[زكي الياسري]

بسم الله الرحمن الرحيم
زهرائيه علويه حسنيه حسينه مهدويه
اهدي ثوابها الى كل من يقرأها و الى ارواح اموات المسلمين جميعاً موالي امير المؤمنين علي عليه السلام من لا ذاكر لهم يذكرهم و خاصة خدام الحسين عليه السلام و الشهداء الكرام
زكي الياسري النجفي
3/1/2011


جـبل آلام هلــَّيله .... جبل آلاآآآم
نعِش وسهام هلــَّيله ... نعش و سهام
فجيعة فاطمه الزهره .... عذاب الباب و العصره
علي الكرار و الطبره
ونعش و سهام ... نعش و سهاآآآم
1
اصل كل مفسده بالدين .... ترد علـــّي بدأ بيهه
هذا الواقع المفهـــــوم .... للتاهت يــدليــــــهه
وعصرة فاطمه الزهره ..... و الجور الجره اعليهه
اساس المحنه للشيعه ...... حاضرهه ويه ماضيهه
حطب علباب حركَوهه .... حطب علبــــاب!!
حرب علزهره علنوهه شنو الاسباب؟
لأن بنت النبي الهادي .... يدهر ابغدرك اتعادي
تهيـِّـــِـج الزمره وتنادي
نعش و سهام ... نعش وسهام
2
نفس كَوم الحطب جمعت ..... حَدَّت سيف ابن ملجم
و طـُـبَرت حيدر الكرار ..... جنه (كأنه) يهودي مو مسلم
فكرة ابن ابو سفيان ..... نسل العاصي و المجرم
رادت قمة التوحـــــيد .... ابفاس المفسده تهـــــــدم
نفس هالفاس يا عالم ... نفس هالفاس
نِمه واصبح سهم غادر من الارجاس
رمو بيه النعش تالي ... نعش سبط النبي الغالي
ينادي احسين يالوالي
نعش و سهام ..... نعش و سهام
3
بألم كَلبك يبو اليمه .... توجيت اعله ضهر الاه
يبن الزهره يا مظلوم .... شاهدت النعش ويلاه
شاهدت السهام البيه .... نبتت و العرش ينعاه
شكبر صبرك يخو زينب .... تصيح الله يا الله
نفس هلكَوم يسروهه .... نفس هلكَوم
ليزيد الشام يسبوهه بقيود الشوم
يخوهه و راسك تشوفه .... وسهم عباس و جفوفه
و تطب للكوفه مجتوفه
نعش و سهام .... نعش و سهام
4
الحسن مسموم يا ويلي .... تصيح الشيعه وتنادي
بسم جُعده الابوهه جان .... للوالي علي يعادي
ابن لشعث نفاقه بان .... بصفين الامر بادي
هُوّه الخالف الكرار .... هُوّه العانِ المرادي
حسد احقاد ضمروهه .... حسد واحقاد
نفسهه العصرت الزهره حقدهه انعاد
تِـــتــَرجَم مرَّه بالعصره .... تِـــتــَرجَم مرَّه بالطبره
و بعدهه الفاجعه الكبره
نعش و سهام ..... نعش و سهام
5
يويلي تصيح شيعتكم ...... صبرنه عدّه لحدوده
على المسموم هلــّيله .... تنادي المهدي وجنوده
انهض سِلــَّه بتارك .... يمن زود الوصي زوده
اخذ ثاره الكريم اليوم .... اخذ ثار المَــثــَــل جوده
دصيح الثار يالمهدي .... دصيح الثار
الك انظار مشبوحه .... الك انظار
شوكت انوارك اتلالي .... يرف بيرغكم العالي
الك ثارات يالوالي
ونعش و سهام ..... نعش و سهام



زكي الياسري النجفي

[رياض الرسل]

السلام عليكم

حبيبنا الغالي
سيد زكي


موفق على هذه
الكلمات الولائيه
جعلها الله في ميزان اعمالك
دمت بكل خير

رياض الرسل

[زكي الياسري]

حيا الله تاج راسي العم رياض الرسل استاذنا

دعاء خالص بعطر كربلاء لهذا المرور
مولاي

[ثورة الحسين]

تسلم اناملك على ماخطت من كلمات ولائيه
تحياتي
اخوك الصغير
(عبدالله الشاعر)

[زكي الياسري]

حياكم الله عزيزي الغالي

[امين العتابي]

احسنت على هذه القصيدة الرائعه وجعلها الله في ميزان اعمالك
(قال الامام الصادق عليه السلام ) من قال فينا اهل البيت بيتا من الشعر بنى الله له بيتا في الجنة
تقبل مروري المتواضع
الحاج
امين العتابي