[صوت الدماء]

جمالك صورة من تنطق

تسكت كل حروف الكون

وانه المبهور بالوانك

ما ادري الحسن جم لون


الوان الدم الي سال

تبهرني مو لون عيون

جمال عيونك ادري به

هالعالم به ِ مفتون

بس طبعي يابو السجاد

ادور جوهر ومضمون

ومضمون الحسن يحسين

لكيته بمنحرك مكنون

ــــــــــــــــــــــــــــــــــــــــــــــــــ ـــــــ

والوان الدم الي سال


صور اعجز احددها

جم لون الرسم الوان

وجم صورة واعددها

ابدي بشمعته جسام

واوكف سيدي عدها

ما عندي كلام هناك

كلمته بدمه رددها

جاسم وبحبال دماه

حروفي لجرحه قيدها

ـــــــــــــــــــــــــــــــــــــــــــــــ


اسكت لو بعد احجي

اكو لون الذي يسحر

لحظة من وفا العباس

اظنها من الوفا اكبر

خل نسأل فرات الاه

عجيبه بلونه متأثر !!

وما راح شعجب هالماي

يروي جبد ابو الاكبر

مثل ما خاطر العباس

يكسره كلبه يتكسر

مجروح الفرات يسيل

يشوف الكون بس احمر

ــــــــــــــــــــــــــــــــــــــــــــــــــ ــــــ


شكد عندي بعد الوان


سهم عبد الله البنحرة

لو سكنه يابو السجاد

عطشها سيدي شكبره

ما شربت لانها تخاف

نعطش ساعة العسرة

وعدنا بالمثل معروف

ومحد سيدي ينكره

كل واحد يروحي يكول

وكلمن حاير بامره

بس سكنه يابو السجاد

رفضت هذه ِ الفكرة

مو عجبة اذا هاللون

بيها سيدي ننظرة

الجانت تندعي للناس

امها فاطمة الزهرة

ــــــــــــــــــــــــــــــــــــــــــــــــــ ــــــ

وما تذكر نفسها يشوف

ابنها المجتبى واحتار

كالتله ينور العين

ويامهجة علي الكرار

هاك اخذه درس يبني

تكله الجار ثم الدار

يبو اليمة ولونه نريد

ببحور البتول ابحار

نغرك سيدي صعبة

يضربنا نخاف اعصار

لان الوان هالزهرة

ما تتقارن بازهار

ـــــــــــــــــــــــــــــــــــــــــــــــــ

ويبقى يسحر الاحساس

لون الما اله ثاني

لون الفاض من كلبك

لون من الدم القاني

سحر ياسيدي ينساب

اخذ بالباب وجداني

اذكره مهجتي تنصاب

عشكت الاه خلاني

على عناد اليريد انساك

يظل اسمك على لساني

واذا انساك بس لحظات

كبلها روحي تنساني

وابقى سيدي مبهور

وجمالك يبقى شي ثاني

اسود وابيض العالم

وحبك يبقى الواني