[الكعبي ابو ياسر]

ذوب ياگلبي وتفطـَّر لاتضل محتار

صيح ياموسى ابن جعفر جَتْلَك الزوّار

***

ذوب ياگـلبي إبحنانك إبـچـي دمع البيك

صيح ياموسى ابن جعفر سيّدي لبيك

بدمّي وبروحي وكياني وبْمُهِجْتي أفديك

مسكنك قلعة غرامي والضلوع أسوار

***

يالهيامك في إمامك بالعشـگ موصوف

ترجم اعهود المحبه وبإمامك طوف

إتغذّت بشريان دمّك للعقيده سيوف

وفاضت إبْمنحر ولاءك للعقيده أسرار

***

صيح ياباب الحوائج جيت إلك مَشّاي

عِلِّتي يمَّك دواها وإنته كل رجواي

ياطبيب الشيعـه بس عندك يِصح إدواي

يالعَطيّاتك على الوادم تفيض أنهار

***

طِـلْبِـتي يمَّك يبوطِلْـبَه وإجيت أنخاك

يلّـي حـتّه إعداك شـاملها بكـرم يمناك

حاشه تطـردني وترجِّـع طِلْـبِتي حاشاك

وآنـه إلك مَـدّيت إديَّـه والدموع اعبار

***

جيت مـشّاي النُصرتك مـا أرد هيهـات

گـلبي مشغوف إبْمَحبتك يسبُـگ الخطوات

ويه كل خطـوه أنادي وتعتلـي الصيحات

إلك يـاموسـى إبنَ جعـفـرتهتف الـثوّار

***

صيح ياباب الحوائج جتلك الوفّاد

اتطوف شبّاچك ومن چـفّك تريد امراد

انته رجواها وسندها يا أسد بغداد

واگـفه اعيون إعله بابك والدموع إعبار

***

بالـگلب عشگـك تربّع يطوي بينه ادروب

وشوگـنه يحدي ابهوانه والتحثنه اگـلوب

إسمك ابجبهة شرفنه وعالعقل مكتوب

جينه إلك يابو الجواد وكلنه إلك أنصار

***