(( السلام على عقيلة الطالبيين ))
هذا صوت الله النزل بارض الطفوف .. بث مباشر يوصل لكل الملا
صوت مختص حصراً بهز العروش .. ايدة الرحمن جن بالزلزلة
هاي زينب شرف كل بيت الرسول .. وهل شرف من نزل شرف كربلة
حسين قائد مرحلة بقطع الوتين .. واهي بفكر حسين قادت مرحلة
وابو فاضل كافل وعندة اختصاص .. شلون مكفولة وتصدت كافلة
صورة من حيدر وما بيهة رتوش .. صورة طبق الاصل عدلة مكملة
هاي ثاني اشواط معركة الخلود .. والنتيجة الفوز ولها مسجلة
هاي صوت الله الرعا طه الامين .. وتانى هذا اليوم حتى ينزلة
هاي ضمها حسين جيش الاحتياط .. ونزلت اعلى عروش غيهم نازلة
هاي زينب وامها بضعة من الرسول .. هاي بضعة حيدر اصل المرجلة
هاي سر رب العرش فخر السماء .. ولهذا بنور ربها مجللة
هاي سر ياسينها والذاريات .. هاي سر حيدر السر بالبسملة
مثل اخوها حسين ورثت الانبياء .. وحرست التوحيد كلة باكملة
وقادت القافلة باديان السماء .. لا تظن بايتام قادت قافلة
ظنو الدين انمحى بقتل الحسين .. وبيها رد الدين كله الاولة
هاي وجه المعركة الثاني العنيف .. ثورة من ادموع شرسة وباسلة
حسين طب المعركة بالمرهفات .. واخته طبت بالحروف القاتلة
دروع لبست من صبر حامي الدخيل .. اسنين تدرس صبر عندة بمحفلة
واتعلمت من فاطمة بوجه الطغاة .. توكف وتنطي الدروس امفصلة
هاي صاروخ الحسم ضمه الحسين .. النسف نصر الطاغي سواه مهزلة
هاي ارواح الضحايا بكربلاء .. طبت اعلى الطاغي علنت مقتلة
هاي زينب جحفل اسلاحة اللسان .. جنهة امير المؤمنين ابجحفلة
غارت اعلى الطاغي كشفت محتواه .. وغدت كل اركان ملكه مخلخلة
اتكلة مذبوحين اخوتي بكربلاء .. ولان من الله الامر ما اجملة
وانت صح منتصر بس النا البقاء .. وانت ايامك عدد بس زائلة
والنا بالطف علم يا نسل الطليق .. ما تزير احفاد هند الآكلة
واحنا اصل الدين وانت اصلك طليق .. وفرق شاسع بين حق وباطلة
احنة سر الدين كله ومحتواه .. شلون تدركنا النفوس الجاهلة
احنه بيت الفضل ليشع عالوجود .. انطيني يا خصلة بأمية الفاضلة
واحنا بحر العلم ليروي الدهور .. وانتو عقلية ظلام وجاهلة
هاي زينب واكفة تخاطب امير .. يفترض حرمة وغريبة وثاكلة
ويفترض كدامة مجتوفة بحبال .. ويفترض عيلتهة تصرخ معولة
ويفترض كسرتهة احزان السنين .. عالاقل ما شافتة بطف كربلة
ونعش ريحانة محمد جهزوه .. اشبول غالب والمدامع سايلة
صوب ( حش كوكب ) مشى النعش الشريف .. بعد ما نزلت املاك اتغسلة
هذا نعش الحسن سيد اهل الجنان .. حسين اخية وكمر هاشم شايلة
يا حزن زينب من تشوف السهام .. صوبت كل النعش تتأملة
دبرتها ام الجمل واهل النفاق .. ومعضلة والله يا هالمعضلة
عمي هذا الحسن يم جدة الرسول .. يندفن لو شنهي !! عدكم مشكلة
كالوا اليندفن يم كبر الامين .. بس التحبه أرواحنا وتستقبلة
والاحزان البيهة من فقد الرسول .. والسقيفة الخانتة المتخاذلة
وحزن يوم الدار محسن والبتول .. والاشد من جتفوا عقد الولة
لو حزنهة امن انطبر راس الامير .. وصرخ جبرايل سوت جلجلة
ويا حزنهه حين ابو محمد طريح .. اتكطعت بالسم جبدته موصلة
ايكلة خوية حسين بالك لا تشوف .. اختك البطشت ما تتحملة
حملتهه الدنيا احزان وهموم .. جبال لو تحملهه تصبح مايلة
شافت افضع مجزرة بسفر الوجود .. اوثقتها ابدور اله متأهلة
شافت اشبول الهواشم عالصعيد .. ابدور خرت وابدماها مغسلة
وشافت السبعين انصار الحسين .. كضت صرعة اتساقطت مترملة
وشافت ابن الحسن ما بين الجيوش .. طير شبجة سيوفهم نصبت الة
وشافت الاكبر نزل جنة الرسول .. وعاينت مرة بن منقذ جندلة
وشافت اهوال وصعاب بهالرضيع .. بيوم كطعت جبده نبلة حرملة
وشافت العباس كاصد للفرات .. هذا موقف ما بشر يتحملة
ويوم رد احسين من دون الكفيل .. لطمت اعلى الراس حنت ذاهلة
اتكلة خوية احسين اريدن لابن ابوي .. ايكلهه جثه اعلى النهر ما نوصلة
ويوم ضل احسين وحدة بلا معين .. ايصد على اعيالة وعيالة ايصد الة
وشافتة من كصد وحدة لهالجيوش .. وحست الدنية ظلام وقاحلة
وزينب تعاين صعد شمر اللعين .. فوك صدر حسين يشتم كل هلة
شافت اشقاها يحز راس العميد .. امر دنيا اكلوب ما تتحملة
هاي زينب عمر كل ساعة تموت .. امن الحزن كل لحظة هي مغسلة
هاي زينب ماتت بهالذكريات .. لجن يا تاريخ حتى يسجلة
وهم ماتت زينب وهي الخلود .. انفي عنها الموت فض المشكلة
ما تموت وهي تاريخ الحسين .. وهي ترويلك القصة الكاملة
وهي ترويلك القصة الكاملة ..
الشاعر ابو زهراء المحمداوي
هذا صوت الله النزل بارض الطفوف .. بث مباشر يوصل لكل الملأ
العرض العادي
