[ابوسيف الكيتاوي]

بسم الله الرحمن الرحيم اللهم صلي على محمد وال محمد

قصيدة كعدة للشاعر صباح نوري الكناني


منهاج الاحرار عزت نفسهه
ما ترضه بالعار اسمع درسهه
تهتف بحكمه واراده
احنه شيمتنه الشهاده
ما ترضه بالعار اسمع درسهه
----------------------------------------------------
لا تكول الناس وحده الناس اصناف وفصائل
بيهه رهمت عالمذله وتخضع بكل المسائل
وبيهه تحضرهه الكرامه بموقف وموقف تنازل

وبيهه ما تنذل ابد شما تخسر اموال اولد
لو ينزع منهه الجلد تبقه عالمبدأ تقاتل

والوادم اشكال كلمن ضميره
اتصح بيهه ابطال وبيهه الحقيره
ومنهم اليحجي ابسياده
احنه شيمتنه الشهاده
ما ترضه بالعار اسمع درسهه
------------------------------------------------
آنه ما اطول كلامي ما اسولفلك عجايب
جم طفل بالغ تشوفه ويصح ما يفتهم شايب
لا تجادل هذا موقف حكمه معهوده وتجارب

ماريد اغالي ابمطلبي وبمدرسة آل النبي
ابجم فحل ينعد الصبي ليث للاضداد غالب

مدرسة الاطهار بيهه الفراسه
من تحجي الازغار تحجي بشراسه
تختصر تنطق بأفاده
احنه شيمتنه الشهاده
ما ترضه بالعار اسمع درسهه
-----------------------------------------------
منهو استاذ البلاغه ارد اسألك وانت جاوب
منهو فارس لو تعده ترتجف منه الحرايب
منهو مسلم من حليبه ومنحسب بأسلامه تايب

بعد النبي منهو السجد وبالباري ما اشرك ابد
ولا شرب خمره ولا وئد وسيفه للاوثان ضارب

غير ابو الحسنين ما تلكه واحد
تتبصر العين فضله وتشاهد
الله وصانه ابوداده
احنه شيمتنه الشهاده
ما ترضه بالعار اسمع درسهه

احنه اتباع المحمد نتبع احكامه وبيانه
نصب الكرار بعده اولده من بعده ابضمانه
احنه منخالف وصيته واليخالفهه خيانه

بعد الامام المرتضه الحسن الله امفوضه
وعند الحسين الموعضه وكربله تشرح كيانه

نهج الرسالات توج امامه
بكل المجالات رفعه وكرامه
اتخاطب الباغي وعناده
احنه شيمتنه الشهاده
ما ترضه بالعار اسمع درسهه
----------------------------------------------
من علي ابن الحسين انشاهد شلون الكرامه
ابجرأة افعاله وحديثه الكوفه شهدتله الامامه
وخله ببن ازياد حيره بلا اماره ولا زعامه

من واجهه ابقصره اوكف ما هزه سيف ولا رجف
كال احنه عنوان الشرف وانتم ارموز اللئامه

تشهد العدوان قدره وجلاله
كلماته قرآن رتل بساله
ما نموت اعله الوساده
احنه شيمتنه الشهاده
ما ترضه بالعار اسمع درسهه
--------------------------------------------
خطبة السجاد تكشف هالنوايه المو صحيحه
من كلب مجلس يزيد وفهم الناس بنصيحه
رغم كل ذيج المصايب وعلته وروحه الجريحه

زلزل يزيد واهلكه وهز العرش والمملكه
وفند افكاره المشركه وصارت ابقصره الفضيحه

ابخطبة الشام ذل آل اميه
ما هم بالاعدام ناده ابحميه
يشهد الباري وعباده
احنه شيمتنه الشهاده
ما ترضه بالعار اسمع درسهه
----------------------------------------
للشاعر صباح نوري

[ابوتكتم الخير]

آنه ما اطول كلامي ما اسولفلك عجايب
جم طفل بالغ تشوفه ويصح ما يفتهم شايب
لا تجادل هذا موقف حكمه معهوده وتجارب

ماريد اغالي ابمطلبي وبمدرسة آل النبي
ابجم فحل ينعد الصبي ليث للاضداد غالب

مدرسة الاطهار بيهه الفراسه
من تحجي الازغار تحجي بشراسه
تختصر تنطق بأفاده
احنه شيمتنه الشهاده
ما ترضه بالعار اسمع درسهه

قصيدة ولائية
تنطق بالواقع المؤلم
ودرس للأجيال حتى ترى
لقد صور الكناني فأبدع
ونقل الكيتاوي فأحسن النقل ولأختيار
فثوابهما من أمير المؤمنين وأولاده
ومني الترحم على آبائهم
ودعائي

[الشاعر حسن خليفه]

اللهم صلي وبارك على محمد وابن عمه علي عليهما السلام

قصيده رائعه وكلام ولائي يسر القلوب

بارك الله بك وجعلها في ميزان حسناتك

ووفقك الله لكل خير ببر كه الصلاه على محمد وابن عمه علي عيلهما السلام

تقبل بسيط المرور مني

خادمكم الشاعر

حسن خليفه