[شبكة جنّة الحسين]

ظـهـر إحـسـانك و فضلك وجودك
لـخـوك احـسـين ضحي له وجودك
يـبـنـي هـاك إخـذ سيفك وجودك
يـرف بـيـدك لـواء الـهـاشـميه

اعـله حالك لون تبجي الرسل و أملاك
و حـقـك لـلـصـبر ألتزم و أملاك
إلـك اخـوه تـضـحي انفوس واملاك
تـصـبـر عـالـنـوايـب و الأذيـه

عـمـيـد الـمـعـركه ابزودك ورايد
أصـيـل و بـالـوفـه اتضحي ورايد
هـديـه لـو مـنـي تـطـلب ورايد
إخـذ عـيـنـي و إخـذ روحي هديه

مـن يـوم هـاشـم أرزمـت راحلها
مـا شـافـت أم الأربـع راحـه الـها
أغـلـه و أعـز مـا بـالبشر راح الها
سـبـط الـنـبي و أربع كواكب تزهر

روحـي ألـف إفـت حـزن وافه إلها
و غـيـب طـوالـعـها الدهر وافه إلها
أم الـبـنـيـن الأجـل مـن وافه الها
قـدمـنـه آيـات الـتـعازي الحيدر

الـحـزن خـلـه صـبـر قلبي لهيبين
و كـل لـحـظـه سهم جارح لها يبين
ابـمـصـاب أم الـبـنين اتشب لهيبين
أخـمـد هـذا يـلـهـب ذاك بـيه

الـنـواظـر تـصـب ما يخلص مصبها
و سـوه سـهـم الهضم روحي مصبها
أحـن لـم الـبـنـين و أذكر مصابها
و أون لـلأربـعـه الـغـابـوا سويه

مـرار الـدهـر فـت روحـي ولدها
ابـمـصـيـبـه مـا أجل منها ولدها
هـاي الـقـدمـت اربـع ولـدهـا
غـفـت هـالـلـيـلـه بتراب المنيه

خـصـيـمـي جف دمع عينه وناراي
و بـعـد إلـمـن أصد و انظر وناراي
عـفـه جـفـنـي الجمع دمعي وناراي
عـجـيـبـه اشـلـون جامعهن سويه

حـزيـن و راسـي هـالـبـين شبيبه
و لـهـيـب الـنـايـبه ابقلبي شبيبه
أنـوح إعـلـه الـنـطـت أربع شبيبه
الـحـبـيـب الـزهره قدمتهم هديه

يـا حـبل الصبر جم ذوب اضل اجراك
ويـا دمـع الـجفن منهو الذي اجراك
يـا حـيـدر اعـظـم الـمعبود اجراك
بـنـيـنـك صـرعة بارض الغاضرية

هـمـي عـلـى الـجبل لو صار ينهال
ومـن عـنـده شـديـد العزم ينهال
الـحـال ام البنين الدمع يا المحب ينهال
الـهـا اربـعـة بـالـغـاضـريـة

الـفـلـه اخـضـر ابـدمعها واربعلها
اشـكـثـر شـافت مصايب واربعلها
شـمـس دنـيـاهـا غابـت واربعلها
ابـدور اخـتـفـت بـرض الغاضريه

إجـروح أبـد الـزهـره ما يوم تنشد
و تـظـل دوم إبـنـشيد النوح تنشد
عـلـى أم عـبـاس إجت هاليوم تنشد
حـضـرت يـمـهـا لـحظات المنيه

عـلـى أم عـبـاس صوتي اليوم بحرين
و إلـهـا اتـفـجـرت عـيناي بحرين
بـعـد نـوحـوا عـلـيها يهل بحرين
الـوفـيـه الـواسـت الزهره الزجيه

أنـا مـن أمـي أخـذت الـحزن عنها
و دمـع عـيـنـي شـبه دمعات عنها
أنـا زيـنـب الـيـحـجـون عـنها
كـسـر ظـهـري مـصاب الغاضريه

يَـدَمْـعـاتِ الْجِفِـنْ يا حـالْ أجْراچْ
وحَـيـاتِچْ لـو نِـشَفْتي ابْغَصُبْ أجْراچْ
يَـحُـرَّه عَـظَّـمِ الْـمَعْبـودْ آجْراچْ
بُگَـوْا جَـعْـفَـرْ وِخـوته اعْلَه الْوِطِيَّه

يـمـن دمـعچ عـله الأولاد منصاب
عـلـيـهـم ماتم ابكل وكت منصاب
أخـبـره گمـر هـاشم طاح منصاب
وعـبـد الله عـل الـغـبـره رميَّـه

حـرت مـن هـمـي وين افزع وناوي
الـمـدامـع تـخـمد ابناري وناوي
نـذر لـو رجـعـوا أحـبـابي وناوي
ورد أزرع طـريـق الـغـاضـريّـه

إجـت أم الـبـنـين إتصيح ضل ماي
زيـنـب عـاودت و الـدار ضل ماي
يـزيـنـب لـيش هذا الماي ضل ماي
عـسـن يـنـشـف بـعد إبن الزجيه

بـلا عـبـاس إجـيـتك وحدي آنه
هـمـت بـضـعـون همي وحدي آنه
أخـبـرج راح خـدري ووحـدي آنه
إنـسـحـق مـن طـاح ليث الهاشميه

عـن حـسـيـن أسـألـنـج وجيبي
يـكـفـي مـن أشـق ثـوبي وجيبي
جـمـر الـبـيـج يـا زينب و جيبي
و آنـه إويـاج نـتـألـم سـويـه

جـفـي مـن دمـه الـعـباس محناي
و بـعـد عـيـن الكفيل الدهر محناي
لـون شـفـتـي إخـويه حسين محناي
طـاحـن دمـعـتـه و طاح إعله خيه

تـعـب مـن الـصـبـر جفي يالاهي
و قـلـبـي إخـلافـهم بيمن يلاهي
تـرد غـايـب الأهـلـه يـالاهـي
و كـل الـراح مـنـي إيـعـود إليه

إبـهـيـده يـا زمـانـي إوياي هاوين
حـيـاتـي مـن الزغر ها دمع و هاوين
عـلـه الـصـاحت ييمه حسين هاوين
يـبـعـد أمـك بـعـد ما بيك جيه

إلـي راد الـحـزن لـلـغـير ما راد
يـنـاعـي و هـالـخبر للقلب ما راد
أسـألـك عـن حـبيبي حسين ما راد
يـقـلـهـا إنـذبـح برض الغاضريه

إشـكـثـر روحـي تـون إعليك ونها
يـبـنـي و الـلـيـالـي المضت ونها
عـلـه مـهـلـك يـملك الموت ونها
هـا بـلـكـت يـعـود الـراح ليه

مـصـايـب أزرع بـروحـي ونـمها
لـحـد مـا أصـبحت بنتي و أنا أمها
بـغـيـاب حـسـيـن يا ساعه ونمها
تـنـام إشـلـون عـيـنـي و نار بيه

هـلـي فـوق الـنـجم و أبعد تعالوا
و أبـد مـا يـوم لـلـيـوقـع تعالوا
يـويـلادي ولانـي الـهـم تـعـالوا
غـريـبـه و داركـم وحـشـه عليه

و حـق مـن كـمّـل ابـسـبعه بنيها
صـبـرت و دنـيـتـي أجـزع بنيها
شـفـت كـل والـده يـمـها بنيها
و بـنـيـنـي إتـوذرت بـالغاضريه

حـيـاتـي الـضـعـن لمن سار شلها
و عـلـيَّ إجـروح قـلبي صعب شلها
عـقـب حـسـيـن روحي بعد شلها
حـقـهـا لـو تـوافـيـهـا الـمنيه

عـاشـرت الـمـنـاحه إعليك عشره
و أقـول الـوفـه مـاوفـيـت عشره
لـون عـنـدي ولـد يـحسين عشره
إلـك كـلـهـم فـده يـبـن الزجيه

يـحـسـيـن الـدهر غدار و إخوان
إعـضـامـي بـالوادع إنحنن و إخوان
لـقـدم لـك إشـعندي ولد و إخوان
لـون سـالـم تـرد يـحـسـين ليه

[زكي الياسري]

ابوذيات جميلة
الرابع و الخامس ابيات ميمر
و هو لون من الوان الشعر غير الابوذية

اتمنى ان ارى المزيد من ابداعكم المكنون و المركون على رفوف الذكريات

اعتزازي و اشتياقي لكم

[كريم السعبري]

ابيات جميله وصور مختلفه لاكنها في مصب واحد
هو حب محمد وال محمد صلى الله عليه واله
تحياتي السعبري

[ابو ياسر الكعبي]

ابيات في تمام الروعة

وفقكم الله وسدد خطاكم
نعم كان الرابع والخامس من وزن الميمر

[القلب الاسير]

بوركت ووفقت اخي الفاضل
تقبل تحياتي وتقديري
الاقل
احمد رفيش

[قاسم حتروش]

أبيات روعه
وفقكم الله لكل خير
تحياتي