[زكي الياسري]

ارجو من الاخوه الكرام عذري لاني نشرتها في هذا القسم

قصيده قبل حدود المقبره

هيه رمشة عين يبن آدم تره
لن تشوف املاك ربك حاضره
1
بينك و بين الاجل رَمشة نضر ... ماكو مهرب من مقادير الدهر
شوف زادك قبل ميعاد السفر ... كبل لا توصل حدود المقبره
هيه رمشة عين يبن آدم تره
2
يبن آدم باجر ايحين الاجل ... لو بعد ساعه يجي الموت ابعجل
لو بعد لحظه و تحس ضيفك وصل ... وما تفيد الضيف كَبرك معذره
هيه رمشة عين يبن آدم تره
3
شوف روحك يبن آدم واتعض ... بيش تشغل نفسك بوكت الفرض
تكَوم للمحراب لو تنضر عرض ... شاشة التلفاز تسمع ثرثره
هيه رمشة عين يبن آدم تره
4
شوف نفسك لو اجوك الاصدقاء ... يا حديث ايدور وي وكت الغذاء
غــيبه؟ لو اقوال تخدش للحياء ... لو حِـــكــَم آل الرسول الطاهره؟

هيه رمشة عين يبن آدم تره

5
دير بالك تعتب اعله اطفالك ... لو فعلهم صار ما يحلالك
راجع احسن قائمة اموالك ... شوف مالك شنهو اصله و مصدره!
هيه رمشة عين يبن آدم تره
6
يبن آدم ثق تره مال الحرام ... ياكل اخلاق الطفل قبل الفطام
حيث بي تشري المشارب و الطعام ... و الاكل شر يصبح بدمهم سره
هيه رمشة عين يبن آدم تره
7
يبن آدم فكر بضغــط الكَبر ... منه ما تنجو استمع هذا الامر
حيث يضغط جسمك اليوم الحشر ... هلعذاب تنوله لو تضرب مره
هيه رمشة عين يبن آدم تره
8
عن رسول الله اخذ هذا الكلام ... سوء خلق المرء وي اهله حرام
اجعل ابيتك تقاليد السلام .... واصقل اخلاقك ( كصقلِ الجوهره)
هيه رمشة عين يبن آدم تره
9
هيه رمشة عين لنك بالكَبر ... شوف حالك ويه اصحاب الامر
اهل بيت احمد الك خلهم ذخر ... و صير زين الهم تنول المفخره
هيه رمشة عين يبن آدم تره
10
يبن آدم شين لا تصبح ابد ... حيث كَال الصادق و كوله سند
الما يطيع الله مو شيعي وبعد ... ابد ما نشفعله يوم الآخره
هيه رمشة عين يبن آدم تره
زكي الياسري النجفي
07/01/2011

[مصطفى العزاوي]

احسنتم مولانا الكريم على هذه القصيدة المؤثرة حقيقة نسأل الله حسن العاقبة

[زكي الياسري]

سلمت يا مولاي على المرور و الاطراء .. نعم نسأله تعالى حسن العاقبه ان شاء الله

تحياتي و خالص الدعاء

[القناص الاول]

وهل هناك اجمل من هذا الحوار مع النفس ؟؟

هذا وهذا وهذا مكانها ..

قبله بين عينيك ووقفة بانحناءة امامك يا شبل ياسر .

[النجف الاشرف]

السلام عليكم ورحمة الله وبركاته
اللهم صل على محمد وآل محمد وعجل فرجهم الشريف
سلمت أناملك مولانا ....

اقتباس :

يبن آدم شين لا تصبح ابد ... حيث كَال الصادق و كوله سند الما يطيع الله مو شيعي وبعد ... ابد ما نشفعله يوم الآخره هيه رمشة عين يبن آدم تره

كلش عدل
والسلام عليكم

[زكي الياسري]

حيا الله عمنا الحاج القناص الاول على هذا الاطراء الجميل

و اسال الله لك الموفيقه و لجميع شيعة امير المؤمنين عليه السلام


و حيا الله الغالي النجف الاشرف

جهود جباره في خدمة المذهب .. سدد الله سهامك في صدور النواصب

تحيه مصحوبه بخالص الدعاء