[ابو ياسر الكعبي]

الى حائط الوجع

يتمثال الوجع مالحظه ناسيك
وصّوني عليك وجيت أمر بيك

أضن خلّص حزنهم كبل لتطيح
ومحّد ناشداك اشبيك ؟مابيك

أمس جانو ابسد فيّك يلوذون
ويعلكون الجروح الداميه اعليك

فتحت الهم عيونك دمع عاشور
وكل ساعه جرح منهم يبجّيك

مامر بيك منهم واحد شلون !!!
ولو بس بجرح واحد يواسيك

كسرو خاطرك يالخاطرك جام
وبعدك واكف الهسه اعله رجليك

اشحسبالك يجونك ؟انت غلطان
شكثر باريتهم !! محّد يباريك

إجيت انفخ بجسمك روح الجروح
ومن تحتاجني عود آنه أمر بيك

تحيتي لكل جرح ندي