[أمل هارون]

البارحه شفت الوطن بالطيف اجاني البارحه
هلا ومية هلا يابو الخيول الجامحه
مديت اديه تسالمه شفت القلب قبل الجفوف يصافحه
شلونك قلت ياموطني وظنوني ظلت سارحه
وانقطع وسطي الخجل من الخجل وعيوني ذلت شابحه
قال اطمأن ياولدي كفتنا هي الراجحه
قلته الْيِرد ياموطني لحضنك الدافي تسامحه
اْليِرد وإلْما يِردْ وحتى اليِفكر بالوطن ذنوبه كلهن طايحه
بس الْيِخون اُمّيِتهْ ما يستحق نقرا على روحه الفاتحه
قلته يبه ياموطني عندي حجي بغزر الدموع المالحه
قال احجي قول شما قلت طبع الوطن مثل الابو واجب عليك تصارحه
الصايحه ؟؟ وليش أنت من دون الدول أطفالك الحلوين بالدم سابحه
وليش أنت من دون الدول بكل بيت عندك نايحه ؟؟
وليش انت من دون الدول ناسك إتْصبّح نازحه ؟؟
وليش انت من دون الدول جيرانه كلها تواكحه ؟؟
وليش أنت من دون الدول وكْ يا ثور بالعالم قوي تركض عليه تناطحه ؟؟
متْقلي منهو ألخبلك يا بو العقول الراجحه
قال اعتقد يا ولدي .. المشكله مو بالوطن .. المشكله الحجاج هو الذابحه
شفته ابتسم لمن حِجى و جاوب أجابه واضحه
يبقى الوطن هو الأصل والناس هي الرايحه
كفكف دموعك ياولد ادري بغريب الدار شوقه الجارحه
وادري بغريب الدار كل ما يِعتلي وكل ما صعد وشْ ما كسب خسران كل ما رابحه
حتى الطيور إلها وطن تهاجر لجن لمن يهزها الشوق ترجع طافحه
وحتى النخيل إلها وطن ما تنشتل إلا بأرضنا المالحه
بس إحنا نبقى لِشْ وقت يا موطني نحلم وطنا نصافحه ؟؟
خلاف الوطن تبقى البشر مثل البهايم دايحه ..
والبارحه شفت الوطن بالطيف

أجاني البارحه