتاريخ مذكوره
بس العدنه اعجبب واليَحَير الكون
كبة حيدرالبيضاء مشهوره


تحياتي