[خالد محمد مهدي]

((وردنه))

كلنــه أنجلّب بثوبه وردنه

ومن كوثـره يتروه وردنه

بسفية رحمته كلنه وردنه

لأن هو الشفاعة الهل البرية

(( رد عبد الله)) كتبت هذه الساعه16\11\2013

*****************

حسين ياسلوة حياتي ونور عيناي

ردلــــي عبد الله بعد ماريدن الماي

بالسهم نحــــره تروَّه

الكوم ماعدهم أمروه

ردلي عبد الله بعد ماريدن الماي

***************

فحطة العطشان تجرح والصدر ناشف أبدرَّه

يبست شفافه وتفسرت ودمعته عللماي جمره

بحضن أبوه بعينه بسمه مادره بالماي حسره

فرحان ياورد الغضن

هم عود تتروَّه تظــن

ترجعلي لو أبقه أون ** من العذب متضوك كِطره

هاك يابو اليمه أخذه أورد عليَّه

بلجي كطرة نده لو شِربت أميَّه

كَلبــي بدموعه تجوَّه

الكَوم ماعدهم أمروَّه

*************

أعتنــــه بطفلــه أبو اليمه حاضنه بصدره وأيده

راد ماي الرد أجاله ورتــــوه من دم وريــــــــد

أنشلت أيدك يالرميته أطعنت كَلب أبن الصميده

حرمله كَلبه من صخر

بالسهم صابه للنحــــر

فيض الدمه أنحـــــدر**بعد ياماي اليفيده

رجع محني الظهر بالخطوَّه أيتعثَّر

كَال أخذي الطفل لمَّه جبدي مَرمّر

راح لجل الدين فدوه

الكوم ماعدهم أمروه

************

شافت ربابه وِلدهه وأخذتــــــــه من بين أديَّه

هاياشمعة عيونــــــــي ألَّي أنطفت بهل المنيَّه

روح يمَّه ويَّه محسن أهناك وحضنها الزجيَّه

يابعـــد ســـــبّاح الكّلب

بعيوني ما وجدَّه درب

فركَاك يرضيعي صعب** المهد خالي بهل المسيَّه

يمَّه ياعبد الله فاركَته الحنينــي

دمعتي أتلولي ويناغيلك ونيني

والحزن والنوح سلوه

الكوم ماعدهم أمروه

************

خلّي ليل رباب يطوَل وخلّي يلفي الشيب راســي

يالرحت ونسيت أمَّك بيا مصيبه أتظل تقاســـــي

يبني بين ضلوعي أضمَّك والحضن لتكَول ناسي

برباك كَلبي أشكَد صبر

والشيب يايمَّه أنتظــــر

سهرانــه خاويت الكَمر** ونار من أشهك أنفاسي

عالمهد أنظر وشوفن صورتك

وصدري وحليبه يتانــي لهفتك

الفحطتك الروح تِهوه

الكوم ماعدهم أمروه

************

لو أعد النجم ترجــع النجــم يخلص أبعدّي

والجرح لوطاب يبني يرجه من جديد يدّي

والدمع لو يجف يُمَّه الدموع أتصيح بعدي

ونهاري بدموعــي صُبَح

ومن مهجتي غاب الفرح

وماي العمِه بعيني وضح **ومن جديد النوح أبدي

يفز ضلعي وياك من شوغتك أسمع

ونظر اعله المهد خالي العين تدمع

ضنوتي للباري شكوه

الكَوم ماعدهم أمروه

***********

[رآحيل]

أحسنتم شاعرنا الكريم
في ميزان حسناتكم"
مثابين ..تشكراتي "