[** مسلمة سنية **]

السلام عليكم اخوتي الموالين .... هاد الرد خاص بكم .... علشان الطف شوي الجوّ اللي تعكّر ( ما هو هيك هيك الموضوع تشتت ) .... و لاحظو ألطف ... يعني احنا بفلسطين الطقس عندنا لطيف و ما بنستعمل البف باف كتير لأنو ما بنشوف كتير حشرات .... ( ربنا يكون بعونكم عالحشرات اللي بتشوفوها ) .... يعني رح اكتفي بملطف الجو ( طبعا انا بفضّل جليد بريحة الحمضيات ) .....

طبعا كتير بواجه امور الها علاقة بالموضوع اللي بمرّ فيه .... لكن رح اذكر هون موقفين طريفين صاروا معي .....

*** الأول ..... قبل فترة في طالبة من طالباتي حبّت تقدّم لي هدية ... لأنها رح تتخرج قريبا .... و العلاقة بيني و بين طالباتي علاقة لطيفة و خفيفة دم و بعضهن تأثرن بي ... فحبّت الطالبة تهديني هدية حتى اتذكرها .... الهدية طلعت كتاب >>> كتير حلو ..... بس يا حزركم مين المؤلف >>>>>>>>> محمد عبد الوهاب ....... هاد انا لمّا شفتو صرت :eek:..... البنت تفاجأت .... فبسرعة غيّرت ملامحي حتى ما أكسر بخاطرها و بيّنت اني مبسوطة عالهدية .... بس برضو شكلو البنت لاحظت اني مو كتير مبسوطة بالهدية .... فاليوم اجت عندي بتحكيلي : جبتلك اشي .... انا تلقائي :eek: ..... ضحكت البنت و حكتلي : لألأ مو كتاب .... جبتلك لوز أخضر .... طبعا هالمرة عنجد فرحت بالهدية .... شو جاب لجاب ... ما هيك :p .....

*** الموقف التاني .... خبرتكم انو الي سلفة ( زوجة اخ زوجي ) من عمري تقريبا و علاقتنا و الحمد لله قويّة ..... و كل ما التقي فيها تقريبا بحاول بأي طريقة افتح معها حوار حول الأمور اللي عرفتها.... لكن انا خافّة عليها شوي و هي كمان خايفة و الفترة هاي مشغولة بامتحانات التوظيف ... المهم هداك اليوم اجت عندي و كانت مكتئبة شوي ( شويتين ) ..... و فتحَت سيرة الموت و الخوف من الموت .... فحكيتلها : ان شاء الله ما بنموت قبل ما ربنا يهدينا ..... ما فهمت قصدي و حكت : مزبوط صلاتنا بنصلّيها بسرعة و ما بنقرأ قرآن كتير .... قاطعتها بسؤال سريع بدون أي مقدمات : ما بدك تتشيّعي ؟؟؟؟؟ جاوبتني بسرعة : بدي ... بدي اتشيّع !!!!!!!!!!! بأول لحظة نصدمت انا و هي باجابتها .... و بعد هيك ضحكنا لأني فاجئتها بسؤالي ... و لأنها فاجأتني و فاجأت نفسها بإجابتها ... بعد هيك حسّيت فيها خافت من اجابتها .... و حاولت تغيّر الكلام عنها و توجهه لي .... فسألتني ازا كنت انا تشيّعت .... لفّيت بالجواب شوي .... و حكيت لها المسألة مو مسألة سنة و شيعة المسألة مسألة حق ... و رجعت الها و سألتها بهدوء : عن جد ممكن تتشيّعي ؟؟؟ فخبرتني ازا الحق معهم رح اتشيّع .... وقفت معها لهون لأنو الفترة هاي في عليها ضغط كتير ... بس ان شاء الله رح اكمّل معها .... عفكرة دراسات سلفتي بالدين يعني المفروض انو معلوماتها اكتر من معلوماتي !!!!

المهم حبّيت الطّف الجو شوي .....

بالنسبة الك عبود ردّك جاهز ..... بس رح اتأخر في طرحه .... حتى يقرأ ردّ ي هاد اكبر عدد ممكن من الموالين ..... طبعا ما في عندك مانع .... صحّ شطور .... بما انك متفرغ لي و لشركيّاتي ما رح تفرق معك ازا استنيت كم ساعة كمان .... بس متل ما وصيتك حبّاب دير بالك عاخلاقك حتى ما تنطرد و تضطر ترجع تقرأ الرد باسم عضو جديد .... و شخصية جديدة .... غير عن هيك ردّي اللي فوق ما تخليه يرفع ضغطك و يحرفك عن مسار سؤالك .... لأنو ردي رح يكون في مسار سؤالك مو متضطرة اطوّل بالي على اكتر من سؤال بنفس الجهل .... سي يو شطّور