يا مهدي
يا مهدي عجّل يا مهدي تصيح احبابك وين المهدي
تشهك والحزن الماخذهه بجرح حسين القلب يندي
+++++
دوّاره الدنيا اعله فكارك كلها تحارب فكر المهدي
محزونه الروح اعله افراكك فكر يجيب وفكر يودي
ظلينه بلا والي يلمنه جرح يجف وجرح يندي
ظيم اللفهه الشيعه مكاطر كل صبيحيه بفكدك نبدي
عدوانك تتشمت بينه ها يمته يطلع هالمهدي
واحنه نصيح بعالي الصوت غايب يرجع بيه نعدي
نعيد الدين بكل علومه ونكطع راس يزيد وكومه
وكل غاصب حقنه و متعدي يا مهدي عجّل يا مهدي
ظلت دمعتنه وما تنشف تتكاطر من يوم الطف
يمر علينه الليل بدمعه وليل الظالم غنوه ودف
يا مهدي اصرخ بينه الصرخه خل كلوب الترفه تجف
خل ثارك يغلي ومحرابك خل رايتكم بينه ترف
يا مهدي شيعتكم تعبت يمته الملكى ويمته نخف
نكطع ايد الذبحت جدكم نثأر للمكطوع الجف
ناخذ ثار سنين المرت وشكد مر شيعتكم جرعت
وما ظن جرح البينه يهدي يا مهدي عجل يا مهدي
ـــــــــــــــ
عطاشنه الشيعه وما تروى الا بجفك يبن الكوثر
انهض علّي الرايه واحنه سيف حسين وجدك حيدر
لمنه بعزك يا فرج الله خل عدوان الحق تتطشر
وشكد شربو من دمانه ظلينه احنه بحبك نكبر
نتواصل من جيل الجيل ننتظرك حد يوم المحشر
نتوالد والحب متأصل نعرف لا بد يوم وتظهر
يمته الباري يعلن وكتك اظهر رد الفجر بجيتك
خلي كلب الظالم يدّي يامهدي عجل يا مهدي
ــــــــ
وينك يا مهدينه وينك احضر حته تشوف بعينك
مخنوكه الشيعه وتترجه انهض وهيه تهب تعينك
ضايقنه الخوف وضيعنه خاف بيوم نضيع دينك
صح الخايف يمكن يضعف ولتصدك بالخوف انخونك
عجل يا سر الله الغايب شوف شلون الشيعه تصونك
جسرك احنه نصير وتعبر ناوي ذراع اللي عادونك
ودم حسين البيك نصونه ومرسالك لتظن نخونه
مجتوفه اعداك احنه ننودي يا مهدي عجل يا مهدي
ـــــ
من عكب الطف يا مولانه مهدوره بكل لحظه دمانه
سيف الباغي يحز رجالك بس جرح ودم هي دنيانه
صبّرنه الروح اعله فراكك عرفنه الحزن بكل الوانه
ننتظرك والينطر يتعب ندري ما يوم وتنسانه
تظهر وترد لينه الفرحه تشفي كلوب اللي حزنانه
لا تبخل يالجود بطبعك يارمز الشيعي وعنوانه
طال غيابك يا نترجاك اظهر كلنه نريد وياك
وياك احنه نريد نعدّي يا مهدي عجل يا مهدي
وفي العامري
يا مهدي
العرض المتطور
