[الحيدرية]

' إلى شيعتي '

للشاعر الملا سعيد العرب (رحمه الله)

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

حطوا المآتم واندبوني بدمع ساكب .. وابـﭼـوا على تعفير خدي بالترايب

ليكم يا شيعة تحملت هاي المصايب .. حتى حريمي تسلبت بالغاضرية

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

زوروا ضريحي عـﮕـب موتي و اندبوني .. و ليمن شربتوا الماي يا شيعة اذكروني

ترى متت عطشان ظامي ماسـﮕـوني .. حز الشمر راسي و ﭼـبدي ملتظيه

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

ما واحد الا انصاب من ﮔـبللي بفجيعة .. لكن مصابي ما جرى مثله يا شيعة

شفتوا احد ذبحوا على صدره رضيعه .. جدام عيني اتعفر بسهم المنية

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

يوم الذي شفته يلوح و ذوب حشاي .. شلته و رحت للـﮕـوم منهم أطلب الماي

جاه السهم من حرملة و تعفر احداي .. و ايده على رﮔـبتي لواها و شبح ليه

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

و ابني علي الأكبر من الميدان جاني .. و يصيح يابويه العطش غير ألواني

و اتعذرت له و راح عني و لا لفاني .. لكن نظرته على الثرى جثه رميه

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..

لو تنظروني يوم جبته يم الخدور .. جسمه مبضع بالسيوف ودمه يفور

و انا على العباس مني الظهر مكسور .. من وﮔـفتي فوﮔـه ضلوعي منحنيه

*** *** ***

يا شيعتي نصبوا العزا .. ونوحوا عليـَه ..

مذبوح ظامي ما شربت .. ﮔـطرة اميـَه ..