[الحيدرية]

شكوى
للشاعر: عبد الله القرمزي

علي يا صاحب النجوى .. علي يا سامع الشكوى
علي يا صاحب النجوى .. علي يا سامع الشكوى

نشكي الك يا علي الجرى علينا
مثلك ما خلى العدل صديق الينا
كل ما تحل محنة بإسمك انتخينا

كلك ملتجى ونخوة .. علي يا سامع الشكوى
زمن بعدك اشسوى .. علي يا سامع الشكوى

ياللي الحلم والعلم كله على بابه
رد الزمن عاليواليك انقلابه
وعاد الجمل للسياسة من غيابه

اله في كل أمر فتوى .. علي يا سامع الشكوى
عسى الله يرحم التقوى .. علي يا سامع الشكوى

رايك يبو اليمة ما اله مكانة
جنه العلم بالولي انتهى زمانه
شوف الزمن يا علي اشكثر عمانا

غيابك في الدهر فجوة .. علي يا سامع الشكوى
ومنك جينا نتروى .. علي يا سامع الشكوى

أهل الزمن رجعوا ألف سقيفة
وكل من له غيرك هدى وهوى وصحيفة
يالمنولد داخل الكعبة الشريفة

وكل من يفتي باليهوى .. علي يا سامع الشكوى
وحتى بالعمر توه .. علي يا سامع الشكوى

كل ما امتحنا على محنتنا كبرنا
وكسرنا مثلك زمنا ما انكسرنا
لله وللهادي ولعينك صبرنا

صبرنا على الهضم عنوة .. علي يا سامع الشكوى
واجينا والدمع دعوة .. علي يا سامع الشكوى

~~~~~

مناجاة زينب -عليها السلام-
للشاعر: نادر التتان

عند قبره .. تهل عبرة .. يتيمة حيدر الليلة
عند قبره .. تهل عبرة .. يتيمة حيدر الليلة

بعيوني الجرح من يرتسم .. ما يبتسم دهري .. وتصفى الآلام
وأتمنى العمر لو ينختم .. قبل اليتم .. أدري ماتت الأحلام

ياللي زرع معناي .. زهرة على يده
كل ما ظمت عيناي .. يسقيها وده
شلون أحبها دنياي .. وأقبلها بعده
والوردة من دون الماي .. ما تبقى وردة

تقطعني .. تضيعني .. يتيمة وقلبي ياويله

عند قبره .. تهل عبرة .. يتيمة حيدر الليلة
عند قبره .. تهل عبرة .. يتيمة حيدر الليلة

ترحل عني وانا اللي ابتلي .. ما احد الي .. وأدعي يآخذني الموت
حاولت أمنعك لا يا علي .. لا يا علي .. لكن ما فاد الصوت

قول الأجل خداع .. يجذب عليه
والخاطري هالساع .. عوف المنية
قول الأمل ما ضاع .. وارجع اليه
ما أحتمل الوداع .. يالتدري بيه

ما أقدر .. أعيش أكثر .. وأبويه مفارق العيلة

عند قبره .. تهل عبرة .. يتيمة حيدر الليلة
عند قبره .. تهل عبرة .. يتيمة حيدر الليلة

يا بويه الزمن موحش تظن .. من يحتضن .. بعدك قلبي المجروح
قلبك يرضى جسمك يندفن .. وعلى الحزن .. عندك أيتام تنوح

لو بس تدير عيون .. لحظة وتشاهد
وجه الحسن مغبون .. وحسين يكابد
أتعجب انت شلون .. تقدر تباعد
زينب عليك تهون .. ما عنده والد

جم غربة .. ومحن صعبة .. وكلف حملي من يشيله

عند قبره .. تهل عبرة .. يتيمة حيدر الليلة
عند قبره .. تهل عبرة .. يتيمة حيدر الليلة

لو موتي ويا موتك يجتمع .. وانت استمع .. زينب يا بو الحسنين
فرق الوالدة بكسر الضلع .. خلى الدمع .. ينصب فوق الخدين

تدري أمي لو تدري .. شاللي عراني
ما رضيت بصغري .. أتيتم آني
ترحم جرح صدري .. عاد على شاني
غيرك أبو بعمري .. ما عندي ثاني

من عندك .. مثل قلبك .. يساعد قلبي ويشيله

عند قبره .. تهل عبرة .. يتيمة حيدر الليلة
عند قبره .. تهل عبرة .. يتيمة حيدر الليلة