هدية الى كل احباب الامام الحسين .. اسميتـُها الزلزال الزينبي
ثوابها الى قرائها الاكارم
و الى اموات شيعة امير المؤمنين المنسيين و اسألكم الدعاء
11/1/2011
زكي الياسري النجفي
بينـــي وبينـــك .... يبـــن اْلزهره
تتشابه خويه الادوار
إنته اْبسيفك ... وآنه اْبَعبره
زلزلنه اعروش الكفار
1
يحسين ابقانون الدنيه ... تفكير الدارس محدود
محدود بدائِرْةِ اْدراكه ... ويشوف ابعينه المشهود
شافوك انحز مِنك نحرك ... ضنوك ابمسلك مسدود
ما دركوا (كيفية) خـُلدك ... وشلون ابكل (غد) موجود
جهلوا قيمـَة ... ثورة سيفك
من حّــدّوهه بنص انهار!!
انته ابسيفك .... وآنه ابعَبره
زلزلنه اعروش الكفار
2
يا خويه الدنيه ابأيامك ... وصلت حد الما مألوف
صار الحكَـ باطل و الباطل ... حكَـ عين العميان تشوف
خويه وانته بثورة سيفك ... حطيت انقاط اعله احروف
صار الصار او أصبح كَبرك ... كعبه وبيه الناس اتطوف
طفــَك اصبح ... فردوسِ النه
من تحته ادماك الأنـهار!!
انته ابسيفك ... وانه ابعبره
زلزلنه اعروش الكفار
3
جابر واحد جان يزورك ... يوم الرد ضعنك يحسين
هسا خل نحسب زوارك ... و نشاهدهم شوف العين
عـَّدوا حـد العَـــد عشاكَك ... مو مليون و مليونين!
هذا اليثبت سر قدسيتك ... صادر من رب الكونين
بـحــْـر احبابك ... موجه الهادر
ينجيـــهُـم باجر من نار
انته بسيفك ... وآنه ابعبرة
زلزلنه اعروش الكفار
4
اختك يحسين اوعلــّيته ... راسك يا تاج اهل البيت
جاهل مو فاهم مكَصدنه ... من ضن يا شامخ ذليت
جسمك صح مكَطوع المنحر ... وآنه ابأيتام احتاريت
لكن مقصد كل نهضتنه ... تـفـــتهمه الوادم يا ريت
ياهل وادم ... اصل الفكره
ما تقبـــــــل ذل الاحرار
انته بسيفك ... وآنه ابعبرة
زلزلنه اعروش الكفار
5
آدم لا اب لا ام عنده ... و عيسى ابلا والد انسان
اعجاز و تم بمر الباري ... من كَاللهم كـون و كان
وانته الكن مرتين الذاتك ... وحده ابثالث من شعبان
وْتخليدك يا (مِنِّ) المُرسل ... حل من يوم العاشر حان
انته الخالد ... يابن حيدر
يا سالك نهـــج الكرار
انته بسيفك ... وآنه ابعبرة
زلزلنه اعروش الكفار
6
يازهرة كل هاي الدنيه .... يا قمة قصر الايمان
يحسين ابثورة صمصامك ... احييت افكار الانسان
دمك من سال الشرع الله ... صار الكل سائل برهان
كَبرك ياخويه ابتضحيتك .... صار الكل كَاصد عنوان
(لائـَـ ــكْ) رَجَّت ... كل العالم
و هيهاتك صارت اعصار
انته بسيفك ... وآنه ابعبرة
زلزلنه اعروش الكفار
الزلزال الزينبي
العرض المتطور
