من النجف من كربله ومن كل مقام = يا بو طالب احنه نبعثلك سلام
من المساجد والمنابر = من المواكب والشعاير
يا بو طالب احنه نبعثلك سلام
********
ناصر الاسلام انته لاجله سيفك جردت = ولرسول الله محمد بالكفالة تعاهدت
واجهت طغيان عاصف يابو طالب وصمدت = وحدك وكل تضحياتك انته بيها اتخلدت
حامي تبقى وللرسالة قدمت روحك نذر = شمس تبقى وما تغيبك كل اباطيل الكفر
يلي تاريخك مفاخر = من المواكب والشعاير
يا بو طالب احنه نبعثلك سلام
********
احضنت اركان الرسالة مؤمن بعزم وثبات = وصحت باهل الجاهلية بصوت زلزل للطغاة
الحاضر يسمع الغايب كل شقي من هالشقاة = والله ما يدنه لمحمد وانه حي بهالحياة
مو عواطف عدنه حبك انته ياعم الرسول = بل عقيدة صار عدنه وفرع من هاي الاصول
نحبك وبسمك نجاهر = من المواكب والشعاير
يا بو طالب احنه نبعثلك سلام
********
انته شريان الشهادة ومنك الدين ارتوه = والدلائل تضحياتك والدماء الطاهره
بكل شهيد وگطرة سالت بيها روحك حاضره = انته جعفر وابو فاضل والي حزوا منحره
هالشريعة من حماها غيرك انته وما تزال = بالفضيلة وبالتحدي بنضرب بيك المثال
سيدي يا خير ناصر = من المواكب والشعاير
يا بو طالب احنه نبعثلك سلام
********
يا حقيقة الحاربوها منذ الاف السنين = ما تغيبها الضغاين ضد امير المؤمنين
انته لاصحاب الولاية مؤمن وحبك يقين = وتبقى بعيون البصيرة من كبار المسلمين
سيدي نعرف حججهم كفروك اليا سبب = وصفّوا حيدر امامي هذا قتّال العرب
من الجوارح والضماير = من المواكب والشعاير
يا بو طالب احنه نبعثلك سلام
********
انته كل ذرة بكيانك يابو طالب والجسد = شهدت برب الجلالة قل هو الله احد
آمنت ايمان واضح والنبي بهذا شهد = حتى اشعارك عقيدة تبقى للحق معتمد
باب علم الهادي حيدر عنها گال تعلموا = شعر ابو طالب عقيدة وبعمقها استفهموا
بهالقصايد كل حناجر = من المواكب والشعاير
يا بو طالب احنه نبعثلك سلام
********
نزل جبريل بوفاتك وبأمر رب السماء = يواسي للهادي و يـگله يا امام الانبياء
ناصرك مات وكفيلك ,راح يشتد البلاء = اخرج واتركها مكه الك ما بيها بقاء
عام الاحزان برحيلك والنبي قام الحداد = وحنه شيعتكم حزنه ونلبس اليوم السواد
يبقى ذكرك بينه حاضر = من المواكب والشعاير
يا بو طالب احنه نبعثلك سلام
********
عمار جبار خضير
2015
يا بو طالب احنه نبعثلك سلام
العرض المتطور
