[نسايم]

السلام عليكم ورحمة وبركاته

اللهم صل على محمد وال محمد وعجل فرجهم وفرجنا بهم



بنوارك يبو الهادي إهتدينه
صدقنه الوحي وللحگ مشينه
والدستور الإسلام... والقائد محمد

****
خلگ رب الكون نوره وبمعانيه حباكم
ومن سناءه ومن بهاءه زهر بالعالم بهاكم
وسابق بعلم الإلاهي وحكم للناس ارتضاكم

ويسّر أمور السيطره .... الكم يسادات الورى
وكل فرد منكم أمّره .. وطوّگ الناس بولاكم

بيكم نوّر الباري بلاده
وعيّنكم يبو الهادي لعباده
بالدارين أعلام .... والقائد محمد

-----

الباري من رتـّب عباده وعيّن أرباب المراتب
درر من جوهر محمد (ص) تزهر بنور المناقب
وبمناقبكم علينه تهون بالشده المصاعب

وبيكم يسادتنه الأمل .. وانتم ميازين العمل
والأزل من يوم الأزل.... بيكم يثيب ويعاقب

ولاّكم على الكون ونظامه
من مبدأ الدنيا للقيامه
عالمخلوگ حكـّام.... والقائد محمد

-----

رصد رب الدين هذا الدين باسرار الكرامه
وأصل من أصل الرساله وفرع من فرع الإمامه
وإنت يا والد الهادي ركن ومثبت قوامه

والدين يارباب العلم... منكم وإلكم ملتزم
وإحنه بولاكم نغتنم .. دينه ونحمل وسامه

وشدينه الوسام إحنه بولاكم
وإحنه جنودكم نخدم لواكم
والمالك العلام ..... والقائد محمد

-----

يا بني الزهراء بيكم تنحفظ دعوة نبينه
نور وتجلت الدعوه وإحنه بالنور إهتدينه
دينه الإسلام وإحنه بقبلة الدين إقتدينه

رتلنه آيات الحمد ... بسم الله ونچـيد التضد
خلدنه تاريخ المجد ... يشهد التاريخ بينه

والإسلام لو چـادت خصمها
جدكم عالنصر ركز علمها
النه النصر مادام .... والقائد محمد

----

نور عصمتكم تجلى ونوّر أفكار العقيده
وسرنه بدروب العقايد لعد مگصود النريده
والگصد ربط الديانه بالتقاليد المفيده

ومنكم تعلمنه الإبه ..... بروح الموده الجاذبه
نعتصم بصحاب العبا .. ... وذاك ماضينه نعيده

والإسلام يتحقق مضنها
بإسم الفتح من خيبر حصنها
والفاتح الضرغام ....... والقائد محمد

-----

يا جواد العتره جودك عالملا يقدس مزارك
فلك للحاجات يفتر والگطب تصميم دارك
والفرج مفتاحه بيدك للتمسك باقتدارك

يالحبك الباري افرضه.... ليك الحوايج معرضه
إنجزها لحساب الرضى ... وإحنه خدام بشعارك

دنيا وآخره نلوذ برضاكم
ونچـسب من رضا الباري رضاكم
ونتمسك بالأحكام...... والقائد محمد

----

يا إلهي نصرت دينك وجعلت للدين صوره
ظهرت بصورة محمد (ص) وانمزج نوره ويا نوره
إجبر المكسور گلبه ويسر العسره أموره

نور مصابيح العلم.. وسيرنه ببحور الحلم
بنص الوحي وجمع الكلم... عجل الغايب ظهوره

يوم الينشر الرايه علينه
غايبنه ويگر للدين عينه
ويطلب ثار الأكرام..... والقائد محمد

الشاعر

المرحوم الشيخ كاظم منظور الكربلائي