الـــــدلــــــوعــــــة
إيه أعرفك بنت عز وكلمتـك مسموعـه
وأدري إنك من خلقتي في ظـلال وفيّـه
مالعب فيك الزمان ولاقرفتـي جوعـه
ولاوقفتي مـن همومـك وقفـة محنيـه
أدري ورب اليتيم اللـي يهـل دموعـه
مابعد هلت دموعك في ضحـى عيديـه
بين حضن أبوك وأمك وردةٍ مزروعـه
طول عمرك مافقدتـي لمسـة الحنيـه
إيه أعرفك وأعرف إن الناس بك متبوعه
وأدري إن أمرك مجاب وحاجتك مقضيه
بس أنا من فضل ربي هامتي مرفوعـه
ورث أبوي وراس مالي عزوة جبريـه
مانحنيت إلا لمخافة ربـي المشروعـة
ولابعـد دفقـت دم الوجـه مـد ايديـه
بدوي ماعرفـت الضحكـة المصنوعـه
احمدالله من خلقـت وطيبتـي فطريـه
قانع في حكمة الله ماشـي فـي طوعـه
ماحسبت حساب دنيـا لناسهـا طرقيـه
إيه أنا ياأم الترف قلبي غدا موضوعـه
الفراق اللي بلا رجعـه وطـاري جيـه
بس روحي سايري قلبك وهدي روعـه
واعذريني .. وإلا عادي ازعلي عليـه
دامها وصلـت لـذل النفـس يالدلوعـه
والله ان يعيش راسـي ماانحنـى لبنيـه
الشاعر فهد المساعد