[خالد محمد مهدي]

لقاء أم البنين مع العقيله زينب عليهما السلام بعد رجوع السبايا الى المدينه
دكَّت باب زينب صفنه أخذتهه
شافت ليلي وسط نهار موطبعه
ماتكّدر تفرزن ياهو أخت عباس
ذهلهه المنظر وصاب الكّلب فزعه
معقوله العقيله ترد وحّدهه
جا خدر العقيله عدمن أمودعه
ياعباس يمه وينك اطلعلي
صحيح الخبر لوهذا الخبر خدعه
رباتي ربات حيدر ادري ميقصّر
اليكابل هَوَ سيفه ماأله رجعه
زينب وين يعيوني تشوفيهه
أريد أويه الوعدهه اكبالي وبسرعه
دلّيني يكلبي وكّلي بنتي وين
يكّلبي فراكهه موسهل شيجرعه
نوح وياي نوح الفراك أعزازه
خط حزنك يكّلبي وأشبك الدمعه
الكمر ونجوم جانوا حرس سفرتهه
عاين حالها بياحال بالرجعه
بسجاجينك يدهري بجرحي ظل أجرح
أحجي يالعقيله أو صوَّري الفجعه
ترد دمعته زينب يمه لتخافين
شسولف عنَّه عن خصاله عن وضعه
ودعته ييمه اعله الشريعه هناك
مجره النهر جفَّه والجرف شمعه