[قوافي الأيثار]

دينك من حييته = وبدمك رويته
اصبح دين الاحرار = واعتنقته الافكار
دينك من حييته
**************
يا أبو الاكبر سبيلك للبشر درب السعاده
نهج للأمه وجهادك باب للعز والاراده
واحنه يا بو اليمه نمشي وما تخوفنه الاباده
بحبك ومنهج ثورتك = تمشي بزحفها شيعتك
مرفوعه تبقى رايتك = رغم كل طاغي وعناده
وحــگ ضلع الزچـيه = دم نحرك قضيه
عنوان الشرف صار = واعتنقته الافكار
دينك من حييته
**************
يل خلودك سر ألهي وذاتك الباري اصطفاها
بكل تفاصيلك معاجز يا عقل يوصل مداها
انته كل نهضة تحرر تبقى سرها ومحتواها
حبك يبو اليمه فرض = وباسمك نثور وننتفض
بين السمه وبين الارض = گبتك يسطع ضواها
ضريحك يا ضوه العين = جنة عدن يحسين
ومنه تسطع انوار = واعتنقته الافكار
دينك من حييته
**************
كل قيم عزه واراده هذا دم نحرك صنعها
وراية الحق بنزيفك ثبتت وما اهتز وضعها
اشلون يهتز يا إمامي و جف ابو فاضل رفعها
بفيض الدماء الزاكيه = راية محمد عاليه
وصرخة ندائك مدويه = صحت والعالم سمعها
راية جدك اليوم = ترفرف فوك النجوم
بيرغ ثوره واصرار = = واعتنقته الافكار
دينك من حييته
**************
تبقى يابو اليمه بينه نور واشعاع البصاير
وانته يحسين النجاة وفلك رحمه من المخاطر
والي ما يعرف مقامك وبعناده يظل يغامر
انظر نــگله لكربله = وشوف النتيجه الحاصله
هناك الخلود باكمله = يم ضريح حسين حاضر
حسين بكل خلوده = ما تنحد حدوده
حسين بذاته اسرار = واعتنقته الافكار
دينك من حييته
**************
حسين يا باب الشفاعه ويا حبل فوزي ونجاتي
شعندي غيرك يا بو الاكبر يا صيامي وسر صلاتي
باسمك اصرخ يا حسين وتبقى هالصرخه لمماتي
تحضرني ريت بحفرتي = وتكشف همومي ووحشتي
مولاي واقبل خدمتي = وهذي اكبر امنياتي
گلبي انته تدريه = اسمك منحفر بيه
اسمك طلسم اذكار = واعتنقته الافكار
دينك من حييته
**************
انته هيهاتك تحدي لكل محب صارت شعاره
وهذي مو كلمه وتعدي ولا كتابه ولا عباره
هذي للمؤمن سلاحه وصبره في وقت انتظاره
صارت يبو اليمه القسم = هيهات للذل والظلم
نعرف مداها ونفتهم = هناك من نقره الزياره
بيوم الصحت هيهات = سمعتها السماوات
وبركان العزم ثار = واعتنقته الافكار
دينك من حييته
**************
هذا قاموس المعارك غيّرته الغاضـــــــــــــــريه
واشفنه اصحابك مدارس بالفنون العسكريه
وهي سبعينك عجيــــــــــبه الواحد يقابله ميّه ؟ !
انته ازرعت بيها البئس = واتعملت منك درس
بذلت مهجها والنفس = وزلزلت لابن الدعيه
تصيح بصوت لبيك = بالارواح نفديك
وغيرك حاشا نختار = = واعتنقته الافكار
دينك من حييته
**************
صرت عبرة كل موالي وصرت للأحرار عِبره
بحر يا بو اليمه ذاتك والبحر محـــــــــد يعبره
وانته سرك سر الهــــي يا عقل يكدر يفسره
يل باسمك اندار الفلك = هنياله كلمن يوصلك
ترضاني خادم بس الك = وانته بالنيات ادره

رب العرش صفاك = وباب الرحمه خلاك
يحسين والك ثار = واعتنقته الافكار
دينك من حييته
**************
بقلم – عمار جبار خضير
2012

لا اجيز التصرف بها