[قوافي الأيثار]

للوديعة تناشد الحره العقيلة = تــــگلها يمه يا حمل بعدݘ أشيله
انه من زغري زماني = بسهم احزانه رماني
تــــگلها يمه يا حمل بعدݘ أشيله
؁؁؁؁
يمه يل بيـــݘ ابتدت رحلة عذابي = يا جرح ڰـــلبي ونزيفه وكل مصابي
يمه بعدݘ يا فرح أفتح له بابي = وعني ترحين وتزيدين انتحابي
ڰــومي يمه مسحي من عيوني دمعي = ريت آنه المنكسر يا يمه ضلعي
آه يالفــگدݘ عماني = بسهم احزانه رماني
تــــگلها يمه يا حمل بعدݘ أشيله
؁؁؁؁
يمه اشوفݘ ماشيه لصوب المنية = معزمه وحيدر توصينه عليه
وسال دمعـــݘ من ذكرتي الغاضرية = شلون لو شفتيني يا يمه سبيه
عالهزل مسبيه آنه بلايه والي = وانتي من ڰبرݘ تنوحين عله حالي
يمه وافراڰݘ سباني = بسهم احزانه رماني
تــــگلها يمه يا حمل بعدݘ أشيله
؁؁؁؁
يالوديعه ريت باݘر ما يجينه = ولا زهت شمس الصبح فوڰ المدينة
شلون لو ليل الحزن ݘلݘل علينه = والحسين يصيح وين امي الحزينة
اخلاف عينݘ يا شمل يمه يلمنه = ويا صبر بيه تنخمد جمرة المنه
يا هظم بعدݘ دهاني = بسهم احزانه رماني
تــــگلها يمه يا حمل بعدݘ أشيله
؁؁؁؁
يمه يا بضعة محمد كلميني = يهون يمه عليݘ يوم تودعيني
يالزݘية اتناشدݘ بالدمعة عيني = عـگبݘ اشلون العمر اڰظي وسنيني
آه يا يمه شــگبر هاي المصيبة = راح اخلص هالعمر وحدي غريبة
للدمع عمري دعاني= بسهم احزانه رماني
تــــگلها يمه يا حمل بعدݘ أشيله
؁؁؁؁

آنه زينب ما شفت غير المصايب = من الزغر عمري حمل أعظم نوايب
اليوم يا يمه الݘ دلالي ذايب = وباݘر الدنيه تراويني العجايب
ادري باݘر تصدع لدلالي طبره = وݘبد مسموم ونحر بعيوني انظره
هذا دهري الي ولاني = بسهم احزانه رماني
تــــگلها يمه يا حمل بعدݘ أشيله
؁؁؁؁
عمار جبار خضير
2013